Filipjajna 1

¹O Pavle hem o Timotej, sluge e Hrista Isuseskere, dži ko sa o sveta soj tane ko Hristos Isus, koj tane ko Filipi, e vodačencar hem okola so služinena ki crkva: ²blagodat tumenge hem mir taro Devel amaro Dad hem taro o Gospodari o Isus Hristos.

O Pavle blagodarinela ki sekoja molitva

³Blagodarinava me Devleske uvek koga setinava man ki tumende; ⁴uvek ki sekoja mli molitva molinava man baši sarinenge tumenge radosteja, ⁵baši odova so učestvinena te širinelpe o Evangelie taro prvo dive dži akana. ⁶Sigurno sijum ko odova, deka Okova, Koj počmingja o šukar delo ki tumende, ka dovršinele dži ko Dive e Hrista Isuseskoro.

⁷A hem pravo tano odova te mislinav agjar baši sarinenge tumenge, soske sijen ko mlo srce sarine tumen, koj učestvinena mancar ki blagodat – sar ko mlo phanlipe, agjar hem ko braniba hem utvrdiba o Evangelie. ⁸Soske o Devel tano mange svedoko kozom žedno sijum palo sarinende tumende asavke mangipaja e Isuse Hristoskoro.

⁹Hem odoleske molinava man tumaro mangipe te ovel izobilno sa poviše hem poviše ko pendžariba hem ki sekoja buti te razlikujnen, ¹⁰za da te šaj te ispitinen baši odova soj tano pošukar, hem te oven čista hem bizo mahana ko Dive e Hristoskoro, ¹¹pherde pravedna plodencar, kolaj tane preku Isus Hristos, baši slava hem pofalba e Devle.

Ko bilo savo način o Hristos propovedinelape

¹²A mangava te džanen, phrajljalen, deka akava so ovela mancar pomožingja but poviše baši te širinel pes o Evangelie, ¹³agjar so ulo lenge jasno e celo carsko stražake hem sa e javerenge, deka sijum ko phanlipa baši o Hristos, ¹⁴Hem poviše phrajlja ko Gospodari ohrabrime tane taro mlo phanlipe, hem na darana sa poviše te propovedinen e Devleskoro slovo.

¹⁵Čače, nekoj propovedinena e Hrista taro zavist hem mangipaja te rasprajnenpe, a javera tari šukar vojlja; ¹⁶nekoj taro mangipa, džandipaja deka pašljovava ko phanlipa baši te braninav o Evangelie, ¹⁷a javera propovedinena e Hrista taro sebičnost, na čisto nameraja, mislinena te anen mange pharipa ko mlo phanlipe.

¹⁸Ama sepak, ko sekova način, bilo dujmujale ili iskrena, o Hristos propovedinelape. Hem radujnava man baši odova, hem ka radujna man, ¹⁹soske džanava deka akava – preku tumari molitva hem pomoš taro Duho e Isuse Hristoskoro, ka ovel mange baši spasenie, ²⁰sar so edvaj udžakjerava hem nadinava man, deka ko ništo nae te ladžakjera man: ama sa me silaja bizo dar sar hem uvek, agjar hem akana, ka bajrol i slava e Hristoskiri ko mlo telo, bilo preku životo, ili preku meribe.

Ulavdo sijum ko duj strane

²¹Soske baši mange životo tano o Hristos, a o meriba – čisto dobivka. ²²Ama ako hem poadari živinava ko telo, odova baši mange značinela: plodno buti – hem na džanava so te birinav. ²³Ulavdo sijum ko duj strane: isi man želba te džav mange hem te ovav e Hristoja, soj tano dur pošukar, ²⁴ama baši tumenge tano popotrebno te ačhovav ko telo.

²⁵Hem sigurno sijum ko odova, džanava deka ka ačhovav hem ka prodolžinav sarinencar tumencar, baši odova tumen te džan angle hem baši radost ki vera. ²⁶Hem tumaro faliba ko Isus Hristos te ovel panda but poviše preku mande, koga ka avav palem ki tumende.

Te tergjoven cvrsto ko jek duho ki jek misla

²⁷Samo ponašinen tumen dostojno baši e Hristoskoro Evangelie, za da te šaj me – bilo koga ka avav te dikhav tumen, ili bilo koga nae te ovav tumencar, te šunav baši tumenge, deka tergjovena cvrsto ko jek duho, deka ki jek misla zaedno borinena tumen baši i vera taro Evangelie, ²⁸hem deka ko ništo na darana taro protivnikja: odovaj tano olenge znako baši uništiba, a tumenge baši o spasenie, hem odova taro Devel, ²⁹soske tumenge dendoj milost baši o Hristos na samo te verujnen ki Leste, nego hem te ciden baši Leske, ³⁰borinena tumen isto borbaja, sar so dikhlen ki mande, a hem akana šunena baši mange.