Filipjajna 2
Te ovel tumen isto misle hem isto mangipe
1Hem agjar, ako isi nesavi uteha ko Hristos, ako isi nesavo ohrabruvanje taro mangipe, ako isi nesavo zaedništvo e Duhoja, ako isi nesavo oset baši tato mangipe hem milost, 2pheren mlo radost, odoleja so tumare misle isto te oven, te ovel tumen isto mangipe, ki jek misla vodime ko jek.
3Ma kjeren ništo taro natprevar koj poprvo te sikavelpe, ili te kjeren tumen ko baro a ko čučo, nego oven ponizna hem računinen tumen jek jekestar pobare taro tumendar! 4Ma dikhen sekoj samo baši tumaro interes, nego sekoj neka dikhel okova hem so trebela baši javerenge.
Te ovel tumen isto misla koja sine ko Isus Hristos
5Te ovel tumen ki tumende i isto misla, koja sine hem ko Isus Hristos; 6Koj iako tano e Devleske ko oblik, na dikhela sine te ikjerelpe ko odova soj tano jek e Devleja, 7nego ponizingjape Korkori Pes, hem lelja oblik taro sluga, ulo slično e manušencar. 8Hem otkoga arakhlisalilo ko liko sar manuš, Ov ponizingjape Korkori Pes hem ulo poslušno dži ko meribe, čak hem dži ko meribe ko krsto.
9Odoleske hem o Devel vazdingjale but učo upre hem dengjale anav, soj tano upreder sekova anav, 10za da e Isuseske ko anav te pokloninelpe sekoja kočak okolengiri: koj tane ko nebo, hem ki phuv, hem teli phuv; 11hem sekoja čhib te ispovedinel deka o Isus Hristos tano Gospodari, baši slava e Devleske o Dad.
O Devel tano Okova, Koj kjerela buti ki tumende
12Odoleske, mle mangljalen, sar so uvek sijen sine poslušna, na samo koga sijum uza tumende, nego panda poviše akana, koga na sijum uza tumende, kjeren buti ko tumaro spasenie daraja hem tinanibaja. 13Soske o Devel tano Okova, Koj kjerela buti ki tumende za da te mangen hem te kjeren odova, sprema odova soj tano ugodno Oleske.
14Kjeren sa bizo te žalinen tumen hem te na akošen tumen, 15za da te oven bizo mahana hem čista, bizo fleka e Devleskere čhave, maškar iramo hem rumimo rodo, maškar koj ka svetinen sar čerejna ko sveto, 16cvrsto ikjeribaja o slovo e životoskoro, za da te ovel man soleja te falinav man e Hristoske ko Dive, deka na prastandiljum ko čučo hem deka na trudingjum man ko čučo.
17Ama, ako hem dava man sar žrtva so thavdela upra tumari žrtva hem služba tumare verakiri, radosno sijum hem radujnava man sarinencar tumencar. 18A isto agjar radujnen tumen tumenda hem radujnen tumen mancar.
O Pavle mangela te bičhavel e Timoteje
19Nadinava man ko Gospodari o Isus deka ka bičhavav tumenge panda hari e Timoteje, ta hem meda te utešinav man odoleja koga ka džanav sar sijen tumen. 20Soske nae man nikoj, koj tano isto dušaja sar leste, koj doborom iskreno ka grižinel pes baši tumenge, 21soske sa o javera rodena plo, a na okova soj tano e Hrista Isuseskoro. 22Tumen džanena oleskiri dokažimi vernost, deka – sar jek čhavo pe dadeja – služinela sine mancar ko širiba o Evangelie. 23Agjar, nadinava man deka ka bičhavavle ole, odma štom ka hajljovav so ka ovel mancar, 24a nadinava man ko Gospodari deka hem meda korkori panda hari ka avav.
O Pavle ka bičhalel e Epafrodite
25Dikhljum deka potrebno te bičhavav tumenge e Epafrodite, mlo phral hem buti so kjerela mancar zaedno hem zaedno borinaja amen – koj tumen bičhagenle te pomožinel man kote so valjani mange; 26soske sine but žedno palo sarinende tumende hem sine oleske pharo soske šungen deka sine nasvalo. 27Čače sine nasvalo paše dži ko meriba, ama o Devel sikagja milost, hem na samo leske, nego hem mange, za da ma te avel mange žal upri žal.
28Odoleske mangava te bičhavavle so posigate, te radujnen tumen palem koga ka dikhenle, hem meda te ovav pohari sekirimo. 29Hem agjar, priminenle ko Gospodari sekole radosteja hem poštojnen asavken, 30soske baši e Hristoskoro delo arakhlisalilo paše dži ko meriba, čhigja po životo ko opasnost, za da te dopherel odova so tumen našti sine te kjeren mange.