Filipjajna 3

Pravednost koja avela preku i vera ko Hristos

¹Hem agjar, mle phrajljalen, radujnen tumen ko Gospodari! Mange nae tano dosadno te pišinav tumenge isto, a tumenge ka kjerel te oven posigurna.

²Pazinen tumen taro džukjela, pazinen tumen taro okola bilačhe buti so kjerena, pazinen tumen taro hovavno obrezanie! ³Soske, amen sijem o čačutno obrezanie; amen kola služinaja e Devleskere Duhoja hem falinaja amen ko Hristos Isus, a na nadinaja amen ko telo, ⁴iako hem meda šaj te daninav man upro telo.

Ako nekoj javer mislinela deka šaj te nadinel pes ko telo, odova me, panda poviše: ⁵obrezimo sijum ko ovtoto dive, taro izraelsko rodo sijum, taro e Venjamineskoro pleme, Evrei taro Evrea; sprema o Zakoni - farisej; ⁶sprema sa me silaja – maltretirinava sine i crkva; sprema i pravda e Zakoneskiri sijum sine bizo te falinel nešto.

⁷Ama odova so mange nekogaš značinela sine but, računingjumle odova deka nae vrednost baši o Hristos. ⁸Hem me akana panda poviše dikhava sa o javera bukja deka nae len vrednost, sprema odova soj tano najvažno te pendžarelpe e Hrista Isuse, Mlo Gospodari, baši Kaste našagjum sa hem sa računinava baši otpad, za da te pridobinav e Hrista ⁹hem te arakhljagjovav ki Leste, na mle pravdaja, koja avela taro Zakoni; nego pali pravednost, koja avela preku i vera ko Hristos: i pravednost taro Devel preku vera, ¹⁰za da te pendžarav Ole, hem i sila taro Oleskoro voskresenie, hem te ovav meda zaedno ko Oleskoro cidiba, te ovav slično sar Leste ko Leskoro meribe ¹¹ta nesar te doresav dži ko voskresenie taro mule.

O Pavle trudinelape so šaj te doresel

¹²Na vakjerava deka vekje doresljum ili deka vekje aljum dži ko sovršenstvo – nego trudinava man so šaj te doresav, soske hem manda o Hristos pridobingja. ¹³Phrajljalen, me panda na mislinava deka doresljumle! Ama sepak kjerava jek: bistrava okova soj tano pali mande, a dikhava ko okova soj tano angli mande; ¹⁴prastava ki cel: baši nagrada upraldan so sijem vikime taro Devel ko Hristos Isus.

¹⁵Hem agjar, amen kola sijem duhovno resle mislinaja agjar; ako tumen mislinena hem nešto pojaver, o Devel ka otkrinel tumenge hem odovada. ¹⁶Samo te ikjera amen ko odova dži ko kova doreslem, sprema o isto pravilo, hem te ovel amen jek misla.

¹⁷Phrajlalen, dikhen len mandar primer, hem dikhen len okolendar koj džana isto agjar palo amaro primer. ¹⁸Soske but džene, baši kaske so vakjerava sine tumenge but puti, a akana vakjerava hem asvencar, džana sar dušmajna baši o krsto e Hristoskoro. ¹⁹Lengoro krajo tano propast; olengoro devel tano o vogi; olengiri slava tani ki lengiri ladž; ola mislinena samo baši akaja phuv.

²⁰A amaro državljanstvo tano ko nebesia, kotar hem adžikjeraja e Spasitele, o Gospodari o Isus Hristos, ²¹Koj ka meninele skros amaro slabo telo kova so merela, te kjerele sar Oleskoro slavno telo, sprema i sila so delujnela Oleskiri, kolaja šaj te čhivel sa teli Peste.