Filipjajna 4
Ma sekirinen tumen baši ništo
1Odoleske, phrajljalen mle mangljalen hem mangle, mlo radost hem venco, tergjoven agjar cvrsto ko Gospodari, mangljalen!
2Molinava e Evodija hem molinava e Sintihija te ovel len jek misla ko Gospodari. 3Oja, molinava hem tut, verno amal, pomožin olen, soske zaedno mancar trudingepe ko propovediba o Evangelie, hem e Klimenteja, hem o javera buti so kerge mancar, kaskere anava tane ko Lil e Životoskoro.
4Radujnen tumen uvek ko Gospodari! Palem vakjerava: radujnen tumen! 5Tumare krotkipaja te oven pendžarde sa e narodonge! O Gospodari tano paše.
6Ma sekirinen tumen baši ništo, nego ko sa preku molitva hem rodiba te oven blagodarna hem vakjeren anglo Devel odova so valjani tumenge! 7Hem e Devleskoro mir, so nakhela upreder sekoja godi, ka arakhel tumare srcia hem tumare misle ko Hristos Isus.
8Ko krajo, phrajljalen, sa soj tano čačikano, soj tano česno, soj tano pravedno, soj tano čisto, soj tano ljubezno, soj tano ko šukar glaso – ako tano nesavo šukaripa, ako tani nesavi pofalba – mislinen baši odova! 9Okova so siklilen, hem primingen, hem šungen, hem dikhlen ki mande – kjeren odova, hem o Devel e mireskoro ka ovel tumencar!
Sa šaj preku o Hristos
10Radujsaliljum but ko Gospodari, soske akana najposle, isi tumen ponovo griža baši mange. Angleder tumen inače grižingen tumen sine, ama na sine tumen prilika. 11Na vakjerava odova baši o nanipa, soske sikliljum te ovav zadovolno odoleja so isi man. 12Džanava te živinav hem ko nanipa, džanava hem ko but isiba, siklo sijum ko sa hem ko svašto: te ovav čalo hem bokhalo, te ovav ko but baro isiba hem ko nanipa. 13Sa šaj preku o Hristos, koj dela man sila.
14Nego šukar kjergen, so lelen te pomožinen ko mlo pharipe. 15A džanena hem tumenda, Filipjajna, deka ko početok ko propovediba o Evangelie, koga geljum mange tari Makedonija, nijek crkva na pomožingja man nešto te del man ili nešto te priminav, edinstveno tumen. 16Tumen bičhagen mange ko Solun, jek duj puti, baši mli potreba.
17Nae deka rodava bakšiši mange, nego rodava o plodi so umnožinela pes baši tumaro šukaripe hem korist. 18Primingjum sa hem isi man sa ko izobilstvo. Pherdo sijum otkoga primingjum taro Epafrodit so bičhagen mange – šužo hem ugodno miris, prifatlivo žrtva ugodno e Devleske.
19A mlo Devel ka ispolninel sekoja tumari potreba, sprema Plo barvalipa – ki slava ko Hristos Isus. 20A slava amare Devleske, hem Dad, ko sa o vejkja, amin!
21Pozdravinen sekole verniko ko Hristos Isus! Pozdravinena tumen o phrajlja, koj tane mancar. 22Pozdravinena tumen sa o svetie, a posebno okola taro e Kesareskoro kher.
23I blagodat amare Gospodareskiri o Isus Hristos te ovel tumare duhoja. Amin!