¹O Pavle, o apostoli e Isuse Hristoskoro preku e Devleskiri vojlja hem o phral o Timotej, ²dži ko sveta hem verna phrajlja ko Hrista, ko Kolos: i blagodat tumenge hem o mir taro Devel amaro Dad.

O Isus platingja amen hem kingja amen preku Plo rat

³Blagodarinaja e Devleske, hem Dad amare Gospodareske o Isus Hristos, molinaja amen uvek baši tumenge, ⁴soske šungem baši tumari vera ko Hristos Isus hem baši o mangipa, kova isi tumen sprema ko sa o svetie, ⁵baši nadež, koja arakhelape tumenge ko nebesia, koja šungen porano taro čačikano slovo taro Evangelie, ⁶kova alo ki tumende, hem propovedinelape ko celo sveto, bajrola hem dela baro plodi, sar hem ki tumende, taro odova dive koga šungen hem pendžargen e Devleskiri blagodat ko čačipe, ⁷sar so siklilen taro Epafras, amaro manglo phral zaedno buti so kergem ko služiba, koj tano verno služiteli e Hristoskoro baši tumenge, ⁸koj vakergja amenge baši tumaro mangipe ko Duho.

⁹Odoleske hem amen taro odova dive koga šungem odova, na ačhovaja te molina amen baši tumenge hem te roda te phergjoven tumen pendžaribaja baši Oleskiri vojlja ki sekoja mudrost hem duhovno te hajljoven, ¹⁰agjar so te živinen dostojno baši o Gospodari hem te oven Oleske ugodna ko sa; za da te den baro plodi ko sekova šukar delo hem za da te bajron ko pendžariba e Devle; ¹¹te zojragjoven ki sekoja sila, sprema e silaja tari Oleskiri slava, za da te ovel tumen strpljenje te izdržinen; radosteja ¹²te blagodarinen e Devleske, Koj kergja te ova sposobna te ovel amen delo ko nasledstvo e svetienge ki svetlina.

¹³Ov cidingja amen tari vlast e karanlukoskiri hem ingargja amen ko Carstvo Ple mangle Čhaveskoro. ¹⁴Ko Isus isi amen sloboda, koleja platingja amen hem kingja amen preku Plo rat, hem oprostingja amare grevia.

Saj tano sozdajmo preku Leste hem baši Leske

¹⁵Ovi tano liko e Devleskoro kova so na dikhjola, Prvobijando* upreder sekova sozdanie, ¹⁶soske preku Leste tano sozdajmo sa soj tano ko nebesia hem ki phuv; so dikhjola hem so na dikhjola, bilo prestojlja, ili gospodarstva, ili načalstvia, ili vlastia, saj tano sozdajmo preku Leste hem baši Leske.

¹⁷Hem Ovi tano angleder o sa hem saj ki Leste phanlo. ¹⁸Ovi tano hem Šero e Teloskoro, e Crkvakoro. Ovi tano početok, Prvobijando taro mule, za da te ovel Prvo ko sa, ¹⁹soske e Dadeske sine ugodno ki Leste te vselinelpe celo e Devleskiri priroda, ²⁰hem preku o Isus te smirinel len Peja sa soj tano ki phuv ili ko nebo, te kerel mir preku o rat Oleske ko krsto.

²¹Hem tumen, koj sijen sine nekogaš jabandžie hem dušmajna sprema ko Devel ko tumare misle hem bilačhe dejlja, ²²akana pomiringja tumen preku o meriba ko Oleskoro manušikano telo, za da te ikavel tumen angli Peste: sveta, bizo mahana hem bizo te oven kriva, ²³samo ako ačhovena ki vera temelime hem cvrsta hem ma te ciden tumen tari nadež taro Evangelie, kova šungenle, kovaj tano propovedimo baši sa soj stvorimo telo nebo hem ko kova me, o Pavle, uljum leske služiteli.

I tajna koja sine garavdi

²⁴Akana radujnava man ko mlo cidiba baši tumenge – hem ko mlo telo dopherava odova cidiba so trebela te kerav, sar o Isus so cidingja baši i Crkva, kojaj tani e Hristoskoro Telo, ²⁵baši kaske hem me uljum služiteli, sprema e Devleskiri dolžnost soj tani mange dendi baši tumenge, za da te ispolninav e Devleskoro slovo; ²⁶i tajna, koja sine garavdi vekoncar hem pokolenia, a koja tani otkrimi akana Oleskere svetienge. ²⁷O Devel manglja olenge te javinel kozomi tani barvali i slava akale tajnakiri maškar o narodia: o Hristos ki tumende, nadež e slavake.

²⁸Amen propovedinaja e Isuse, opomeninaja sekole manuše hem sikavaja len celo mudrosteja, za da te pretstavinale sekole manuše sovršeno ko Hristos Isus. ²⁹Odoleske trudinava man hem borinava man sprema Oleskiri sila so Ov dela man, koja delujnela silno ki mande.

*Stiho 15: Prvobijando na značinela dekaj prvo sozdajmo. O grčko lafi baši prvobijando tano prototokos, so značinela okova koj isile prvenstvo ko sa, okova so isile najbaro than maškar o sa, najvozvišimo, hem okova koj upreder o sa.