Galatjajna 2

O Evangelie doverimo e Pavleske baši o biobrezime

¹Palo dešuštar berš geljum upre palem ko Erusalim e Varnavaja, leljum mancar e Tite, ²a geljum upre palo otkrovenie taro Devel, hem objasningjum samo posebno e ugledno vodačenge baši o Evangelie, kova propovedinavale maškar okola kola so nae Evrea, za da te na ikljol deka prastava ili deka prastandiljum ko čučo. ³Ama ni o Tit, koj sine mancar, iako tano Grko, na sine prinudimo te obrezinelpe, ⁴baši disave hovavne phrajlja, kola garavindor khuge, hem čhigepe za da te dikhen amari sloboda koja so isi amen ko Hristos Isus, za da te čhiven amen ko ropstvo. ⁵Kaske na muklem ni jek momenti, nitu pokoringem amen lenge, soske manglem za da te ačhol tumencar o čačipe taro Evangelie.

⁶A so kjerelape lafi baši okola, kola so sine računime sar ugledna vodačia, save te sine nekogaš, mange tano sa jek - o Devel na dikhela e manušeske ko muj - ola o ugledna vodačia ništo na dodajnge mange. ⁷Nego, naprotiv, koga dikhle deka mange tano doverimo o Evangelie maškar o biobrezime, sar e Petareske maškar o obrezime, ⁸soske Okova, Koj kjerela buti e Petreja baši apostolstvo maškar o obrezime, kjerela buti mancarda baši o pagansko narodo.

⁹Hem koga halile i blagodat, soj mange tani dendi, o Jakov, o Kifa* hem o Jovan, koj sine računime baši stubia, denge amen, man hem e Varnava, o desno vas sar znako baši o zaedništvo so isi amen; za da te dža amen dži ko pagansko narodo, a ola dži ko obrezime; ¹⁰mandar samo rodinge te na bistra e čorolen, baši kova isto meda dava sine sa mandar za da te kjeravle.

Opravdime preku i vera ko Isus Hristos

¹¹A koga o Kifa* alo ki Antiohija, sprotivsaliljum leske anglo muj, soske trebela sine te ovel osudimo. ¹²Ustvari, angleder te aven nekoj taro Jakov, ov hala sine e neevrejsko narodoja, ama koga ale akala, ov povlečingjape hem cidingjape tari dar taro obrezime. ¹³Hem kjerenajne dujmuja oleja hem o javera Judejcia, agjar so olengoro dujmujalipa cidingele hem e Varnava.

¹⁴Koga dikhljum deka na džana pravo sprema o čačipa taro Evangelie, vakjergjum e Kifaske anglo sarine: „Ako tu, koj sijan Judejco, živineja sar o narodo so nae Evrea, a na judejsko, sar šaj te čhive e narodon te živinen judejsko?

¹⁵Amen sijem bijame Judejcia, a na grešnikja taro narodia koj na pendžarena e Devle. ¹⁶Ama pošto džanaja deka o manuš na opravdinela pes taro dejlja e Zakoneskere, nego samo preku i vera ko Isus Hristos, hem amen poverujngem ko Hristos Isus, za da te opravdina amen tari vera ko Hristos, a na taro dejlja e Zakoneskere; soske taro dejlja e Zakoneskere nae te opravdinelpe nitu jek manuš.

¹⁷Ako hem amenda, o Evrea, mangipaja te opravdina amen ko Hristos, arakhlisalilem „grešnikja,“ dali tano togaš o Hristos služiteli e grevoskoro? Dur taro odova! ¹⁸Soske ako palem zidinava okova so rušingjumle, sikavava man sar okova so phagela o Zakoni, ¹⁹soske me muljum preku o Zakoni baši o Zakoni, za da te živinav baši o Devel. ²⁰E Hristoja sijum kovimo ko krsto; hem me vekje na živinava, nego o Hristos živinela ki mande; a o životo so akana živinava ko telo, živinava preku vera e Devleske ko Čhavo, Koj zamanglja man hem predajngjape pes baši mange. ²¹Na čhivava ki strana e Devleskiri blagodat, soske ako i pravda avela preku o Zakoni, togaš o Hristos mulo ko čučo.“

*Stiho 9 hem 11: O Kifa talo o Petar.