Galatjajna 3

O čhave e verakere

¹O bigogjakere Galatjajna! Koj magepsingja tumen, anglo kaskere jajkha o Isus Hristos tano jasno crtimo sar raspnimo? ²Mangava samo akava te sikljovav tumendar: dali primingen o Duho upri osnova e delongiri e Zakoneskiri ili preku šuniba veraja?

³Doborom li sijen bigogjakere? So počmingja e Duhoja, akana korkori završinena e teloja? ⁴Dali doborom but cidingen ko čučo? Akoj tano čače ko čučo! ⁵A Okova, Koj dela tumen Duho hem kjerela silna dejlja ki tumende, dali kjerela odova upri osnova e delongiri e Zakoneskiri ili preku šuniba veraja?

⁶Sar so hem o Avraam ‘poverujngja ko Devel hem odova računisalilo leske baši pravednost.’ ⁷Hem agjar, priznajnen deka e Avraameskere čhave tane okola, kola tane tari vera. ⁸A hem o Sveto Pismo predvidingja, deka o Devel preku i vera opravdinela e narodon, hem angleder navestingja o Evangelie e Avraameske: ‘Ki tute ka oven blagoslovime sa o narodia.’ ⁹Hem agjar, okola, koj verujnena tane blagoslovime zaedno e verno Avraameja.

O Hristos kingjamen

¹⁰Ustvari koj kjerena o dejlja e Zakoneskere, teli kletva tane, soske tano pišimo: ‘Prokleto te ovel sekoj, koj nae tano postojano ko sa soj tano pišimo ko Lil e Zakoneskoro, te ispolninel odova.’ ¹¹A deka nikoj nae tano opravdimo anglo Devel preku o Zakoni, jasno tano, soske ‘o pravedniko ka živinel tari vera.’ ¹²A o Zakoni nae tano tari vera, nego phenela: ‘Koj ispolninelalen, ka živinel preku olende.’

¹³O Hristos kingjamen taro prokletstvo e Zakoneskoro, otkoga ulo prokletstvo baši amenge, soske tano pišimo: ‘Prokleto te ovel sekoj, koj visinela ko kaš!’ ¹⁴Ta e Avraameskoro blagoslov te avel e narodonge ko Hristos o Isus, hem te priminale preku i vera o vetuvanje e Duhoskoro.

O Zakoni sine amaro vospituvači

¹⁵Phrajljalen, kjerava lafi manušikane: o zavet so manuš potvrdingjale, nikoj na otfrlinelale, nitu dodajnela leske nešto. ¹⁶A o vetuvanja sine lenge dende e Avraameske hem oleskere potomstvoske. O Sveto Pismo na vakjerela baši potomstvia, sar bute dženenge; nego sar jekeske: ‘hem baši tlo Potomstvo,’ Koj tano o Hristos.

¹⁷Vakjerava hem akavada: o Zakoni so ulo palo štaršelu hem trijanda berš, na poništinela o zavet, kova o Devel potvrdingjale angleder, nitu poništinela o vetuvanje. ¹⁸Soske, ako o nasledstvo avela taro Zakoni, odova vekje nae tano taro vetuvanje; ama o Devel podaringja e Avraameske preku vetuvanje.

¹⁹Togaš, soske tano o Zakoni? Ovi tano opredelimo ko posredstvo e angelencar, vasteja taro jek posredniko, pa tano dodajmo baši o prestapia, dži kote na avela o Potomok, Kaske tano dendoj o vetuvanje. ²⁰Posredniko pak nae athe, kote soj tano samo jek; a o Develi tano jek.

²¹Spored odova, dali tano o Zakoni protiv baši e Devleskere vetuvanja? Dur taro odova! Soske, ako sine dendo Zakoni, so šaj te del život, togaš čače o pravednost bi ovela taro Zakoni, ²²ama o Sveto Pismo sarinen phanljalen telo grevo, hem upri osnova i vera ko Isus Hristos o vetuvanje te ovel dendo okolenge, koj verujnena.

²³A pred te avel i vera, sijem sine teli straža e Zakoneskiri, phanle, dži ko vreme e verakoro koja trebela sine te otkrinelpe. ²⁴Agjar, o Zakoni sine amaro vospituvači dži ko Hristos, za da te opravdinamen preku vera. ²⁵A akana ali i vera, hem na sijem poviše telo vospituvači.

Čhave Devleskere preku vera ko Hristos

²⁶Soske, sarine sijen Devleskere čhave preku vera ko Hristos Isus, ²⁷soske sarine, kola krstingen tumen ko Hristos, uragen tumen ko Hristos. ²⁸Nae vekje ni Judejco ni Grko, nae vekje ni robo ni slobodno, nae vekje ni murš ni džuvli, soske sare tumen sijen jek ko Hristos Isus. ²⁹Ako sijen pak tumen e Hristoskere, togaš sijen e Avraameskoro seme, naslednikja palo vetuvanje.