Galatjajna 4

Čhave hem naslednikja

¹Vakjerava tumenge palem, dži kote tano o nasledniko maloletno, ništoja na razlikujnela pes taro robo, iako tano gospodari ko sa. ²Nego tano telo manuša so grižinenape leske hem upravinena dži ko roko opredelimo taro dad.

³Agjar hem amenda, dži kote sijem sine maloletna, sijem sine zarobime teli vlast taro sile akale svetoskere; ⁴a koga alo o vreme, o Devel bičhagja Ple Čhave, bijamo tari džuvli, bijamo telo Zakoni, ⁵za da te kinel okolen koj tale telo Zakoni, te posvoinel amen te kjerel amen to ova e Devleskere Čhave. ⁶A pošto sijen čhave, o Devel bičhagjale ko tumare srcia: o Duho Ple Čhaveskoro, Koj vikinela, „Abba, mo dad!“ ⁷Odoleske povekje na sijan robo, nego čhavo; a ako sijan čhavo, togaš sijan nasledniko so ka nasledine taro Devel preku o Hristos.

O Pavle dži ko Galatjajna ponovo ma te služinen sar robia

⁸Ama tumen poangle, na pendžarena sine e Devle, služinena sine sar robia e devlenge, kola ki priroda nae devejlja. ⁹A akana, koga pendžarena e Devle, ili panda pošukar: otkoga o Devel pendžargja tumen – sar šaj palem te iranen tumen ko slaba hem bedna svetovna bukja, kaske so mangena palem ponovo te služinen sar robia? ¹⁰Pazinena ko dive, hem masekja, vremia, hem berša. ¹¹Darava baši tumenge, te na trudingjum man ko čučo baši tumenge. ¹²Molinava tumen phrajljalen, oven sar so sijum me, soske hem meda sijum sar tumende! Tumen ništoja na navredingen man.

¹³A džanena deka prvo puti koga propovedingjum tumenge o Evangelie, ko telo sijum sine slabo hem na sine man sila; ¹⁴a ko sa odova so sine man ko mo telo, na pelen ko iskušenie, na dikhlen man but tele, nitu gadongen tumen olestar, nego primingen man sar Devleskoro angeli, sar o Hristos Isus. ¹⁵Akana, kaj tani adaja radost? Soske uverimo sijum sine ki tumende, deka koga bi šaj sine, bi ikavena tumare jajkha hem bi dena man sine olen mange. ¹⁶Dali uljum dušmani baši odova, so vakjerava tumenge o čačipe?

¹⁷Ola na prastana šukar nameraja ki tumende, nego mangena te odvojnen tumen mandar, za da te pridobinen tumen te prastan baši olenge. ¹⁸Ama šukari odova uvek te prastan baši šukaripa, a na samo koga sijum me uza tumende.

¹⁹Me čhavalen, baši tumenge palem nakhava taro e bijanibaskere muke dži kote o Hristos bajrola ki tumende, ²⁰hem bi mangava te ovav akana uza tumende, hem pojaver glasoja te kjerav lafi, soske na sijum sigurno ki tumende.

I Sluginka hem i Slobodno

²¹Vakjeren mange, tumen, koj mangena te oven telo ko Zakoni: zarem na šunena so vakjerela o Zakoni? ²²Ko Sveto Pismo pišinela deka o Avraam sinele duj čhave: jek tari sluginka, a o javer tari slobodno. ²³Ama okova, tari sluginka, bijamo tano sprema ko telo, a okova tari slobodno preku o vetuvanje e Devleskoro.

²⁴Akavaj tano vakjerdo slikovito: odola džuvlja tale o duj zavetia; jek tari gora Sinaj, koj bijanela baši ropstvo; hem odovaj tano i Agara, ²⁵soske i Agara tani i Sinajsko Gora ki Arabija, hem odgovorinela ko avdisutno Erusalim, koj ko ropstvo pe čhavencar. ²⁶Ama o nebesno Erusalim tano slobodno, ov tano amari daj, ²⁷soske tano pišimo:

²⁸Hem tumen sijen, phrajljalen, čhave taro vetuvanje sar o Isak. ²⁹Hem sar so nekogaš okova, koj bijasalilo sprema ko telo, maltretirinela paldela sine okole, koj bijasalilo palo Duho, agjar tano hem akana.

³⁰A so vakjerela o Sveto Pismo? ‘Palde e sluginka hem lakere čhave, soske o čhavo e sluginkakoro nae te nasledinel e čhaveja tari slobodno!’ ³¹Odoleske, phrajljalen, amen na sijem čhave e sluginkakere, nego e slobodnakere.