Galatjajna 5

Oslobodingja amen o Hristos

¹O Hristos oslobodingja amen te ova slobodna. Sprema odova, tergjoven cvrsto hem ma peren palem telo ropstvo hem leskoro pharipa.

²Akje, me, o Pavle, vakjerava tumenge: ako obrezinena tumen, o Hristos nikako nae te koristinel tumenge. ³Hem palem svedočinava sekole manušeske, koj obrezinelape, dekaj tano dolžno te ispolninel celo Zakoni. ⁴Odvojngen tumen taro Hristos tumen, koj mangena te opravdinen tumen preku o Zakoni; prepelen tari blagodat.

⁵Soske amen nadinaja amen hem očekujnaja te opravdina amen tari vera, preku o Duho. ⁶Soske ko Hristos Isus nitu o obrezime isi vrednost, nitu o biobrezime, nego i vera, koja sikavelape preku mangipe.

⁷Prastandilen šukar! Koj čhinagja tumen te na oven poslušna e čačipaske? ⁸Odova so ubedinge tumen te ciden tumen nae tano taro Okova, koj vikingja tumen. ⁹Hari kvasac ušljola celo testo. ¹⁰Me sijum uverimo baši tumenge ko Gospodari, deka nae te mislinen pojaver. A koj buninela tumen ka pretrpinel osuda, koj hem te ovel!

¹¹Ako me, phrajljalen, panda propovedinava o obrezanie, deka mora te kjerelpe, togaš soske panda maltretirinena man? Ko odova način togaš čhinagjovela o soblazniba baši o krsto! ¹²O, te čhingjoven sine okola, koj buninena tumen!

¹³Soske tumen, phrajljalen, vikime sijen ki sloboda; samo i sloboda te na ovel te koristinenla baši te ugodinen tumare teloske, nego mangipaja služinen jek jekeske. ¹⁴Soske celo Zakoni tano ispolnimo ko jek lafi: ‘Mang te paše sar korkori tut!’ ¹⁵Ako palem kcinena tumen hem hana tumen jek jekeja, pazinen te na uništinen tumen jek jekeja.

Džan palo Duho

¹⁶A vakjerava: džan palo Duho hem nae te ispolninen o strastia e teloskere, ¹⁷soske o telo mangela protiv o Duho, a o Duho protiv o telo; soske o Duho hem o telo protivinenape jek jekeja, za da te na kjeren odova, tumen so mangena. ¹⁸Ama, ako o Duho vodinela tumen, na sijen telo Zakoni.

¹⁹A o dejlja e teloskere pendžarde tane: odolaj tale: bludstvo, melale bukja, bizoladž, ²⁰idolopoklonstvo, magije, dušmanluko, kavge, ljubomora, holi, mislinena samo baši peske, ulavde maškar peste, bangoveruvanje; ²¹zavist, mudariba, matiba, ladžutne veselbe, hem slična akalenge, baši kolenge vakjerava tumenge angleder, sar so vakjergjum tumenge porano: deka okola, kola kjerena asavke bukja, nae te nasledinen e Devleskoro carstvo.

²²A o plodi e Duhoskoro tano o mangipa, o radost, o mir, o trpenie, o ljubeznost, o šukaripa, o vernost, ²³o krotost, i samokontrola; nae zakoni protiv asavke bukja.

²⁴A okola koj tane e Hristoskere kovinge plo telo oleskere strastencar hem pohote. ²⁵Ako isi amen životo preku o Duho, valjani hem te dža palo Duho! ²⁶Te na ova pherde odoleja te dikha amen ko pobare e javerendar te falina amen korkori! Te na izazivina amen jek jekeja! Te na zavidina amen jek jekeja!