Jakov 2
Ma dikhen koj tano koj
1Mle phrajljalen, neka oveltumen vera ko amaro slavno Gospodari o Isus Hristos, na te dikhen koj tano koj! 2Soske ako ko tumaro sobranie alo manuš zlatno angrustikaja hem svetlo šeencar, a khuvela hem čorolo ko bedna šeja, 3pa dikhena ko okova, ko svetla šeja, hem vakjerena leske: „Tu beš akate šukar!“ a e čoroleske vakjerena: „Tu tergjov athe!“ ili „Beš telo me pre,“ 4na kjerena li razlika maškar tumende hem agjar ulen sudie bilačhe pomislencar?
5Šunen, mle mangle phrajljalen, na izbiringja li o Devel okolen, koj tane čorole anglo sveto, za da te oven barvale ki vera hem naslednikja e Carstvoske, koj vetingja lenge okolenge, koj mangenale? 6A tumen uvredžingen e čorole! Nae li o barvale odola, koj maltretirinena tumen hem vlečinena tumen ko sudie? 7Na hulinena li ola o šukar anav koleja sijen narečime?
8Ako pak ispolninena o carsko zakoni spored o Sveto Pismo: ‘Mang tle pašutne sar korkori tut!’ – šukar kjerena. 9Ama ako dikhena ko muj, kjerena grevo hem o zakoni osudinela tumen sar okola so phagena o zakoni.
10Soske koj pazinela celo zakoni, a sopninelape samo ko jek, ovela krivo baši o sa. 11Soske Okova Koj vakjergja: ‘Ma kjer preljuba!’ vakjergja hem: ‘Ma mudar!’ Ako na kjereja preljuba, a mudareja, oveja sar okova so phagela o zakoni.
12Agjar kjeren lafi hem agjar postapinen sar manuša, koj ka oven osudime palo zakoni e slobodakoro. 13Soske o sudo naele milost ko okova, koj na sikagja milost. I milost slavinela pobeda upro sudo.
I vera hem o dejlja
14Savi tani i polza, mle phrajljalen, ako nekoj vakjerela deka isile vera, a naele dejlja? Šaj li i vera te spasinele? 15Ako nesavo phral ili phen tane nange hem bizo te ovelen hajbaske sekova dive, 16pa nekoj tumendar vakjerela lenge: „Džan tumenge ko mir, takjoven hem čajljoven!“ a na delalen odova, soj tano olenge potrebno baši telo, savoj tano o korist? 17Agjar hem i vera: ako naela dejlja, muli tani korkori ki peste.
18Ama ako nekoj vakjerela: tut isitut vera, a man isiman dejlja. Sikav mange tli vera bizo dejlja, a me ka sikavav tuke i vera taro mle dejlja. 19Tu verujneja deka isi samo jek Devel. Šukar kjereja; hem o demojna verujnena hem treperinena.
20Mangeja li palem te džane, suetno manušeja, deka i vera bizo dejlja tani muli? 21Amaro dat o Avraam na sine li opravdimo taro dejlja, koga dengja ko žrtveniko ple čhave e Isako? 22Dikheja deka i vera kjergja buti oleskere deloncar, hem deka i vera preku dejlja reslja dži ko sovršenstvo. 23Hem agjar ispolningjapes o Sveto Pismo, koj vakjerela: ‘O Avraam poverujngja ko Devel, hem odova računisalilo leske baši pravda, hem vakjersalilo Devleskoro amal.’ 24Dikhena deka o manuš opravdinelape preku dejlja, a na samo preku i vera. 25Isto agjar hem i bludnica Raav na opravdingjapes li preku dejlja, koga primingja e izraelsko poslanikon hem koga bičhagjalen palo javer drumo? 26Ustvari, sar soj tano o telo bizo duho mulo, agjar hem i vera bizo dejlja tani muli.