E Devleskiri tajna, kojaj tani o Hristos

¹Mangava te džanen kobor borba isi man baši tumenge, hem baši okola ki Laodikija, hem baši sa okola koj so dži akana na dikhlepe mancar. ²Odova so mangava te kerav tano te ohrabrinav len, te oven phanle ko mangipe, celosno te hajloven e Devleskiri tajna, a odovaj tano o Hristos, za da te hajloven savo barvalipa tano o manuš te ovele odoja sigurnost. ³Ko Hristos tane garavde sa o barvalipe tari mudrost hem e džandipaskoro.

⁴A akava vakerava za da te na hovavel tumen nekoj te ubedinel tumen lafencar. ⁵Soske iako na sijum tumencar ko telo, ko duho sijum tumencar, hem radujnava pes dikhibaja tumaro redo hem tumari vera kozomi cvrsto ko Hristos.

Koj tano Šero sekole načalstvoske hem vlast

⁶Hem agjar, sar so primingen e Hrista Isuse o Gospodari, agjar hem te živinen ki Leste: ⁷korejna te muken ki Leste, hem te gradinen tumen ki Leste, hem zacvrstime ki vera, sar so sijen sikavde, hem izobilno te blagodarinen.

⁸Pazinen te na phandel tumen nekoj filosofijaja hem ko čučo te hovavel tumen, sprema o običaj manušikano, sprema o živiba e svetoskoro, a na sprema o Hristos. ⁹Soske ki Leste živinela ko telo celosno e Devleskiri priroda, ¹⁰hem tumen sijen celosno pherde ki Leste, Koj tano Šero baši sekova načalstvo hem vlast.

¹¹Ki Leste sijen obrezime so nae manušikane vasteja, nego palo obrezanie e Hristoskoro, koleja so cidingja tumendar e grevoskoro telo, ¹²otkoga sijen sine parume Oleja ko krštevanje, koleja hem voskresningen Oleja preku i vera e Devleskere silaja so kerela buti, Koj voskresningjale taro mule.

¹³Tumen koj sijen sine mule baši tumare grevia hem koj sijen sine biobrezime ko tumaro telo, Ov dživde kergja tumen akana zaedno Oleja, hem oprostingja sa amare grevia. ¹⁴O Devel brišingja o spisako kote so sine amare bordžia, amen sijem sine bordži odoleja so sijem sine phanle te ikera len sa odola pravila, so sine protiv amenge; Ov cidingjale amendar adava spisako, leljale hem kovingjale ko krsto. ¹⁵Hem pejljakergja sa i sila taro načalstvia hem vlastia, hem javno ladžakergja len te dikhen len sarine, pobedibaja upreder olende preku o krsto.

¹⁶Hem agjar, nikoj te na osudinel tumen baši hajba, ili baši piba, ili disave praznikoske, ili baši terni mesečina, ili baši i sabota. ¹⁷Sa akala bukja tane samo senka baši so ka avel, a o čačikano tano o Hristos. ¹⁸Ma hovavgjoven nekoj te cidel tumen tari tumari nagrada, odoleja so nekoj kerelape ponizno hem služinela e angelenge, hem deka ole isile disave videnia hem odoleja vazdelape ko čučo ple telesno gogjaja, ¹⁹a na ikerela pes ko Šero, taro Kova celo Telo tano cvrsto phanlo hem pomožimo taro zglobia hem ligamentia, hem bajrola baripaja, kova dela o Devel.

²⁰Hem agjar, tumen mulen e Hristoja hem oslobodime sijen taro asavko životo so živinena e svetoskere manuša. Soske togaš dozvolinena te čhivel pes tumenge pravila, sar te živinelpe ko sveto: ²¹„Ma astar! Ma ukusin! Ma pipin!“ ²²Sa akala pravila tane čhivde sprema manušikano učenje hem zapovedia hem kerelape lafi baši bukja so rumingjovena hem trošingjovena. ²³Iako dikhjovena akala pravila sar mudra, pobožna hem ponizna, odoleja so tumen dena baro zori hem mučinena tumaro telo, a ustvari nae len nisavi sila ili vrednost ko odova, za da te šaj te smeninen e manušeskere grešna strastia so isile ko telo.