Mislinen baši odova soj tano upre

¹Hem agjar, ako voskresningen e Hristoja, roden odova soj tano upre – kote so o Hristos bešela desno taro Devel. ²Mislinen baši odova soj tano upre, na baši odova soj tano ki phuv, ³soske tumen mulen hem tumaro životo tano garavdo e Hristoja ko Devel! ⁴A koga ka pojavinel pes o Hristos, Koj tano amaro životo, togaš hem tumenda ka pojavinen tumen Oleja ki slava.

⁵Hem agjar, mejrakeren tumare teloskere bilačhe bukja soj tane ki phuv: o bludstvo, o melale bukja, i strast, i bilačhe želba, hem o alčnost, soj tano idolopoklonstvo, ⁶baši akala bukja avela e Devleskiri holi upral o čhave so na mangena te šunen e Devle. ⁷Agjare hem tumenda nekogaš gelen, koga živinena sine sprema tumare teloskere bilačhe bukja. ⁸Ama akana frden tumendar sa akala bilačhe bukja: i holi, o holjaniba, o bilačhipa sprema nekaste te na ovel tumen, te na vakeren bilačhe phare lafia e Devleske, te na ikaven ladžutne lafia taro tumaro muj.

⁹Ma hovaven tumen jek javereja, soske huljagen o purano manuš oleskere deloncar ¹⁰hem uragen tumen ko nevo, kova sekova puti obnovinena tumen so poviše celosno za da te pendžarenle, hem te oven sar o Isus so sine so živingja, Koj sozdajngja i nevi priroda ki tumende, ¹¹kote nae vekje Grko ni Judejco, obrezime hem biobrezime, varvarin,* Skit,* robo, slobodno, nego o Hristos tano sa hem ko sa.

¹²Hem agjar, uraven tumen sar Devleskere izbirime, sveta hem mangle, kovle srceja, gudle, smirime, krotka, trpeliva! ¹³Trpinen tumen jek javereja hem oprostinen tumenge jek jekeske, ako nekoj isi so rovelape protiv nekaste, oprostinen tumenda leske, sar so hem o Gospodari oprostingja tumenge! ¹⁴A upreder o sa odova uraven tumen ko mangipe, koj phandela sa ko sovršenstvo! ¹⁵Hem e Hristoskoro mir te vladinel ko tumare srcia, baši kaste vikime sijen ko jek telo, hem oven blagodarna!

¹⁶E Hristoskoro slovo te živinel izobilno ki tumende, ki sekoja mudrost sikljoven hem opomeninen tumen jek jekeja psalmencar, himne, duhovna gilja, giljajbaja e Gospodareske blagodarna ko tumare srcia. ¹⁷Hem sa so kerena lafeja ili ko delo, keren sa ko anav e Gospodareske e Isuseske, blagodarinen e Devleske o Dad, preku Oleste.

Sar valjani te oven

¹⁸Romnalen, pokorinen tumen tumare romenge, sar so bešela ko Gospodari!

¹⁹Romalen, mangen tumare romnen hem ma oven gruba sprema lende.

²⁰Čhavalen, šunen tumare roditelen ko sa, soske odovaj tano ugodno e Gospodareske!

²¹Dadalen, ma zadinen tumare čhaven, za da te na razočarinen len te našaven pi vojlja.

So hem da te keren, kerenle tari duša

²²O tumen so sijen robia, šunen len ko sa tumare phuvjakere gospodaren, na samo angla ko jajkha lengere sar okola koj ugodinena e manušenge, nego čisto srceja daraja taro Devel.

²³So hem da te keren, kerenle tari duša sar baši e Gospodareske, a na baši o manuša, ²⁴džandipaja deka ka priminen sar nagrada taro Gospodari nasledstvo. Služinen e Gospodareske o Hristos! ²⁵Soske, koj kerela nepravda, ka iranelpe leske obratno i nepravda, hem na dikhelape koj tano koj.

*Stiho 11: Varvarin značinela jek manuš odova vreme so o Grcia dikhenale sine but tele hem so nae civilizirimo, na džanela i grčko čhib. A panda potele sine adava vreme jek narodo o Skitia.