O propoved taro Jovan Krstitel

¹O početok taro Evangelie e Isuse Hristoskoro, e Devleskoro Čhavo. ²Sar soj tano pišimo ko prorokja:

‘Ekje, Me bičhavava Mlo glasniko anglo Tlo muj,
koj ka spreminele Tlo drumo.’
³‘O glaso okoleskoro, koj vikinela ki pustina:
„Spreminen o drumo e Gospodareskoro,
keren ramna o drumia Oleskere.“’

⁴Javingja pes o Jovan, krstibaja ki pustina hem propovedibaja baši o pokajanie hem o krštevanje baši te oprostinenpe o grevia. ⁵Hem ikljola sine ki leste celo Judejsko phuv hem sa o erusalimcia; hem ov krstinela len sine ki reka Jordan, ko so ola ispovedinena sine pe grevia.

⁶A o Jovan sine uravdo ko šeja tari kamilakere bala hem sinele kožno pojas okolu pi polovina, hem hala sine skakulcia hem divo avgin. ⁷Hem propovedinela sine, vakeribaja: „Palo mande avela Posilno mandar; anglo Kaste na sijum dostojno te tejljovav hem te phravav Leskere kaišia Oleskere sandalendar. ⁸Me krstingjum tumen ko pani, a Ov ka krstinel tumen ko Sveti Duh.“

E Isuseskoro krštevanje hem iskušenie

⁹Hem ko odova vreme, o Isus alo taro Nazaret ki Galileja, hem o Jovan krstingjale ko Jordan. ¹⁰Hem odma, dži kote ikljola sine taro pani, dikhlja: sar phravdile o nebesia hem o Duho sar hulela upro Leste sar gulubi. ¹¹Hem šungja pes glaso taro nebo: „Tu sijan Mo manglo Čhavo; ki Kaste tani Mi milina!“

¹²Odma palo odova o Duho ingargjale ki pustina. ¹³Hem sine ki pustina saranda dive, iskušimo taro satana. Hem sine maškar o zvejra; hem angejlja služinge Leske.

O Isus vikinela e prvo učenikon

¹⁴A otkoga o Jovan sine predajmo, o Isus alo ki Galileja, propovedibaja e Devleskoro Evangelie. ¹⁵Hem vakerela sine: „O vreme pherdilo, hem alo paše e Devleskoro carstvo; pokajnen tumen hem verujnen ko Evangelie!“

¹⁶Hem koga džana sine uzo Galilejsko More, dikhlja e Simone hem e Andreja, o phral e Simoneskoro, sar frdena i mreža ko more, soske sine ribajra astarena sine mačhen. ¹⁷Hem o Isus vakergja lenge: „Aven pali Mande hem Me ka kerav tumen te astaren manušen!“ ¹⁸Hem odma mukle o mreže hem cidinge palo Leste.

¹⁹Hem koga nakhlja hari poadari dikhlja: e Jakove, e Zavedeskere čhave hem oleskere phrale o Jovan sar namestinena o mreže ko brodi; ²⁰hem odma vikingja len, hem ola mukle pe dade e Zavedeje e rabotnikoncar ko brodi, hem cidinge palo Leste.

E Isuseskoro propoved hem o čudia ko Kapernaum hem ki Galileja

²¹Hem ale ko Kapernaum hem odma ki sabota, khugja ki sinagoga hem sikavela sine. ²²Hem čudinenape sine Oleske baši odova so sikavela len, soske sikavela len sine sar Okova, Koj isile vlast, a na sar o knižnikja.

²³Togaš ki olengiri sinagoga sine manuš, so sine astardo taro nečisto duho, hem vikingja, ²⁴vakeribaja: „Ah! So isi amen amen Tuja, Isuse taro Nazaret? Dali aljan te uništine amen? Džanava Koj sijan Tu: Okova Koj Sveto tano e Devleske!“

²⁵Hem o Isus vikingja leske: „Kjutin hem ikljov olestar.“ ²⁶Hem o nečisto duho tresingja e manuše, vikingja bare glasoja hem iklilo lestar.

²⁷Hem sarine začudinge pes, agjar so pučenape sine jek javereja, vakeribaja: „Soj tano akava? Nevi nauka – pherdi silaja! Zapovedingja lenge hem e nečisto duhonge hem ola pokorinena pes Leske!“ ²⁸Hem odma širisalilo glaso baši Leste ko sa o strane, ki celo Galilejsko okolina.

²⁹Hem štom iklilo tari sinagoga, zaedno e Jakoveja hem e Jovaneja alo ko kher e Simoneske hem e Andrejeske. ³⁰A e Simoneskiri sasuj pašljola sine tari treska, hem odma vakerge Leske baši late. ³¹Ov alo lake paše, astargjala taro vas hem vazdingjala; hem i treska mukljala, pa služingja lenge.

³²A akšameskoro, palo kham koga pelo, ange Leske sa e nasvalen hem astarde taro demojna, ³³hem celo diz khedingja pes anglo vudara. ³⁴Hem saskjargja buten, koj cidena sine taro razna bolestia; hem paldingja but lošna duhia, hem na muklja lenge e demonenge te keren lafi, soske džanenale sine.

³⁵A sabaleskoro, dži kote panda sine karanluko, uštilo, iklilo hem gelo ko pusto than, hem odothe molinelape sine. ³⁶A o Simon hem okola, koj so sine oleja, gele pali Leste te rodenle, ³⁷hem koga arakhlele, vakerge Leske: „Sarine rodena Tut!“

³⁸Hem vakergja lenge: „Te dža ko javera paše gava, te propovedinav hem odori, soske odoleske hem ikliljum.“ ³⁹Hem alo, propovedibaja ko olengere sinagoge ki celo Galileja, hem paldibaja o nečista duhia.

O Isus saskjarela e manuše tari leproza

⁴⁰Hem alo ki Leste jek leprozno, molinelale sine hem ko kočaka tele, vakerela sine Leske: „Ako mangeja, šaj te očistine man.“

⁴¹Hem sinele žal baši leske, pružingja Plo vas, astargjale hem vakergja leske: „Mangava! Ov čisto!“ ⁴²Hem odma i lepra geli peske lestar hem ulo čisto.

⁴³Hem strogo opomeningjale, hem odma bičhagjale, ⁴⁴hem vakergja leske, „Dik, nikaske ništo te na vakere! Nego dža, sikav tut e sveštenikoske, hem prinesin odova, so zapovedingja o Mojsej baši so očistingjan tut – baši svedoštvo lenge.“

⁴⁵A ov, štom gelo peske, počmingja te šujnakerel but hem te vakerel so ulo leja, agjar so o Isus našti sine vekje javno te ikljol ki diz; nego sine avrijal tari diz, ko pusta thana; a taro sa o strane avena sine ki Leste.