Brako hem razvod

¹Hem uštilo odothare hem alo ko kraja ki Judeja, tari okoja strana e Jordanestar; hem palem o narodo ale hem khedingepe uzi Leste, a Ov sikavela len sine, sprema Plo običaj,

²hem ale Leske o farisea hem pučlele, za da te iskušinenle: „Dozvolimoj li tano e romeske te mukel e romnja?“

³A Ov vakergja lenge: „So zapovedingja tumenge o Mojsej?“

⁴Ola vakerge: „O Mojsej dozvolingja te pišinel pes lake razvodno lil hem te mukel pes.“

⁵Ama o Isus vakergja lenge: „Baši tumaro zakoravimo srce – ov pišingja tumenge odoja zapoved. ⁶Ama, ko početok taro sozdavanje, o Devel ‘kergja len: murš hem džuvli. ⁷Odoleske o manuš ka mukel pe dade hem pe daja hem ka prilepinel pes uza ki pi romni; ⁸hem solduj džene ka oven jek telo.’ Hem agjar, nae tane vekje duj – a jek telo. ⁹Hem agjare, o Devel so kergja jek, o manuš te na razdelinel.“

¹⁰Hem khere, o učenikja palem pučlele baši odova. ¹¹A Ov vakergja lenge: „Koj ka mukel pe romnja hem ženinela pes javeraja, kerela preljuba sprema late. ¹²Hem ako oj mukela e rome hem ženinela pes javereske, kerela preljuba.“

Muken e čhaven te aven ki Mande

¹³Hem anena sine Leske čhaven, za da te doprinel len, a o učenikja braninena len sine.

¹⁴A koga o Isus dikhlja odova, na osetingjape fino, hem vakergja lenge: „Muken e čhaven te aven ki Mande; ma braninen olen; soske asavkenge pripadinela e Devleskoro carstvo! ¹⁵Čače vakerava tumenge, koj na priminela e Devleskoro carstvo sar jek tikno čhavo, nae te khuvel ki leste.“ ¹⁶Hem gušingja e čhaven hem blagoslovingja len, čhigja Pe vasta upri lende.

O barvalo čhavo

¹⁷Hem koga ikljola sine ko drumo, nekoj prastandilo, pelo ko kočia angli Leste hem pučljale: „Šukar Učitele, so te kerav, za da te nasledinav večno životo?“

¹⁸A o Isus vakergja leske: „Soske vakereja Man šukar? Nikoj nae tano šukar osven jek Devel. ¹⁹Džaneja o zapovedia: ‘Ma mudar! Ma ker preljuba! Ma čor! Ma svedočin hovavno! Ma ker izmama! Poštojn te dade hem te daja!’“

²⁰Ama ov odgovoringja Leske: „Učitele, sa odova pazingjumle taro mlo ternipe.“

²¹A o Isus dikhljale, zamangljale, hem vakergja leske: „Jek falinela tuke: dža, bikin sa so isi tut, hem de e čorolenge hem ka ovel tut barvalipe ko nebo! Hem ava, le o krsto hem sledin Man.“

²²A ov razočaringjape taro odova lafi hem gelo peske tužno, soske sinele but barvalipe.

²³Hem o Isus dikhlja okolu Peste hem vakergja Ple učenikonge: „Kobor pharo ka khuven o barvale e Devleske ko carstvo.“

²⁴A o učenikja čudinge pes taro Oleskere lafia.

Ama o Isus palem lelja te kerel lafi hem vakergja lenge: „Čhavalen, kobor tano pharo te khuven e Devleske ko carstvo, okola so nadinena pes ko barvalipe! ²⁵Polokhoj tano e kamilake te nakhel maškar e suvjakere kana otkolku o barvalo te khuvel e Devleske ko carstvo!“

²⁶A ola začudinge pes panda poviše, vakeribaja jek javereske: „Togaš koj šaj te spasinel pes?“

²⁷O Isus dikhlja len hem vakergja lenge: „Baši o manuša odova nane vozmožno, ama na hem baši o Devel; soske baši o Devel saj tano možno!“

²⁸O Petar počmingja te vakerel Leske: „Dik, amen muklem sa hem džaja pali Tute!“

²⁹O Isus odgovoringja lenge: „Čače vakerava tumenge: nae asavko nikoj koj ka mukel kher ili phralen, ili phejnen, ili daja ili dade, ili čhaven, ili nive, baši Mange hem baši o Evangelie, ³⁰a te na priminel, akana šelkratno, ko akava vreme: khera hem phrajlja hem phejna, hem daja hem čhave hem nive, zaedno e maltretiribaja – a ko poadari vreme so ka avel: večno životo. ³¹Ama but džene soj tane prva ka oven posledna, a o posledna ka oven prva.“

³²A koga džana sine ko drumo uklindor ko Erusalim, o Isus džala sine angleder o učenikja, hem čudinena pes sine Leske; a o narodo koj džana sine pali Leste darana sine. Hem palem khedingja e Dešuduje Dženen hem počmingja te vakerel lenge so ka ovel Oleja: ³³“Eke, džaja upre ko Erusalim hem o Manušikano Čhavo ka ovel predajmo e glavno sveštenikonge hem e knižnikonge hem ka osudinenle ko meribe, hem ka predajnenle e narodonge so verujnena ko but devejlja; ³⁴hem ka asanle, ka čhungarenle, ka kamšikujnenle hem ka mudarenle, a Ov palo trin dive ka voskresninel.“

³⁵Hem ale Leske o Jakov hem o Jovan, e Zavedeskere čhave, hem vakerge Leske: „Učitele, so ka roda Tutar, mangaja te kere amenge.“

³⁶O Isus pučlja len: „So mangena te kerav tumenge?“

³⁷Ola pak vakerge Leske: „De amen te beša jek tari desno, a jek tari levo, uzo Tute ki Tli slava!“

³⁸A o Isus vakergja lenge: „Na džanena so rodena! Šaj li te pijenla i čaša so Me pijavala ili te krstinen tumen e krstibaja koleja Me krstinava Man?“

³⁹Ola odgovoringe Leske: „Šaj!“

Ama o Isus vakergja lenge: „Ka pijenla i čaša so Me pijavala hem ka oven krstime e krstibaja koleja Me krstinava Man; ⁴⁰ama te bešelpe tari desno ili tari levo uza Mande, odova na davale Me, a ka del pes okolenge, baši kaske tano spremimo.“

⁴¹A o deš učenikja koj šunge, počminge te holjanen protiv o Jakov hem o Jovan. ⁴²Ama o Isus vikingja len ki Peste hem vakergja lenge: „Džanena deka okola, koj računinena pes baši vladetejlja e narodongere gospodarinena upro lende; hem deka o bare manuša isi len vlast upro lende. ⁴³Ama maškar tumende nae tano agjare; a koj mangela te ovel baro maškar tumende neka ovel tumenge sluga! ⁴⁴A koj mangela te ovel prvo maškar tumende, neka ovel sluga sarinenge, ⁴⁵soske hem o Manušikano Čhavo na alo te služinen Leske, nego te služinel hem te dela Pli duša baši te platinel hem te oslobodinel bute dženen!“

O Isus saskjarela e korole

⁴⁶Hem ale ko Erihon. A koga ikljola sine taro Erihon, Ple učenikoncar hem bare gužvaja, e Timejeskoro čhavo o Vartimej, koj sine korolo hem mangela peske sine devlenge, bešela sine uzo drumo. ⁴⁷Hem štom šungja deka tano odova o Isus taro Nazaret, počmingja te vikinel hem te vakerel: „Isuse, čhavo e Davideskoro, muk Ti milost upra mande!“

⁴⁸A but džene vikinenajne leske te kjutinel, ama ov vikinela sine panda posilno: „Davideskoro Čhavo, muk Ti milost upra mande!“

⁴⁹O Isus ačhilo hem vakergja: „Vikinenle!“

Hem vikingele e korole hem vakerge leske: „Ma dara! Ušti, vikinela tut!“

⁵⁰A ov frdingja pli nametka, rupingja hem alo ko Isus.

⁵¹O Isus pučljale: „So mangeja te kerav tuke?“

A o korolo odgovoringja Leske: „Učitele, mangava te dikhav!“

⁵²Togaš o Isus vakergja leske: „Dža – ti vera spasingja tut!“ Hem o korolo odma dikhlja hem cidingja palo drumo e Isuseja.