O Isus promeningja pes celo Po muj hem Pe šeja

¹Hem vakergja lenge: „Čače vakerava tumenge – isi nesave maškar akala, koj tergjovena akate, koj nae te ukusinen o meribe, dži kote na dikhena e Devleskoro carstvo sar avela silaja.“

²Hem palo šov dive, o Isus lelja e Petare, e Jakove hem e Jovane hem ingargja len samo olen ki jek uči planina, korkori, hem promeningja pes anglo lende; ³hem Oleskere šeja ule svetla hem but parne, sar so o parnipa e phuvjakoro našti te parnarel len. ⁴Hem javingjape lenge o Ilija e Mojseja, hem kerge lafi e Isuseja.

⁵A o Petar vakergja Leske e Isuseske: „Ravi! Učitele, šukari tano te ova akate; te kera trin šatojra: jek baši Tuke, jek baši o Mojsej hem jek baši o Ilija.“ ⁶Ustvari, na džanela sine so te vakerel, soske sarine ola sine but ki dar.

⁷Hem alo oblako hem učhargja len, a taro oblako šungja pes glaso: „Akavaj tano Mlo manglo Čhavo! Šunen Ole!“ ⁸Hem taro jek puti koga dikhle okolu peste, vekje nikas na dikhle uza peste, osven e Isuse.

⁹A koga hulena sine tari gora, zapovedingja lenge nikaske te na vakeren so dikhle, dži kote o Manušikano Čhavo na voskresninela taro mule. ¹⁰Hem ola ikerenale sine cvrsto odova lafi, ama maškar peste pučenape sine so značinela te voskresninel pes taro mule. ¹¹Hem pučlele: „Soske o knižnikja vakerena deka prvo o Ilija trebela te avel?“

¹²A Ov vakergja lenge: „O Ilija ka avel prvo, hem ka anel sa ko than. A sar tano pišimo baši o Manušikano Čhavo: deka trebela but te cidel hem te ovel ponižimo? ¹³Ama, Me vakerava tumenge, deka o Ilija alo, hem kerge oleja, sar so mangle, sar soj tano pišimo baši leske.“

O Isus saskjarela e čhave astardo taro demoni

¹⁴Hem koga ale ko učenikja, dikhle but bari gužva okolu lende, hem sar o knižnikja prepirinena pes sine olencar. ¹⁵Hem štom celo gužva dikhlele e Isuse, čudinge pes, hem prastandile hem pozdravingele.

¹⁶Hem pučlja len: „Soske prepirinena tumen olencar?“

¹⁷A jek taro narodo odgovoringja Leske: „Učitele, angjum Tuke me čhave, ki kaste tano laloro duho, ¹⁸hem koga astarelale, frdelale tele, a ov mukela pena, krckinela dandencar hem zdrvinela pes. Vakergjum lenge Tle učenikonge te paldenle, ama našti sine.“

¹⁹A Ov vakergja: „O neverno porodo, dži koga ka ovav tumencar? Dži koga ka trpinav tumen? Anenle ki Mande!“

²⁰Hem angele Leske. A štom o duho dikhljale e Isuse, odma tresingjale e čhave hem ov pelo ki phuv, valkajnelape sine hem mukela pena.

²¹Togaš pučljale e dade leskere: „Kobor vreme isi sar so ovela leske akava?“

A ov vakergja: „Taro tiknipe, ²²a često frdelale ki jag hem ko pani – za da te mudarele. Ama, ako šaj nešto te kere, muk to milost amenge hem pomožin amen!“

²³A o Isus vakergja leske: „Ako šaj nešto! Sa šaj okoleske, koj verujnela!“

²⁴O dad e čhaveskoro odma vikingja hem vakergja: „Verujnava! Pomožin so nane man dovolno vera!“

²⁵A o Isus štom dikhlja deka avela narodo, zapovedingja e nečisto duhoske hem vakergja leske: „Laloro hem kašuko duho, Me zapovedinava tuke, ikljov olestar hem poviše ma khuv ki leste.“

²⁶Hem o duho vikingja hem tresingjale silno e čhave hem iklilo. Hem sine sar mulo, agjar so but džene vakerena sine deka mulo. ²⁷A o Isus astargjale taro vas, vazdingjale hem uštilo.

²⁸A koga alo ko jek kher, Oleskere učenikja pučlele koga sine korkori: „Soske amen našti sine te paldale?“

²⁹Hem odgovoringja lenge: „Akaja vrsta ništoja našti te paldel pes, osven molitvaja hem posteja.“

O Isus palem vakerela Plo meriba hem voskresenie

³⁰Hem koga gelo peske odothare, nakhle tari Galileja, hem na mangela sine nekoj te džanel baši odova; ³¹soske sikavela len sine Pe učenikon hem vakerela sine: „O Manušikano Čhavo ka ovel predajmo e manušenge ko vasta, hem ka mudarenle; hem otkoga ka mudarenle, Ov ka voskresninel ko trito dive.“ ³²Ama ola na halilele odova lafi, a darana sine te pučenle.

Koj tano o najbaro?

³³Hem ale ko Kapernaum hem koga sine ko kher, pučlja len: „Baši so rasprajngen tumen dromaldan?“ ³⁴A ola kjutinena sine, soske dromaldan rasprajnenape sine maškar peste baši odova koj tano pobaro.

³⁵Bešlja o Isus hem vikingja e Dešuduje Dženen hem vakergja lenge: „Koj mangela te ovel prvo, neka ovel posledno hem sluga sarinenge!“

³⁶Togaš lelja jeke čhave, čhigjale maškar olende, gušingjale hem vakergja lenge: ³⁷„Koj priminela jeke asavke čhave ko Mlo anav, Man priminelama, a koj priminelama Man, na priminelama Man, nego Okole Koj bičhagja Man.“

³⁸O Jovan vakergja Leske: „Učitele, dikhlem jek – koj ko Tlo anav – paldela sine bilačhe duhia, a na džala palo amende, hem zabraningem leske te kerel odova, soske ov na džala palo amende.“

³⁹A o Isus vakergja: „Ma čhinavenle! Soske nae nikoj, koj bi kerela čudo ko Mlo anav hem te šaj odma palo odova te vakerel bilačhipe baši Mange. ⁴⁰ Soske, koj nae tano protiv amende, ovi tano amencar. ⁴¹Hem koj ka del tumen čaša šudre pajneja ko Mlo anav, soske so sijen e Hristoskere, čače vakerava tumenge, nae te našavel pli nagrada.

⁴²A koj čhivela ko grevo jek taro akala tikne, koj verujnena ki Mande, baši leske tano pošukar te obesinel pes leske ki men jek bar so melinela giv, hem te ovel frdimo ko more.

⁴³Hem ako tlo vas čhivela tut ko grevo, čhinle. Pošukar tano te khuve bizo vas ko životo, otkolku duje vastencar te dža ko pekol, ki jag so na ačhola, ⁴⁴kote ‘olengoro kirmo na merela, hem i jag na ačhola.’ * ⁴⁵Ako tlo pro čhivela tut ko grevo, čhinle. Pošukari tano baši tuke te khuve ko životo sakati, otkolku duje prencar te ove frdimo ko pekol, ⁴⁶kote ‘olengoro kirmo na merela, hem i jag na ačhola.’ * ⁴⁷Hem ako tli jak čhivela tut ko grevo, ikavla! Pošukari tano baši tuke te khuve e Devleske ko carstvo jeke jajkhaja, otkolku te ove solduje jajkhencar frdimo ko pekol, ⁴⁸kote ‘olengoro kirmo na merela, hem i jag na ačhola.’ *

⁴⁹Soske sekoj ka ovel longjardo jagaja, hem sekoja žrtva ka longjarel pes londeja. ⁵⁰O lond tano šukar, ama ako o lond ovela bilondalo, soleja ka popravinenle? Neka ovel tumen lond ki tumende hem neka ovel tumen mir maškar tumende.“

*Stiho 44, 46, 48: O Isus ko akala trin stihia citirinela taro Isaija 66:24.