O Isus saskjarela e manuše so sine šuke vasteja

¹Hem khugja palem ki sinagoga, a odothe sine manuš šuke vasteja. ²Hem dikhenajne, dali ka saskjarele ki sabota, za da te kerenle krivo.

³Hem vakergja e manušeske so sine šuke vasteja: „Tergjov maškar!“ ⁴Hem vakergja lenge: „Dali tano dendo ki sabota: te kerel pes šukaripa ili bilačhipa? Te spasinel pes duša, ili te mudargjovel?“ A ola kjutinena sine.

⁵Togaš dikhlja len okolu Peste holjaja, hem tužno baši olengere srcia soj zakoravime, hem vakergja e manušeske: „Pružin to vas!“ Hem ov pružingja hem ulo palem sasto oleskoro vas.

⁶A o farisea, koga iklile, odma kerge pes lafi protiv Leste odolencar so podržinena e Irode, za da te uništinenle.

O Isus izbiringja e Dešuduje Dženen

⁷A o Isus povlečingja pes Pe učenikoncar ko more, hem bari gužva tari Galileja cidinge pali Leste, hem tari Judeja, ⁸hem taro Erusalim, tari Idumeja hem tari javer strana e Jordaneskiri, tari okolina Tir hem Sidon, bari gužva ali ki Leste, otkoga šunge so kerela sine.

⁹Hem vakergja Pe učenikonge te spreminen Oleske jek brodi za da ma te steginenle o narodo. ¹⁰Soske bute dženen lečingja, agjar so navalinena ki Leste sarine, so sine nasvale, za da te doprinenle. ¹¹Hem o nečista duhia štom ka dikhenle, perena sine angli Leste hem vikinena sine, vakeribaja: „Tu sijan e Devleskoro Čhavo!“ ¹²Hem zabraninela sine lenge strogo te na vakeren Koj tano Ov.

¹³Hem uklilo ki gora hem vikingja len ki Peste odolen, kas so izbiringja len, hem ola gele ki Leste. ¹⁴Hem opredelingja Dešuduje Dženen te oven Oleja, hem te bičhavel len te propovedinen, ¹⁵hem te ovel len vlast te palden demojna.

¹⁶Hem opredelingja len e Dešuduje Dženen: e Simoneske dengja anav Petar, ¹⁷pa o Jakov e Zavedeskoro hem o Jovan, o phral e Jakoveskoro, kaske so dengja len anav Voanerges – so značinela: Čhave e Gromeskere; ¹⁸hem o Andrej, o Filip, o Vartolomej, o Matej, o Toma, o Jakov e Alfejeskoro, o Tadej, o Simon o Hananejco, ¹⁹hem o Juda Iskariotski, koj predajngjale.

I hula protiv o Sveti Duh

²⁰Hem o Isus alo ko jek kher, hem palem khedingja pes baro narodo, agjar so našti sine Pe učenikoncar ni maro te han. ²¹A koga Oleskere šunge baši odova, iklile za da te priberinenle, soske vakerena sine deka nae tano upri Peste.

²²O knižnikja palem, koj ale taro Erusalim, vakerena sine deka e Isuse isile o Velzevul* o demonsko knezo, hem deka ov pomožinelale te paldel e demonen.

²³Hem otkoga vikingja len, vakerela sine lenge ko parabole: „Sar šaj o satana te paldel satana? ²⁴Ako jek carstvo jek jekeste protiv tano, odova našti te opstaninel. ²⁵Hem ako jek kher tano protiv jek jekeste, odova kher našti te opstaninel. ²⁶Hem ako o satana uštilo protiv korkori peste hem ulavela pes, na kašti te opstaninel, nego alo o krajo leskoro. ²⁷Ama nikoj našti te khuvel ko kher e silno manušeske hem te čorel andral o kher, ako prvo na phandelale e silno manuše hem togaš te čorel oleskoro kher.

²⁸Čače vakerava tumenge, deka e manušikane čhavenge ka oven olenge oprostime sa o grevia hem o hule,* kobor hem te hulinen;* ²⁹ama koj ka hulinel ko Sveti Duh, nae te oprostinelpe leske zauvek, nego ka ovel krivo anglo večno sudo,“ ³⁰soske vakerge: „Isile nečisto duho!“

I čačutni familija e Isuseskiri

³¹Hem togaš ale Oleskiri daj hem Oleskere phrajlja hem, terdindor avrijal, bičhage ki Leste te vikinenle. ³²A okolu Leste bešena sine narodo hem vakerge Leske: „Eke Ti daj hem Te phrajlja avrijal rodena Tut!“

³³Hem Ov vakergja lenge: „Koj tane Mi daj hem Me phrajlja?“ ³⁴Hem dikhlja len naokolu odolen, koj bešena sine okolu Leste hem vakergja: „Eke tane Mi daj hem Me phrajlja! ³⁵Soske, koj kerela e Devleskiri vojlja, ovi tano Mo phral, hem phen, hem daj.“

*Stiho 22: Velzevul značinela o vodači e demonengoro.
*Stiho 28: Te hulinen potočno značinela te vakere phare bilačhe lafia e Devleske.