Parabole

¹Hem palem počmingja te sikavel len e narodon uzo more. Hem khedinge pes okolu Leste but narodo, agjar so khugja ko brodi hem bešela sine ko more, a celo narodo sine ki phuv, uzo more.

²Hem sikavela len sine but parabolencar; hem agjar vakergja lenge: ³„Šunen! Eke, iklilo sejači te sejnel. ⁴Hem koga sejnela sine, disave zrnia pele uzo drumo, hem ale o čiriklja hem hale len.

⁵Javera zrnia pele ki barali phuv, kote na sine but phuv; hem barile sigate, soske na sine hor i phuv. ⁶A koga o kham iklilo, oveninge, hem soske na sine koreno šukile.

⁷Hem javera zrnia pele maškar ko kare, hem o kare barile hem zagušinge len, pa na ange plodi.

⁸A javera zrnia pele ki šukar phuv hem ange plodi, koj barile hem umnožingepe hem denge: jek trijanda, hem o javer šovardeš, a javer šel.“

⁹Hem vakergja: „Kas isi kana te šunel, neka šunel!“

¹⁰Štom o Isus ačhilo Korkori e Dešuduje Dženencar, hem okola okolu Leste so sine, ola pučlele baši i parabola.

¹¹Hem vakergja lenge: „Tumenge tani dendi i tajna e Devleskere carstvoskiri, a okolenge koj tane avrijal, sa vakerelape ko parabole, ¹²za da:

‘dikhindor jajkhencar hem te na dikhen;
hem šunindor kanencar, a te na hajljoven,
za da ma te pokajnen pes
hem te na ovel lenge oprostimo.’“

¹³Hem vakergja lenge: „Na hajljovena li akaja parabola? A sar ka hajljoven sa o parabole!

O Isus objasninela i parabola baši o sejači

¹⁴O sejači sejnela o slovo. ¹⁵Nesave manuša tane sar zrnia soj sejme uzo drumo; štom ka šunen o slovo, odma avela o satana hem lela lendar o slovo soj tano sejmo ki lende.

¹⁶Isto, o sejme upri barali phuv tale odola, koj – štom šunena o slovo - priminenale radosteja, ¹⁷ama nae len ki lende koreno zoralo, hem adaleske hari vreme ačhovena, hem koga avena phare dive ili koga i maltretirime tane baši o slovo, odma perena.

¹⁸A o javera, soj tane sejme ko kare, odolaj tane okola, koj šunge o slovo, ¹⁹ama e svetoskere pharipa, hem o hovajba e barvalipaskoro, hem o želbe baši javera bukja, koga ka khuven zagušinenale e slovo, hem ačhola bizo plodi.

²⁰A o sejme ki šukar phuv tale odola, koj šunena o slovo, priminenale hem anena plodi: jek trijanda, hem jek šovardeš, hem jek šel.“

O Isus vakerela ko parabole

²¹Prodolžingja o Isus vakergja lenge: „Zarem i momoli tharelape za da te učharelpe kapakoja, ili pak te čhivel pes telo kreveti? Nego tharelape za da te čhivel pes ki lampa. ²²Soske ništo nae garavdo, so nae te ovel otkrimo; ili soj tajno kerdo, a te na ikljol angli jak te dikhjol.

²³Kas isi kana te šunel, neka šunel!“

²⁴Hem vakergja lenge: „Pazinen so šunena! Save merkaja merinena, asavkaja ka merinel pes tumenge, hem tumen koj so šunena, panda ka dodajnel pes tumenge. ²⁵Soske kas isi, ka del pes leske; a kas nae, ka lel pes lestar hem odova so isile.“

²⁶Hem vakerela sine: „Agjar, e Devleskoro carstvo tano sar koga manuš ka frdel seme ki phuv; ²⁷hem rakjate čhivelape te sovel, a diveskoro uštela, hem o seme niknonela hem bajrola, a ov korkori na džanela sar. ²⁸I phuv korkori pestar anela plodi, prvo steblo, palo odova klasi, pa posle odova o klasi pherdo giveja. ²⁹A koga o plodi resljola, odma bičhavela srpa, soske alo o vreme baši i žetva.“

³⁰Hem vakerela sine: „Soleja te sporedina e Devleskoro carstvo? Save parabolaja te pretstavinale? ³¹Odovaj tano sar sinapovo zrno, so koga sejnela pes ki phuv, tano potikno taro sa o semia ki phuv; ³²ama koga tano sejmo ki phuv, bajrola hem ovela pobaro taro sa o zelenčukja hem mukela bare granke, agjar so o nebesna čiriklja šaj te keren juve teli oleskiri senka.“

³³Bute asavke parabolencar vakerela sine o slovo lenge, kobor so šaj te šunen. ³⁴A bizo parabole ništo na vakerela sine lenge, ama koga sine Korkori Ple učenikoncar, objasninela sine lenge sa.

O Isus čhinavela i bura

³⁵Hem rakjakoro ko isto dive vakergja lenge: „Te nakha ki javer strana.“ ³⁶Otkoga mukle e narodon, hem sar so sine o Isus ko brodi lele Ole peja; hem pali lende gele o javerada brodia so sine olencar.

³⁷Hem uštili silno bura, agjar so o pani khuvela sine andre ko brodi, hem o brodi vekje pani phergjola sine. ³⁸A Ov uzo kormilo sovela sine ko jastuko. Hem vazdingele hem vakerge Leske: „Učitele, zarem tuke sa jek, so amen meraja?“

³⁹Hem uštilo, vikingja e bavlalake hem vakergja e moreske: „Čhinav! Kjutin!“ Hem i bavlal čhinagja hem uli bari tišina.

⁴⁰Hem vakergja lenge: „Soske darana doborom? Zarem nae tumen vera?“

⁴¹Hem astargja len bari dar, hem vakerena sine jek javereske: „Koj tano Akava, so hem i bavlal hem o more pokorinena pes Leske?“