O Isus paldela e demonen taro manuš

¹Hem ale tari javer strana e moreskiri, ko Gadarinsko krajo, ²hem koga iklilo taro brodi, odma alo angli Leste taro grobia manuš nečisto duhoja. ³Ov živinela sine ko grobia; nikoj našti sine vekje ni sindžirencar te phandele, ⁴soske but puti phandenale sine sindžirencar hem čhige leske sastrna, ama ov sekova puti čhinela sine o sindžira, hem phagela sine o sastrna. Nikoj našti sine te smirinenle. ⁵Hem stalno, i rat hem o dive, sine ko grobia hem ko ridia, vikibaja hem khujbajape korkori pes barencar.

⁶Hem koga dikhljale e Isuse duraldan, prastandilo, pelo ničkum anglo Leste, ⁷hem vikingja silno glasoja: „So isitu Tut mancar, Isuse, Čhavo e Najbare Devleskoro? Dava Tut sovli ko Devel, ma mučin man!“ ⁸Soske vakergja leske: „Ikljov taro manuš, nečisto duho!“

⁹Hem pučljale: „Sar tano to anav?“

Hem vakergja Leske: „Mo anav tano Legion, soske sijem but.“

¹⁰Hem molinelale sine but te na paldel len taro odova krajo.

¹¹A odothe, ko rido, hana sine baro stado bale. ¹²Hem zamolingele sa o demojna, vakeribaja: „Bičhal amen ko bale, te khuva ki lende.“

¹³Hem dozvolingja lenge, hem o nečisto duhia iklile, hem khuge ko bale, hem o stado sine negde okolu duj iljade bale, hem mukle pes taro brego ko more, hem tasavdile ko more.

¹⁴A okola, so arakhena sine e balen, našle hem šujnakerge e narodonge ki diz hem ko gava, hem ale o narodo te dikhen so ulo. ¹⁵Hem koga ale ko Isus hem dikhle e manuše so sine astardo taro demojna – ki kaste sine o Legioni – sar bešela uravdo hem gogjaver, darandile.

¹⁶A okola, koj so sine dikhle, vakerge lenge so ulo e manušeja so sine astardo taro demojna, hem o bale. ¹⁷Hem počminge te molinenle e Isuse te džal peske taro olengoro krajo.

¹⁸A koga khuvela sine ko brodi, odova so sine astardo taro demojna, molinelale sine te ovel Oleja. ¹⁹Ama na odobringja leske, nego vakergja leske: „Dža tuke tlende khere, hem vaker lenge so kergja tuke o Gospodari hem sar sikagja tuke milost.“

²⁰A ov gelo hem počmingja te vakerel ko Deš Diza so kergja leske o Isus; hem sarine čudinena pes sine.

O Isus vazdela e čhaja taro mule hem saskjarela e džuvlja so sine nasvali

²¹Hem koga o Isus palem nakhlja e brodeja tari javer strana, but narodo khedingja pes ki Leste, a Ov sine uzo more. ²²Hem alo jek starešina tari sinagoga, ko anav Jair, hem koga dikhljale, pelo angli Oleskere pre. ²³Hem molinelale sine but, vakeribaja: „Mli čhaj tani meribaja, ava hem čhiv te vasta upro late – za da te ovel spasimi hem te živinel.“

²⁴Hem o Isus gelo oleja. Hem but baro narodo gele pali Leste hem gurinenale sine.

²⁵Hem jek romni krvarinela sine, cidela sine dešuduj berš, ²⁶hem but muke pretrpingja taro but doktojra, trošingja sa celo plo imot, ama na sine nisavo korist taro odova, nego panda pobilačhe ulo lake; ²⁷otkoga šungja baši o Isus, ali palaldan maškar o narodo, hem dopringja e Isuseskere šeja, ²⁸soske vakerela peske sine: „Ako doprinava man samo hem dži ko Oleskere šeja, ka spasinav man.“ ²⁹Hem odma čhinavsalilo latar odova so krvarinela sine, oj osetingja ko telo lakoro deka sastili taro odova nasvalipa.

³⁰A o Isus osetingja odma ki Peste, deka sila iklili taro Olestar, irangjape maškar o narodo hem vakergja: „Koj dopringja pes dži ko Mle šeja?“

³¹Oleskere učenikja vakerge: „Dikheja deka baro narodo gurinela Tut, a vakereja: ‘Koj dopringja pes dži ki Mande?’“

³²Hem Ov dikhela sine okolu Peste, za da te dikhel, koj kergja odova. ³³A i romni ki dar sine hem tresinela – soske džanela sine so ulo olaja – ali hem peli angli Leste hem vakergja Leske sa o čačipe.

³⁴A Ov vakergja lake: „Mi čhaj, tli vera spasingja tut! Dža tuke mireja hem ov sasti taro tlo nasvalipa!“

³⁵Dži kote panda lafi kerela sine, ale nekoj taro kher e starešinaske o Jair, hem vakerge leske: „Ti čhaj muli! Soske mučinejale panda e Učitele?“

³⁶A o Isus, koga šungja so vakerge leske, vakergja e starešinaske tari sinagoga: „Ma dara! Samo verujn!“ ³⁷Hem nikaske na dozvolingja te džal Oleja, osven e Petreske, o Jakov hem o Jovan, o phral e Jakoveskoro.

³⁸Hem ale ko kher e starešinaske; hem dikhlja galama, deka rovena sine hem vikinena but, ³⁹hem koga khugja andre vakergja lenge: „Soske vikinena hem rovena? I čhaj nae tani muli, nego sovela!“ ⁴⁰Hem asandile Leske. A Ov paldingja sarinen avrijal, lelja: e dade hem e daja hem okola so sine Oleja, hem khugja othe kote so sine i čhaj.

⁴¹Hem koga astargja e čhaja taro vas vakergja lake: „Talita kum!“ – so značinela „Čhaje, Me vakerava tuke, ušti!“ ⁴²Hem i čhaj uštili odma hem phirela sine, soske sinela dešuduj berš. Hem odma čudinge pes but. ⁴³Hem zapovedingja lenge strogo nikoj te na doznajnel baši odova, hem vakergja lenge te denla te hal.