Marko 6
O Isus na sine prifatimo ko Nazaret
1Hem o Isus gelo Peske odothare hem alo ko Plo bijando krajo, a Oleskere učenikja džana sine palo Leste. 2A koga alo sabota, počmingja te sikavel len ki sinagoga, hem but džene, koj šunge, čudinge pes hem vakerge: „Kotar tano akava džandipa Leske? Hem savi mudrost tani dendi Leske? Hem save čudia kerena Oleskere vasta? 3Nae li tano akava stolari, o Čhavo e Marijakoro, hem o phral e Jakoveskoro, e Josijaskoro, e Judaskoro hem e Simoneskoro? Hem nae li tane Oleskere phejna akate maškar amende?“ Hem na prifatingele sumnigepe ki Leste.
4A o Isus vakergja lenge: „O proroko nae tano bizo sajgija, osven ko plo bijando krajo, hem maškar pli familija hem ko Plo kher.“ 5Hem našti sine odothe te kerel nisavo čudo, osven so saskjargja hari nasvalen, čhigja pe vasta upro lende. 6Hem čudingjape baši olende so ola na verujnenale. Hem džala phirela sine okolu o gava hem sikavela e narodon.
I misija e apostolengiri
7Hem vikingja e Dešuduje Dženen; počmingja te bičhavel len po duj džene, hem dengja len vlast upro nečista duhia. 8Hem zapovedingja lenge te na ingaren ništo baši drumoske osven jek kaš: ni maro, ni torba, ni pare ko pojas, 9nego te oven uravde ko sandale, hem te na uraven po duj šeja.
10Hem vakergja lenge: „Kote hem da te khuven ko kher, ačhoven othe, dži kote na džana tumenge taro adava than kote so sijen. 11A ako na priminena tumen hem na šunena tumen, ikljoven odothare hem tresinen o pravo taro tumare pre, olenge baši svedoštvo!“
12Hem iklile propovedinena sine deka trebela o manuša te pokajnen pes. 13Hem paldena sine but demojna, hem bute nasvalen makhena len sine maslinkengere zejtineja hem saskjarena len sine.
O meriba e Jovan Krstiteleskoro
14Hem o caro o Irod šungja baši o Isus, soske Oleskoro anav sine but šundo, hem vakerela sine: „O Jovan Krstitel uštilo taro mule hem odoleske delujnena o sile ki leste!“ 15Javera palem vakerena sine, deka tano o Ilija; a javera vakerena deka tano Proroko, ili sar jek taro prorokja.
16Ama koga o Irod šungja, vakergja: „O Jovan, kaskoro šero me čhingjum, ov uštilo taro mule.“ 17Ustvari, o Irod bičhagja hem astargja e Jovane hem phanljale ko karanluko, baši i Irodijada, i romni oleskere phraleskiri o Filip, soske ženingja pes olaja, 18soske o Jovan vakerela sine e Irodeske: „Nae tuke tano dozvolimo te ovel tut e romnja tle phraleskiri!“
19A i Irodijada sine holjami e Jovaneske hem mangela sine te mudarele, ama našti sine. 20Soske o Irod darala sine taro Jovan, džandipaja deka tano manuš pravedno hem sveto, hem pazinelale sine; hem koga šunelale, buninelape sine but, ama sepak šunelale sine kefeja.
21Hem koga alo pogodimo dive, koga o Irod ko plo rodenden, dengja večera hajbaske ple knezonge, e vojvodenge hem e bare manušenge tari Galileja; 22khugja e Irodijadakiri čhaj hem khelgja hem ugodingja lenge e Irodeske hem okolenge so bešena oleja, hem o caro vakergja e čhajake: „Rode mandar so mangeja hem ka dav tut.“ 23Hem dengja pes lake sovli: „So hem da te rode mandar, ka dav tut – dži ko ekvaš taro mlo carstvo.“
24A i čhaj iklili hem vakergja pe dajake: „So te rodav?“
A oj vakergja lake: „O šero e Jovan Krstiteleskoro.“
25Hem odma, otkoga khugja, sigate ko caro rodingja, vakeribaja: „Mangava te de man, akana odma, ko poslužavniko o šero e Jovan Kristiteleskoro.“
26Hem o caro but tužnisalilo ama baši i zakletva hem okola so bešena sine oleja, na mangela sine te odbinela. 27Hem o caro odma bičhagja stražari hem naredingja leske te anel oleske oleskoro šero. Hem ov gelo, čhingja o šero leskoro ko karanluko, 28hem angja o šero leskoro ko poslužavniko hem dengjale e čhajake, a i čhaj dengjale pe dajake.
29A koga oleskere učenikja šunge, ale hem lele oleskoro telo hem čhigele ko grobo.
O Isus paravela pandž iljade manušen
30Hem o apostojlja khedinge pes ko Isus hem vakerge Leske baši o sa so kerge hem so sikage. 31Hem vakergja lenge: „Aven tumen korkori ko than kote so nane nikoj, hem odmorinen hari!“ Soske, but džene avena hem džana peske, hem na sine len vreme nitu te han.
32Hem gele brodeja ko than kote so nane nikoj samo ola. 33Ama dikhle len koga gele hem but džene pendžargele hem prastandile peški taro sa o diza, hem resle angleder olende. 34A koga iklilo taro brodi dikhlja bari gužva hem pelo Leske žal baši olende, soske sine sar bakhre bizo pastiri, hem počmingja te sikavel len but.
35Hem soske o vreme nakhlja dosta sine but kasno, ale e Isuseskere učenikja hem vakerge Leske: „O than tano pusto nane ništo, a vekjej tano kasno. 36Muk e narodon, za da te džan ko paše gava hem ko khera, te šaj te kinen peske nešto te han!“
37A Ov odgovoringa: „Den len tumen te han!“
Vakerge Leske: „Te dža li te kina maro baši dujšel denarii hem te da len te han?“
38A Ov vakergja lenge: „Kobor mare isi tumen? Džan hem dikhen!“
Hem koga dikhle, vakerge Leske: „Pandž mare, hem duj mačhe.“
39Hem zapovedingja lenge te namestinen sarinen ko grupe, ki zeleno čar. 40Hem bešle ko grupe po šel hem pinda.
41Hem lelja o pandž mare hem o duj mačhe, dikhlja ko nebo, blagoslovingja hem phaglja o mare, pa dengja e učenikonge te čhiven len angli lende; hem o duj mačhe razdelingja len sarinenge.
42Hem sarine hale hem čalile. 43Hem vazdinge dešuduj korpe pherde zalagja taro maro, hem taro mačhe, 44a odola so hale maro, sine okolu pandž iljade murša.
O Isus phirela ko pani
45Hem odma čhigja Ple učenikon te khuven ko brodi hem te džan angleder tari javer strana, ki Vitsaida, dži kote Ov mukela e narodon. 46Hem otkoga gelo peske olendar, gelo ki gora te molinel pes.
47A rakjakoro o brodi sine maškar o more, a Ov korkori ki phuv. 48Hem koga dikhlja len sar mučinena pes te ciden ko brodi te plovinen, soske i bavlal sine lenge obratno, but kasno rakjate negde sabah karši, alo dži ki lende, phiribaja ko more, hem mangela sine te nakhel len. 49A ola koga dikhlele sar phirela ko more, mislinge deka tano duho, hem vikinge, 50soske sarine dikhlele hem darandile.
Ama Ov odma kergja lencar lafi hem vakergja lenge: „Oven silna, ma daran! Me sijum!“ 51Togaš khugja ki lende ko brodi, hem i bavlal smiringja pes. Ola čudinge pes but ki peste, 52soske na halile o čudo e marencar, nego o srce sine lengoro zakoravimo.
53Hem koga nakhle, ale ki phuv ko Genisaret hem iklile. 54Koga iklile taro brodi, o narodo odma pendžargele, 55prastandile tari celo odoja okolina hem počminge te anen nasvalen, ki postela, kote so šunge deka tano Ov. 56Hem kote da te džal sine te khuvel dali ko gava ili ko diza, ili ko nive, čhivena sine e nasvalen ko thana kote so khedenape te bikinen, hem molinenale sine te doprinenle barem dži ko resia taro Oleskere šeja. Hem sarine, koj doprinenale, sine lečime.