So kerela e manuše nečisto?

¹Hem khedinge pes okolu Leste o farisea hem nekoj taro knižnikja, koj sine ale taro Erusalim, ²hem dikhle deka nekoj taro Oleskere učenikja hana maro melale, ustvari bithovde vastencar.

³Soske o farisea hem sa o Judejcia – ikeribaja dži ko običaja e phurengere – na hana, ako na thovena pe vasta dži ko laktia; ⁴hem koga ka iranen pes taro pazari, na hana, ako na thovena pes. Hem isi panda but javer, so priminge te ikeren: thojbe o čaše, o bukali, o stolice, hem o bakarna čare.

⁵Hem agjar, o farisea hem o knižnikja pučlele: „Soske Tle učenikja na živinena spored o običaja e phurengere, nego hana maro bithovde vastencar?“

⁶A Ov vakergja lenge: „Šukar prorokujngja o Isaija baši tumenge licemejra, sar soj tano pišimo:

‘Akava narodo poštojnela Man mujeja,
a olengoro srce tano dur Mandar;
⁷ko čučo poštojnena Man,
sikajbaja nauke, soj tane manušikane zapovedia.’

⁸Tumen mukena e Devleskiri zapoved, a ikerena manušikano običaj.“

⁹Hem prodolžingja o Isus te vakerel lenge: „Tumen čhinavenala e Devleskiri zapoved, za da te ikeren tumaro običaj! ¹⁰Ustvari, o Mojsej vakergja: ‘Poštojn te dade hem te daja’ hem ‘Koj ka dele armajna pe dade hem pe daja, te ovel kaznimo meribaja!’ ¹¹Ama tumen vakerena dekaj tano šukar o manuša koga vakerena pe dadeske ili pe dajake : ‘Izvini, našti te pomožinav tumen, soske so ka dav tumenge odova, dengjum lafi deka ka dav kurbani e Devleske odova,’ ¹²na mukena len te keren bilo so baši plo dad hem baši pli daj. ¹³Hem agjar čhinavena e Devleskoro slovo tumare običajeja, so tumen predajngenle, hem kerena but javera bukja slična ko akava.“

¹⁴Togaš palem vikingja e narodo ki Peste hem vakergja lenge: „Šunen Man sarine hem hajljoven! ¹⁵Nae ništo, avrijaldan taro manuš, so bi šaj te kerele nečisto koga ka khuvel ki leste; nego okova so ikljola taro manuš, odova kerelale nečisto. ¹⁶Kas isi kana, neka šunel!“

¹⁷Odma, koga cidingjape podur taro narodo, Ov khugja ko jek kher, Oleskere učenikja pučlele baši parabola so značinela.

¹⁸Ov vakergja lenge: „Zarem hem tumenda na hajljovena? Na svatinena li deka ništo našti te kerele e manuše nečisto, so khuvela avrijaldan ki leste, ¹⁹soske na khuvela ko oleskoro srce, nego ko vogi hem džala ko odredimo than?“ Agjar proglasingja sa o hajba baši čista.

²⁰Isto agjar vakerela sine lenge: „Okova so ikljola e manušestar, odova kerelale nečisto, ²¹soske, andraldan, taro e manušeskoro srce, ikljovena grešna misle, koj ingarena ko nemoralna bukja, ko čoriba, ko mudariba, ²²ki preljuba, dikhela ko korist samo peske, o bilačhipa, o hovajba, o zavist, te navredine, o baripa ko manuš, hem bigogjakere bukja. ²³Sa odola bilačhipa ikljovena andraldan hem kerenale nečisto e manuše.“

O Isus paldela nečisto duho tari čhaj

²⁴Uštilo odothare hem gelo ko Tirsko hem Sidonsko Krajo. Khugja ko jek kher hem manglja te na džanen kote tano. Ama našti sine te ačhovel garavdo. ²⁵Koga šungja baši Leske jek romni, kaskiri čhaj sine astardi taro nečisto duho, oj ali hem peli anglo Oleskere pre. ²⁶A odoja romni sine Grkinka, poteklo Sirofeničanka. Hem molinelale sine te paldel e demone tari lakiri čhaj.

²⁷A Ov vakergja lake: „Muk prvo te čajljoven o čhave, soske nae tano šukar te lel pes lendar o maro e čhavendar hem te frdel pes e džukelenge.“

²⁸Oj odgovoringja: „Oja, Gospodar! Ama hem o džukela teli sofra hana taro troške e čhavendar.“

²⁹Hem vakergja lake: „Baši odova lafi so vakergjan, dža tuke khere; o demoni iklilo tari ti čhaj.“ ³⁰Hem irangja pes khere hem arakhlja e čhaja sar pašljola ki postela, a o demoni iklilo.

O Isus saskjarela e manuše so sine laloro hem kašuko

³¹Hem koga iklilo palem taro kraja taro Tir, alo – preku Sidon – dži ko Galilejsko More, maškar o kraja taro Deš Diza. ³²Hem ange Leske jek kašuko laloro soj tano, hem molinenale sine te čhivel Po vas ki leste.

³³Hem cidingjale taro narodo korkori, hem čhigja Ple naja ko oleskere kana, hem čhungargja hem dopringja oleskiri čhib; ³⁴dikhlja ko nebo, hor dišingja hem vakergja leske: „Efata!“ – ustvari: „Phrav tut!“ ³⁵Hem odma phravdile o kana leskere hem phravdili i čhib oleskiri so sine phanli, hem kerela sine lafi čisto.

³⁶Hem zapovedingja lenge nikaske te na vakeren. Ama kobor poviše naredinela lenge Ov, doborom poviše ola šujnakerena sine. ³⁷Hem previše čudinena pes sine hem vakerena: „Sa šukar kerela! Hem e kašuken kerela te šunen, hem e laloren te keren lafi!“