O Isus paravela štar iljade manušen

¹Ko odola dive, koga palem khedinge pes bari gužva hem na sine len so te han, vikingja Ple učenikon hem vakergja lenge: ²„Žali mange tano baši o narodo, soske vekje trin dive tane stalno uzo Mande hem nae so te han. ³Ako mukava len bokhale ko olengere khera, ka omalaksinen ko drumo, soske nekoj olendar ale tane duraldan.“

⁴Hem Oleskere učenikja odgovoringe Leske: „Šaj li nekoj ki akaja pustina te arakhel dovolno hajbaske baši sa akava narodo?“

⁵Hem pučlja len: „Kobor mare isi tumen?“

A ola vakerge: „Evta.“

⁶Togaš zapovedingja e narodoske te pružinen pes ki phuv. Hem lelja o evta mare, zablagodaringja hem phaglja len hem dela len sine Ple učenikonge te čhiven len, hem ola čhige len anglo narodo. ⁷Sine len hem hari mačhe. Hem koga blagoslovingja len, zapovedingja te čhiven len hem olen.

⁸Hem hale hem čalile, hem vazdinge evta korpe so ačhile kotora. ⁹A sine okolu štar iljade manuša so hale; hem muklja len.

¹⁰Hem odma khugja ko brodi Ple učenikoncar, hem alo ki okolina Dalmanuta.

O farisea rodena znako taro Isus

¹¹Hem o farisea iklile hem počminge te prepirinen pes Oleja, rodibaja Olestar znako taro nebo, te iskušinenle. ¹²A Ov hor dišingja ki Peste, ko duho Plo, hem vakergja: „Soske akava pokolenie rodela znako? Čače vakerava tumenge, nae te del pes leske znako baši akava pokolenie.“ ¹³Hem muklja len palem, khugja ko brodi hem nakhlja tari javer strana.

Arakhen tumen taro farisejsko hem e Irodeskoro kvasac

¹⁴Hem o učenikja bisterge te len maro, a sine len samo jek maro peja ko brodi. ¹⁵Hem zapovedingja lenge, vakeribaja: „Dikhen! Arakhen tumen taro farisejsko kvasac hem taro kvasac Irodeskoro.“

¹⁶A o učenikja javer halilele hem kerena sine lafi maškar peste: „Vakerela amenge agjar soske nane amen maro!“

¹⁷A o Isus koga halilo odova, vakergja lenge: „Soske mislinena deka nae tumen maro? Panda li na hajljovena hem na svatinena? Baralo li tano tumaro srce? ¹⁸Jajkha isi tumen, a na dikhena? Kana isi tumen, a na šunena? ¹⁹Hem na setinena li tumen, koga phagljum o pandž mare ko pandž iljade, kobor korpe pherde zalagoncar vazdingen?“

Vakerge Leske: „Dešuduj.“

²⁰„A koga phagljum evta mare ko štar iljade, kobor korpe pherde zalagoncar vazdingen?“

Vakerge: „Evta.“

²¹Hem vakergja lenge: „Panda li na hajljovena?“

O Isus saskjarela e korole ki Vitsaida

²²Hem ale ki Vitsaida. Hem ange Leske jek korolo hem molinenale sine te doprinele. ²³Ov astargja e korole taro vas, ikagjale avri taro gav hem čhungargja ko jajkha leske; čhigja Ple vasta ki leste hem pučljale: „Dikheja li nešto?“

²⁴Vazdingja pe jajkha hem vakergja: „Dikhava manuša sar phirena, dikhava len sar kašta.“

²⁵Palo odova palem čhigja Ple vasta ko oleskere jajkha, hem lelja te dikhel sastilo, hem dikhela sine sa jasno. ²⁶Hem bičhagjale ko oleskoro kher, vakeribaja: „Ma khuv ko gav, hem nikaske ma vaker!“

O Isus vakerela Plo meriba hem o voskresenie

²⁷Hem iklilo o Isus, Ple učenikoncar, ko gava ki Kesarija Filipova; a drumaldan pučela len sine Ple učenikon, vakeribaja lenge: „So vakerena o manuša, Koj Sijum Me?“

²⁸Ola vakerge Leske: „O Jovan Krstitel, javera vakerena o Ilija; a treta – deka sijan jek taro prorokja.“

²⁹O Isus pučlja len: „A tumen baši Kaste računinena Man?“

O Petar ko odgovor vakergja Leske: „Tu sijan o Hristos*.“

³⁰Hem zabraningja lenge nikaske te na vakeren baši Leske.

³¹Hem počmingja te sikavel len deka o Manušikano Čhavo trebela te cidel but hem te ovel otfrlimo taro starešine, o prvosveštenikja hem o knižnikja; deka ka mudarenle hem deka palo trin dive ka voskresninel. ³²Otvoreno lelja o Isus te vakerel lenge. A o Petar cidingjale ki strana korkori hem počmingja te džal protiv baši odova so vakerela.

³³Ama Ov irangja pes dikhlja Ple učenikon, gelo protiv hem vikingja e Petreske vakergja: „Dža tuke Mandar, satano, soske tu na mislineja baši okova soj tano Devleskoro, nego baši okova soj tano manušikano.“

³⁴Hem vikingja e narodon, zaedno Ple učenikoncar hem vakergja lenge: „Koj mangela te avel pali Mande, neka odrečinel pes pestar hem neka vazdel plo krsto hem neka džal pali Mande. ³⁵Soske, koj mangela te spasinel pli duša, ka našavela; a koj ka našavel pli duša baši Mange hem o Evangelie, ka spasinela.

³⁶Soske, soj korisno tano e manušeske, ako dobinela celo sveto, a pli duša našavelala? ³⁷Soske, so šaj o manuš te del ki zamena baši pli duša? ³⁸Soske, koj ka ladžal Mandar hem taro Mle lafia ko akava grešno pokolenie koj kerela preljuba, hem o Manušikano Čhavo ka ladžal olestar, koga ka avel ki slava Ple Dadeskiri, e sveto angelencar.“

*Stiho 29: O Hristos ko grčki značinela Mesija, ili Pomazaniko.