¹A koga o Isus završingja zapovedibaja lenge Ple dešuduje učenikonge, gelo peske odothare te sikavel hem te propovedinel ko olengere diza.

O Jovan Krstitel šungja baši o Isus

²Koga o Jovan šungja taro phanlipa, baši o dejlja e Hristoskere, bičhagja duje dženen taro ple učenikja, ³hem vakjergja Leske: „Tu li sijan Odova, Koj trebela te avel, ili te udžara javere?“

⁴O Isus odgovoringja lenge hem vakjergja: „Džan hem javinen e Jovaneske so šunena hem so dikhena: ⁵o korole dikhena hem o sakatia phirena, o leprozna očistinenapes hem o kašuke šunena, o mule voskresninena hem o bedna priminena o Evangelie; ⁶hem blaženo tano odova, koj na soblazninelapes baši Mange.“

⁷Koga ola gele peske, o Isus počmingja te vakjerel e narodoske baši o Jovan: „So iklilen te dikhen ki pustina? Trska li so i bavlal nišinelala? ⁸Ama so iklilen te dikhen? Manuš li uravdo ko kovle šeja? Ekje, ola koj phiravena kovle šeja tane ko carska dvojra. ⁹Nego soske iklilen? Te dikhen li proroko? Oja, vakjerava tumenge, hem poviše taro proroko. ¹⁰Akavaj tano odova, baši kaske tano pišimo: ‘Ekje, bičhavava Mlo glasniko anglo Tlo muj, koj ka spreminel Tlo drumo anglo Tute.’

¹¹Čače vakjerava tumenge, maškar o bijande taro džuvlja na vazdingjapes pobaro taro Jovan Krstitel; ama o najtikno ko carstvo nebesno tano pobaro olestar. ¹²A taro dive e Jovan Krstiteleskoro dži akana o carstvo nebesno trpinela nasilstvo hem nasilnikja lenale silaja; ¹³soske sa o prorokja hem o Zakoni prorokujnena džiko Jovan; ¹⁴hem ako mangena te priminen, ovi tano o Ilija, koj trebela te avel.

¹⁵Kas isi kana neka šunel!

¹⁶A soleja te sporedinavle akava rodi? Ličinela e čhavencar, koj bešena ko thana kaj so bikinelapes hem vikinena e amalenge, ¹⁷vakjeribaja: ‘Bašagem tumenge ki flejta hem na khelgen, giljagem tumenge žalna gilja hem na žalingen.’

¹⁸Soske alo o Jovan, koj nitu hala, nitu pijela, a ola vakjerena: ‘Isile demoni!’ ¹⁹Alo o Čhavo Manušikano, koj hala hem pijela, palem vakjerena: ‘Ekje manuš alčno hem pijanica, amal e carinikongoro hem e grešnikongoro!’ Hem i mudrost opravdingjapes preku olakere dejlja.“

O bipokajme diza

²⁰Togaš počmingja te ukorinel o diza, ko kola slučingepes najviše Oleskere čudia, soske na pokajngepes. ²¹„Teško tuke, Horazine! Teško tuke, Vitsaido! Soske ako ko Tir hem Sidon slučingepes čudia, so slučingepes ki tumende, odamna bi pokajnenape sine ko vrekje hem pravo. ²²Ama, vakjerava tumenge: polokho ka ovel olenge o Tir hem o Sidon ko sudno dive, otkolku tumenge.

²³Hem tu, Kapernaum, džiko nebo li ka vazdetut? Ka hule džiko pekol. Soske ako ko Sodom slučingepes čudia, so slučingepes ki tute, ka ačhovel sine džiko avdosutno dive. ²⁴Ama vakjerava tumenge, ki phuv Sodomsko ka ovel lake polokho ko sudno dive, otkolku tuke.“

O Spasiteli vikinela tumen

²⁵Ko odova vreme, o Isus odgovoringja hem vakjergja: „Falinavatut, Mo Dat, Gospodari ko nebo hem ki phuv, soske garagjan odova taro mudra hem gogjavera, a otkringjanle e tikne maksmenge. ²⁶Oja, Mo Dat, soske agjar sine ugodno anglo Tute!

²⁷Saj Mange tano predajmo taro Mlo Dat, hem nikoj na pendžarelale e Čhave, osven o Dat; nitu nekoj pendžarelale e Dade, osven o Čhavo, hem odova kaske o Čhavo mangela te otkrinel leske.

²⁸Aven ki Mande sarine, koj čhinde sijen tumen hem isitumen pharipe upri tumende, hem Me ka dav tumen odmor. ²⁹Len Mlo jarem ki tumende hem sikljoven Mandar; soske Me sijum krotko hem ponizno ko srce; hem ka arakhen odmor tumare dušenge; ³⁰soske Mlo jarem tano prijatno hem Mlo pharipe tano lokho.“