O običaja e phurengere

¹Togaš o farisea hem o knižnikja, taro Erusalim, ale ko Isus hem vakjerge Leske: ²„Soske Te učenikja phagena o običaj e phurengoro? Soske na thovena pe vasta, koga hana maro.“

³A Ov vakjergja lenge: „Soske hem tumenda phagena e Devleskiri zapoved, baši tumaro običaj? ⁴Soske o Devel vakjergja: ‘Poštojn te dade hem te daja,’ hem ‘Koj lošno vakjerela pe dadeske ili pe dajake, te kazninel pes meribaja;’ ⁵a tumen vakjerena: ‘koj ka vakjerel pe dadeske ili pe dajake: "Odova soleja bi šaj te koristine mandar, podarimoj tano e Devleske," ⁶ov na trebela te del pe dadeske ili pe dajake;’ hem agjar čhinagen e Devleskoro lafi baši tumaro običaj. ⁷Licemejra! Šukar o Isaija prorokujnela sine baši tumenge, vakjeribaja:

⁸‘Akava narodo poštojnela Man mujeja,
a olengoro srce tano dur Mandar.
⁹Ama ko čučo pokloninena pes Mange,
sikljona nauke, soj tane manušikane zapovedia.’“

¹⁰Hem vikingja e narodon hem vakjergja lenge: „Šunen hem hajljoven! ¹¹Na odova, so khuvela ko muj kjerela melalo e manuše. Nego okova so ikljovela taro muj, odova kjerela melalo e manuše.“

¹²Togaš o učenikja ale paše ki Leske hem vakjerge: „Džaneja li, deka o farisea uvredžinge pes koga šunge odova lafi?“

¹³A Ov odgovoringja: „Sekova sadimo, so na sadingjale Mlo nebesno Dad, ka ovel otkornimo. ¹⁴Muken len. Olaj tane korole vodačia e korolengere; a ako korolo vodinela korole, solduj ka peren ki dupka.“

¹⁵A o Petar vakjergja Leske: „Objasnin amenge i parabola.“

¹⁶A o Isus vakjergja lenge: „Hem tumenda li panda sijen bizo te hajljoven? ¹⁷Na hajljovena li deka sa so khuvela ko muj džala ko vogi hem izfrdelape avrijal? ¹⁸A okova, so ikljovela taro muj, ikljola taro srce, hem odova kjerela melalo e manuše. ¹⁹Soske taro srce ikljovena: bilačhe misle, ubistvo, preljuba, bludstvia, čoriba, hovavne svedoštvia, hule. ²⁰Odola bukjaj tane koj kjerena melalo e manuše. A o hajbe bithovde vastencar na kjerela melalo e manuše.“

I vera tari jek Hananejka

²¹Hem otkoga iklilo odothar, o Isus cidingjape ko kraja ko Tir hem Sidon. ²²Hem ekje, džuvli Hananejka, iklili taro okola kraja hem vikingja ki Leste, vakjeribaja: „Smilujn Tut mange, Gospodar, Čhavo Davideskoro! Mli čhaj tani bilačhe opsednimi taro demoni.“

²³Ama Ov na odgovoringja lake ni lafi. Hem ale paše ki Leste, Oleskere učenikja molinenajnele, vakjeribaja: „Mukla, soske vikinela pali amende.“

²⁴Ama Ov vakjergja: „Me na sijum bičhavdo, osven ko našavde bakhre ko kher ko izraelsko.“

²⁵Oj ali palem hem pokloninela pes Leske, vakjeribaja: „Gospodar, pomožin man!“

²⁶A Ov odgovoringja: „Nae tano šukar te lel pes o maro e čhavengoro hem te frdel pes e džukjelenge.“

²⁷Ama oj vakjergja: „Oja, Gospodar, ama čak hem o džukjela hana taro troške, so perena tari sofra olengere gospodarengiri.“

²⁸Togaš o Isus odgovoringja: „O, romnije, bari tani tli vera: neka ovel tuke pali tli želba.“ Hem lakiri čhaj sine sastili taro odova saati.

O Isus paravela štar iljade manušen

²⁹Hem otkoga gelo peske odothare, o Isus alo uzo more Galilejsko, uklilo ki gora hem bešlja odothe. ³⁰Hem ale ki Leste baro narodo, koj ange peja: bange, korole, lalore, sakatia hem but javera, hem čhige len anglo e Isuseskere pre, hem Ov saskjargja len, ³¹agjar so o narodo čudingepe sar dikhena o lalore te kjeren lafi, o sakatia saste, o bange te phiren hem o korole te dikhen; hem proslavinge e Devle o izraelsko.

³²A o Isus vikingja Ple učenikon ki Peste, hem vakjergja: „Pherdo sijum ki žal baši o narodo, soske vekje trin dive ačhile Mancar hem nae len so te han; a na mangava te mukav len bokhale, za da ma te čhingjoven ko drumo.“

³³Hem o učenikja Oleskere vakjerge Leske: „Kotar amenge ki pustina dobokhar maro, za da te parava dobokhar baro narodo?“

³⁴Hem o Isus vakjergja lenge: „Kobor mare isi tumen?“ Ola vakjerge: “Evta hem nekobor mačhe.“

³⁵Hem zapovedingja e narodoske te bešen ki phuv; ³⁶lelja o evta mare hem o mačhe, blagodaringja hem phaglja len; hem dengja e učenikonge, a o učenikja e narodoske.

³⁷Hem sarine hale hem čalile; hem vazdinge so ačhilo taro kotora, evta korpe pherde. ³⁸A odola, koj hale, sine štar iljade murša, osven o džuvlja hem o čhave.

³⁹Hem štom muklja len e narodon, khugja ko brodi, hem alo ki okolina ki Magdala.