O Hristos preobrazinelape

¹Hem palo šov dive o Isus lelja Peja: e Petare, hem e Jakove hem o phral leskoro o Jovan, hem ingargjalen ki uči gora nasamo. ²Hem sine preobrazimo anglo lende, o liko Oleskoro svetingja sar kham, a Oleskere šeja ule parne sar i svetlina. ³Hem ekje, javingjapes lenge o Mojsej hem o Ilija hem kjerge lafi Oleja.

⁴A o Petar odgovoringja hem vakjergja e Isuseske: „Gospodar, šukari tano baši amenge te ova akate; ako mangeja ka kjera akate trin šatojra: jek baši Tuke, jek baši o Mojsej hem jek baši o Ilija.“

⁵Džikote panda kjerela sine lafi ov, ekje, upra lende svetlo oblako, hem ekje, glaso taro oblako vakjerela sine: „Akavaj tano Mlo manglo Čhavo, ki Kaste Mi milina tani; šunen Ole!“ ⁶Hem koga o učenikja šunge odova, pele mujeja ničkum hem but darandile.

⁷A o Isus alo uzo lende paše, dopringjalen hem vakjergja: „Ušten hem ma daran!“ ⁸Hem koga ola vazdinge pe jakja, na dikhle nikas, osven e Isuse Korkori.

⁹Hem koga hulile tari gora, o Isus zapovedingja lenge, vakjeribaja: „Nikaske ma vakjeren baši akava prividenie, džikote o Čhavo Manušikano na voskresninela taro mule.“

¹⁰Hem Oleskere učenikja pučlele, vakjerge: „Soske togaš o knižnikja vakjerena, deka o Ilija angleder mora te avel?“

¹¹A Ov odgovoringja lenge hem vakjergja: „Čače o Ilija avela hem ka obnovinel sa. ¹²Ama, vakjerava tumenge, deka o Ilija vekje alo, hem na pendžargele, nego kjerge leske sar so mangle. Agjar hem o Čhavo Manušikano ka cidel olendar.“

¹³Togaš o učenikja halile deka vakjerela sine lenge baši o Jovan Krstitel.

O saskjariba e demonsko mesečare

¹⁴Hem koga ale ko narodo jek manuš alo Leske, pelo ko kočia anglo Leste hem vakjergja: ¹⁵„Gospodar, smilujntut mle čhaveske, soske tano mesečari hem mučinelapes but; soske često perela ki jag hem često ko pani. ¹⁶Hem angjumle ko Tle učenikja, a ola našti sine te saskjarenle.“

¹⁷Hem o Isus odgovoringja hem vakjergja: „O, neverno hem razvratno rodo! Dži koga ka ovav tumencar? Dži koga ka trpinav tumen? Anenle Mange akate.“ ¹⁸Hem o Isus prekoringjale, hem iklilo o demoni olestar, hem o čhavo sine sastilo taro odova saati.

¹⁹Togaš o učenikja ale uzo Isus korkori hem vakjerge: „Soske našti sine amen te paldale?“

²⁰A Ov vakjergja lenge: „Baši tumaro neverie; soske čače vakjerava tumenge, ako isitumen vera kobor o sinapovo zrno, ka vakjeren akale gorake: ‘Premestintut akatar odori!’, hem ka premestinelpes, hem ništo nae te ovel tumenge nevozmožno. ²¹A akaja vrsta na ikljola osven preku molitva hem postiba.“

O Isus vakjerela baši Plo meribe hem voskresenie

²²Hem džikote sine zaedno ki Galileja, o Isus vakjergja lenge: „O Čhavo Manušikano ka ovel predajmo ko vasta manušikane, ²³hem ka mudarenle, hem ko trito dive ka ovel voskresnimo.“ Hem ola but nažalisalile.

²⁴A koga ale ko Kapernaum, okola so khedena duj drahme e hrameske danoko, ale e Petareske hem vakjerge: „Zarem tumaro Učiteli na platinela duj drahme?“

²⁵Ov vakjergja: „Oja.“ Hem koga khugja ko kher o Isus predvidingjale hem vakjergja: „So mislineja, Simon: e phuvjakere cajra kastar lena carina ili danok, taro ple čhave ili taro jabandžie?“

²⁶A o Petar vakjergja Leske: „Taro jabandžie.“ O Isus vakjergja leske: „Znači, o čhave tane slobodna. ²⁷Ama za da mate soblazninalen, dža džiko more, frde jadica hem le o prvo mačho so ka ikljol, hem koga ka phrave o muj leskoro, ka arakhe statir;* lele hem delen lenge baši Mange hem baši tuke.“

*jek vrsta železna pare