Brako hem razvod

¹A koga o Isus završingja odola lafia, gelo peske tari Galileja hem alo dži ko predejlja ki Judeja tari okoja strana o Jordan. ²Hem bari gužva cidinge pali Leste, a Ov saskjargja len odori.

³Hem o farisea ale Leske, iskušingele hem vakjerge: „Dali smejnela manuš te mukel ple romnja baši sekoja pričina?“

⁴A Ov odgovoringja: „Zarem na čitingen deka Okova, Koj sozdajngja len ko početok, ‘sozdajngja len murš hem džuvli,’ ⁵hem vakjergja: ‘Odoleske o murš ka mukel pe dade hem pe daja hem ka prilepinel pes uzo pli romni, hem o solduj ka oven jek telo’? ⁶Agjar so nae tane vekje duj džene, nego jek telo. Hem agjar so o Devel kjergja jek, manuš te na razdelinel.“

⁷Hem vakjerge Leske: „Soske togaš o Mojsej zapovedingja te del pes lake razvodno lil e romnake hem te mukel pes?“

⁸Vakjergja lenge: „Baši tumaro zakoravimo srce, o Mojsej dozvolingja tumenge te muken tumare romnen, ama ko početok na sine agjar. ⁹Nego vakjerava tumenge: „Koj ka mukel pe romnja osven baši preljubodejstvo – hem ženinela pes javeraja, kjerela preljuba; hem koj ka ženinel pes mukle džuvljaja, kjerela preljuba.“

¹⁰O učenikja vakjerge Leske: „Ako agjar bešena o bukja maškar o rom hem i romni, onda pošukari te na ženinel pes.“

¹¹A Ov vakjergja lenge: „Sarine našti te prifatinen odola lafia, nego okola, kaske olenge tano dendo. ¹²Isi, ustvari, nesposobna baši o brako, soske bijame tane telesno mahanaja. Isi palem asavke koj nae tane sposobna baši o brako, soske o manuša sakatinge len. A isi asavke so korkori pes otstraningepe taro bračno životo, baši o Carstvo Nebesno. Koj šaj te prifatinel, neka prifatinel.

O Isus blagoslovinela e čhaven

¹³Togaš ange čhaven ki Leste, za da te čhivel pe vasta upro lende hem te molinel pes; ama o učenikja irange len. ¹⁴A o Isus vakjergja: „Muken len e čhaven hem ma čhinaven len te aven ki Mande, soske asavkenge pripadinela o nebesno carstvo.“ ¹⁵Hem čhigja pe vasta ki lende, hem gelo peske odothare.

O barvalo čhavo

¹⁶Hem ekje, jek alo Leske hem vakjergja: „Šukar učitele, savo šukaripa te kjerav, za da te ovel man večno životo?“

¹⁷A Ov vakjergja leske: „Soske pučeja Man baši šukar? Jek tano Šukar! A ako mangeja te khuve ko životo, pazin o zapovedia.“

¹⁸Vakjergja Leske: „Kola?“

A o Isus vakjergja: „’Ma mudar, ma kjer preljuba, ma čor, ma svedočin hovavno,

¹⁹poštojn te dade hem te daja,’ hem ‘mang tle paše manuše sar tut.’“

²⁰O čhavo vakjergja Leske: „Sa odova pazingjumle taro mlo ternipa, panda so falinela mange?“

²¹O Isus vakjergja leske: „Ako mangeja te ove sovršeno, dža, bikin tlo imot hem dele e čorolenge, hem ka ovel tut gudlipa ko nebo. Ava hem sledin Man!“

²²A koga o čhavo šungja odova lafi, gelo peske nažalimo, soske sinele but imotia.

²³A o Isus vakjergja Ple učenikonge: „Čače vakjerava tumenge: barvalo mučno ka khuvel ko nebesno carstvo! ²⁴Hem palem vakjerava tumenge: polokho tano e kamilake te nakhel taro e suvjakere kana, nego o barvalo te khuvel e Devleske ko carstvo.“

²⁵Koga o učenikja šunge odova čudinge pes but hem vakjerge: „Togaš, koj šaj te spasinel pes?“

²⁶ O Isus dikhlja len hem vakjergja olenge: „E manušenge akavaj tano nevozmožno, ama e Devleske saj tano vozmožno.“

²⁷Togaš o Petar vakjergja Oleske: „Ekje amen muklem sa hem cidingem palo Tute; hem agjar, amen so ka ovel amen?“

²⁸A o Isus vakjergja lenge: „Čače vakjerava tumenge deka tumen – koj cidingen palo Mande - koga ka obnovinelpe sa ponovo, o Manušikano Čhavo ka bešel ko prestol ki Pli slava, hem korkori tumen ka bešen ko dešuduj prestojlja hem ka sudinen e dešuduje Izraeleskere plemenge. ²⁹Hem sekoj, koj baši Mlo anav ka mukel: kher, ili phralen, ili phejnen, ili dade, ili daja, ili romnja, ili čhaven, ili nive, ka priminel šelkratno hem ka nasledinel večno životo. ³⁰Ama but džene prva ka oven posledna, a o posledna prva.“