O rabotnikja ko drakha

¹„Soske o nebesno carstvo bešela manušeske domakini, koj iklilo rano sabajle te lel rabotnikja baši ple drakha. ²Hem koga pogodingjapes e rabotnikoncar po denarij* ko dive, bičhagjalen ko ple drakha.

³Hem koga iklilo palem negde o trito saati, dikhlja javera ko thana so bikinelape sar tergjona, bizo buti, ⁴hem vakjergja lenge: ‘Džan hem tumen ko mle drakha, pa ka dav tumen so ka ovel pravo!’ ⁵Hem ola gele.

A koga iklilo palem negde šovto saati hem o ejnato saati, kjergjale o isto.

⁶A negde dešujekto saati palem iklilo hem arakhlja javera, sar tergjona, hem vakjergja lenge: ‘Soske tergjona akate celo dive bizo buti?’

⁷Vakjerge leske: ‘Nikoj na leljamen.’

Ov vakjergja lenge: ‘Džan hem tumen ko mle drakha.’

⁸A koga ratilo o gospodari e drakhengoro vakjergja ple upraviteleske: ‘Vikin e rabotnikon hem platinlen, počmin taro posledna pa dži ko prva!’

⁹Hem agjar, so ale negde o dešujekto saati priminge po denarij. ¹⁰Koga ale o prva, pomislinge deka ka priminen poviše, ama hem ola priminge po denarij.

¹¹Štom priminge, počminge te žalinenpe protiv o domakini, ¹²vakjeribaja: ‘O posledna kjerge buti jek saati, a tu dengjanlen isto amencar, koj pretrpingem o pharipe e diveskoro hem o tatipe!’

¹³A ov odgovoringja jekeske taro olendar hem vakjergja: ‘Amala, na kjerava tuke nepravda, zarem na pogodingjantut mancar baši denarij? ¹⁴Le tlo hem dža tuke, a me mangava baši o posledno te dav kobor hem tuke. ¹⁵Ili zarem naeman pravo te kjerav so mangava mleja? Ili pak ti jak tani bilačhe, soske sijum šukar?’

¹⁶Agjar o posledna ka oven prva, a o prva posledna; soske but džene tale povikujme, a hari tane izbirime.“

O Isus džala ko Erusalim Pe učenikoncar

¹⁷Hem koga o Isus uklela sine ko Erusalim, lelja e Dešuduje Dženen nasamo hem vakjergja lenge ko drumo: ¹⁸„Ekje, džaja upre, ko Erusalim, hem o Manušikano Čhavo ka ovel lenge predajmo e prvo sveštenikonge hem e knižnikonge, hem ka osudinenle ko meriba, ¹⁹hem ka predajnenle e nevernikonge, za da te asan Leske, te kamšikujnenle hem te raspninenle, hem ko trito dive ka voskresninel.“

²⁰Togaš i daj e Zavedeskere čhavengiri ali Leske zaedno ple čhavencar, pokloningjapes Leske, za da te zamolinele nešto Ole.

²¹A Ov vakjergja lake: „So mangeja?“

Odgovoringja Leske: „Zapovedin akala mle duj čhave te bešen, jek tari Tli desno, a o javer tari Tli levo strana, ko Tlo Carstvo!“

²²A o Isus odgovoringja hem vakjergja: „Na džanena so rodena! Šaj li te pijenla i čaša, so ka pijavla Me, ili te krstinen tumen e krštevajneja koleja so krstinavama Me?“

Vakjerge Leske: „Šaj.“

²³Vakjergja lenge: „Mli čaša ka pijenla; hem e krštevajneja koleja krstinavama Me, ka krstinen tumen; ama te bešelpe tari Mli desno ili levo strana, odova na davale Me, nego ka pripadinel lenge okolenge, baši koj Mlo Dat spremingja.“

²⁴Hem koga šunge odova o deš džene, holjange e duje phralenge. ²⁵A o Isus povikujngjalen hem vakjergja: „Džanena deka o vladetejlja e narodongere gospodarinena upro lende hem deka o bare vladinenalen. ²⁶Neka ma te ovel agjare maškar tumende! Nego, koj mangela te ovel baro maškar tumende, neka ovel tumenge sluga! ²⁷Hem koj mangela te ovel prvo maškar tumende, neka ovel tumenge sluga; ²⁸sar so o Manušikano Čhavo na alo te služinen Leske, nego te služinel hem te del Pli duša baši otkup bute dženenge.“

²⁹A koga iklile taro Erihon, bari gužva cidingja pali Leste. ³⁰Hem ekje, duj korore, bešena sine uza ko drumo, šunge deka o Isus nakhela, hem vikinge vakjeribaja: „Gospodar, Davideskoro Čhavo, smilujntut amenge!“

³¹A i gužva zakaningjapes lenge te kjutinen, a ola vikinge panda posilno: „Gospodar, Davideskoro Čhavo, smilujntut amenge!“

³²Hem o Isus ačhilo, povikingjalen hem vakjergja: „So mangena te kjerav tumenge?“

³³Vakjerge Leske: „Gospodar, te phravgjon amare jajkha!“

³⁴Hem o Isus smilujngjape lenge hem dopringja olengere jajkha; hem odma dikhle hem cidinge pali Leste.

*Stiho 2: Jek denarij ko adava vreme tano vrednost sar jek dive plata baši jek rabotniko.