O Mesija khuvela ko Erusalim

¹Hem koga ale paše dži ko Erusalim hem ale ko Vitfagija uzi Maslinova Gora, togaš o Isus bičhagja duje učenikon, vakergja lenge: ²„Džan ko gav soj tano anglo tumende! Odori ka arakhen odma phanli herni hem tikno her olaja. Phraven len hem anen len Mange! ³Hem ako nekoj vakerela tumenge nešto, vakeren leske: ‘Potrebno tale e Gospodareske,’ hem odma ka mukel len.“

⁴A odova ulo, za da te ispolninel pes o vakerdo preku o proroko koj vakerela:

⁶O učenikja gele hem kerge, sar so zapovedingja lenge o Isus. ⁷Ange e herna hem e tikne here, čhige upro lende pumare šeja hem Ov bešlja upro lende.

⁸Poviše taro narodo buljakerge ple šeja ko drumo, a javera čhinenajne granke taro kašta hem buljakerenajne ko drumo. ⁹A i gužva, koja džala sine anglo Leste hem pali Leste vikinenajne, vakeribaja: „Osana* e Davideskere Čhaveske! Blagoslovimo tano koj avela e Gospodareske ko anav! Osana ko učipa!“

¹⁰Hem koga khugja ko Erusalim, celo diz ko pre, vakerena sine: „Koj tano akava?“

¹¹A o narodo vakerena sine: „Akavaj tano o Isus, Proroko taro Galilejsko Nazaret.“

¹²Hem o Isus khugja ko Hrami hem paldingja sarinen, koj kinena hem bikinena ko Hrami, pa prevrtingja o astajlja taro okola so meninena o pare, hem o tezge taro prodavačia e gulubengere, ¹³hem vakergja lenge: „Pišimoj tano: ‘Mlo Kher ka ovel vakerdo Kher Molitvake,’ a tumen kergenle peštera baši o razbojnikja.“

¹⁴Hem ale Leske korole hem sakatia ko Hrami, hem saskjargja len. ¹⁵A koga o prvosveštenikja hem o knižnikja dikhle o čudia so kergja len, hem o čhave, koj vikinena sine ko Hrami: „Osana e Davideskere Čhaveske!“ hojljange, ¹⁶hem vakerge Leske, „Šuneja li so kerena lafi akala?“

A o Isus vakergja lenge: „Oja, zarem na čitingen nikogaš:

¹⁷Hem muklja len hem iklilo tari diz ki Vitanija hem rakjargja odori.

¹⁸A koga tajsutno dive iranela pes sine ki diz, bokhalilo. ¹⁹Hem dikhlja smokva uzo drumo hem gelo dži late, ama na arakhlja ništo ki late, osven listia, hem vakergja lake: „Otakana te na ovel plodi tutar dovek!“ Hem i smokva šukili odma.

²⁰Hem koga o učenikja dikhle odova, čudinge pes hem vakerge: „Sar šukili i smokva odma?“

²¹O Isus odgovoringja: „Čače vakerava tumenge, ako isi tumen vera hem na sumninena tumen, ka keren na samo odova, so hem ulo e smokvake, nego ako vakerena akale planinake: ‘Vazde tut akatar hem frde tut ko more,’ ka ovel; ²²hem sa so ka roden ki molitva, veraja, ka dobinen.“

E Hristoskiri vlast

²³Hem koga o Isus alo ko Hrami, ale Leske – dži kote poučinela sine – o prvosveštenikja hem o narodna starešine, vakeribaja: „Save vlasteja kereja odova? Hem koj dengja Tut odoja vlast?“

²⁴A o Isus vakergja lenge ko odgovor: „Hem Meda ka pučav tumen nešto, pa ako vakerena Mange odova, hem Meda ka vakerav tumenge save vlasteja kerava akava. ²⁵Kotar sine e Jovaneskoro krštevanje? Taro nebo ili taro manuša?“

A ola razmislinge ki peste, vakerge: „Ako vakeraja ‘taro nebo’, ka vakerel amenge: ‘Soske na poverujngenle togaš?’ ²⁶A ako vakeraja ‘taro manuša’, daraja taro narodo, soske sarine računinena e Jovane baši proroko.“ ²⁷Hem odgovoringe Leske e Isuseske hem vakerge: „Na džanaja!“ Vakergja lenge hem Ov: „Ni Me nae te vakerav tumenge save vlasteja kerava akava.

O duj čhave

²⁸Ama, sar dikhjola tumenge? Jek manuš sinele duj čhave, pa alo uza ko prvo hem vakergja leske: ‘Mo čhavo, dža hem ker buti avdije ko drakha!’

²⁹Ov odgovoringja: ‘Na mangava’ – ama posle pelo pišmani hem gelo.

³⁰Alo uzo dujto čhavo hem vakergja oleskeda isto agjar.

A ov odgovoringja: ‘Džava, gospodare’ hem na gelo.

³¹Koj taro duj ispolningja e dadeskiri vojlja?“

Vakerge: „O prvo!“

O Isus vakergja olenge: „Čače vakerava tumenge, o carinikja hem o bludnikja ka isprevarinen tumen e Devleske ko carstvo. ³²Soske, o Jovan alo uza tumende palo drumo e pravdakoro hem na poverujngenle, a o carinikja hem o bludnikja poverujngele. A tumen dikhlen, ama na pokajngen tumen posle, za da te poverujnenle.

O bilačhe zemjodelcia

³³Šunen javer parabola! Sine jek domakini, koj sadingja drakha, zagradingja len živa ogradaja, hem ranlja dupka baši mečibaske o drakha; gradingja čuvarnica hem dengjale ki kirija e zemjodelconge, hem gelo peske ki javer phuv.

³⁴A koga alo paše o vreme e plodengoro, bičhagja ple slugen ko zemjodelcia, za da te kheden oleskere plodia. ³⁵Hem o zemjodelcia astarge oleskere slugen: jeke marge, a e javere mudarge, a e javere lelele barencar.

³⁶Palem bičhagja javere slugen, poviše taro o prva, ama hem olencar kerge isto.

³⁷Najposle bičhagjale ki lende ple čhave, vakergja: ‘Ka ladžan taro mlo čhavo!’

³⁸Ama o zemjodelcia – koga dikhle e čhave, vakerge maškar peste: ‘Akavaj tano o nasledniko! Ajde te mudarale hem te prisvojna oleskoro nasledstvo!’ ³⁹Hem astargele, frdingele avri taro drakha hem mudargele.

⁴⁰Koga ka avel o gospodari e drakhengoro, so ka kerel lenge odole zemjodelconge?“

⁴¹Odgovoringe Leske: „Akale bilačhe manušen ov bedno ka uništinel len, a o than e drakhencar ka del len ki kirija javere zemjodelconge, koj ka denle leske o plodia ko pravo vreme.“

⁴²O Isus vakergja lenge: „Zarem na čitingen nikogaš ko Pismia:

⁴³Odoleske vakerava tumenge, deka ka ovel tumendar lendo e Devleskoro Carstvo hem ka ovel dendo e narodoske, koj ka anel oleskere plodia! ⁴⁴Hem koj ka perel upro odova bar – ka phagelpe pes; a upro kaste ka perel ov – ka zdrobinele.“

⁴⁵Hem koga o prvosveštenikja hem o farisea šunge odola Leskere parabole, halile deka kerela lafi baši lenge. ⁴⁶Hem dikhena sine te astarenle, ama darana sine taro narodo, soske računinenale baši proroko.

*Stiho 9: O lafi Osana tano evrejsko lafi so značinela rodeja taro Devel spasenie hem deja slava e Devleske.