O Isus predupredinela e fariseen

¹Togaš o Isus vakjergja e narodoske hem pe učenikonge, ²vakjeribaja: „E Mojseske ko than bešle o knižnikja hem o farisea, ³odoleske sa so ka vakjeren tumenge – kjeren hem pazinen – ama ma postapinen sprema olengere dejlja, soske vakjerena, a na kjerena! ⁴Nego phandena phare hem nepodnesliva pharipe hem čhivenale upro dumo e manušenge, a korkori na mangena ni najeja te pomrdinen len.

⁵A sa ple dejlja kjerena len, za da te dikhen len o manuša; odoleske kjerena len pobare ple molitvena zapisia hem kjerena len bare o resia e šejengere; ⁶mangena len: o čelna thana ko veselbe hem o prva thana ko sinagoge; ⁷o pozdravia ko javna thana hem o manuša te vikinen len ‘Ravi.’*

⁸A tumen ma vakjeren tumen ‘Ravi’* – soske tano jek tumaro Učiteli – o Hristos, a tumen sarine sijen phrajlja. ⁹Hem nikas ki phuv ma vakjerenle tumaro dad, soske tano Jek tumaro nebesno Dad. ¹⁰Nitu te vakjeren tumen vodačia, soske tano Jek tumaro Vodači – o Hristos. ¹¹A o pobaro maškar tumende neka ovel tumenge sluga. ¹²Koj vazdelape pes – ka ovel ponizimo, a koj ponizinelape pes – ka ovel vozvišimo.

¹³Kerko tumenge, knižnikja hem farisea, licemerna, koj phandenale o nebesno carstvo anglo manuša: soske korkori tumen na khuvena, nitu mukena len andre okolen, koj mangena te khuven.

¹⁴Kerko tumenge, knižnikja hem farisea, licemerna, soske hana len o khera e udovicengere, hem baši odoja buti molinena tumen dugačko. Odoleske ka dobinen pobari osuda.

¹⁵Kerko tumenge, knižnikja hem farisea, licemerna, koj obikolinena o more hem i phuv, za da te pridobinen jek sledbeniko, hem koga ka ovel odova, kjerenale čhavo e pekoleskoro, duj puti pološno tumendar!

¹⁶Kerko tumenge, korole vodačia, koj vakjerena: ‘Ako nekoj dela pes sovli ko Hrami, nae tano ništo; ako pak dela pes sovli e Hrameske ko zlato, togaš tano dužno te kjerel odova!’ ¹⁷Bigogjakere hem korole! Soj tano pobaro: o zlato ili o Hrami, so osvetinelale e zlato? ¹⁸Hem: ‘Ako nekoj dela pes sovli ko žrtveniko, nae tano ništo, a ako dela pes sovli ko dari, soj tano upra leste, togaš tano dužno te kjerel odova.’ ¹⁹Korojralen! Soj tano pobaro: o dari ili o žrtveniko, so osvetinelale e dare? ²⁰Hem agjar, koj dela pes sovli ko žrtveniko, dela pes sovli ki leste hem ko sa soj tano upri leste. ²¹Hem koj dela pes sovli ko Hrami, dela pes sovli ki leste hem ko Okova, Koj živinela ki leste. ²²Hem koj dela pes sovli ko nebo, dela pes sovli e Devleske ko prestol hem ko Okova, Koj bešela ki leste.

²³Kerko tumenge, knižnikja hem farisea, licemerna, koj dena desetok taro nane, kopra hem kimin, a muklenle o považno ko Zakoni: i pravda, i milost hem i vera. Akava trebela sine te kjerel pes, a okova te na mukel pes! ²⁴Korole vodačia! Tumen cedinena te ikaven e mušica, a gltinena e kamila!

²⁵Kerko tumenge, knižnikja hem farisea, licemerna, koj čistinena avrijaldan i čaša hem i činija, a andre ola tale pherde čoribaja hem alčna! ²⁶Koroleja farisej, očistin angleder andrale i čaša, za da te ovel čisto hem avrijaldan!

²⁷Kerko tumenge, knižnikja hem farisea, licemerna, soske preličinena ko makhle grobia, so avrijaldan dikhjovena šuže, a andre pherde mulikane kokaloncar hem sekova melalipe! ²⁸Agjar hem tumen avrijaldan sikavena tumen lenge pravedna e manušenge, a andrale sijen pherde so licemerstvo hem bezzakonie.

²⁹Kerko tumenge, knižnikja hem farisea, licemerna, koj kjerena lenge grobia e prorokonge hem ukrasinena len lenge o spomenikja e pravednikongere, ³⁰hem vakjerena: ‘Ako živinaja sine ko dive amare dadengere, na ka ova sine lengere součesnikja ko rat e prorokongoro.’ ³¹Agjar svedočinena baši tumenge, deka sijen čhave okolengere, koj mudarge len e prorokon. ³²Hem tumen dopheren i mera tumare dadengiri! ³³Sapalen, sapeskere porodia! Sar ka našen taro sudo e pekoleskoro?

³⁴Odoleske, ekje, Me bičhavava tumenge: prorokja hem mudrecia, hem knižnikja. Olendar jeken ka mudaren hem ka raspninen len, a e javeren ka kamšikujnen len ko tumare sinagoge hem ka palden len tari diz ki diz, ³⁵za da te avel upro tumende celo pravedno rat, soj čhordo ki phuv taro rat e pravedno Aveleskoro dži ko rat taro Zaharija, o čhavo taro Varahij, kas so mudargenle maškar o Hrami hem o žrtveniko. ³⁶Čače vakjerava tumenge, sa odova ka avel upro akava pokolenie.

³⁷Erusalim! Erusalim, so mudareja e prorokon hem so leja len barencar e bičhavde ki tute! Kozom puti mangljum te khedav len te čhaven, sar so i kvačka khedela len ple piličken telo paka, ama na manglen! ³⁸Ekje, mukela pes tumaro kher pusto! ³⁹Soske vakjerava tumenge: otakana nae te dikhen Man dži kote na vakjerena: ‘Blagoslovimo tano Okova, Koj avela e Gospodareske ko anav!’“

*Stiho 7 hem 8: O lafi Ravi tano evrejsko lafi so značinela Učiteli.