Matej 25
O deš čhaja
1„Togaš o Nebesno Carstvo ka ovel sar deš čhaja, koj lele len ple lampe hem iklile te sretninenpe e džamutreja. 2Pandž olendar sine bigogjavera, a pandž gogjavera. 3Soske o bigogjavera lele peja lampe, ama na lele ujle; 4a o gogjavera lele ujle ko čare, ple lampencar. 5Soske o džamutro zabajngja pes, sarine dreminge hem zasukje.
6A ki ekvaš i rat šungja pes vikiba: ‘Ekje tano o džamutro, ikloven te arakhen tumen oleja!’
7Togaš sa okola čhaja uštile hem spreminge ple lampe. 8A o bigogjavera vakjerge e gogjaverenge: ‘Den amen taro tumaro ujle, soske amare lampe ačhovena.’
9Ama o gogjavera vakjerge lenge: ‘Za da ma te ovel hari hem baši amenge hem baši tumenge, džan ko trgovcia hem kinen tumenge!’
10Koga gele te kinen, o džamutro alo hem o spremna khuge oleja ko bijav, hem o vudar phanlilo.
11A palo odova ale hem o javera čhaja hem vakjerge: ‘Gospodare, Gospodare, phrav amenge!’
12Ama ov vakjergja lenge: ‘Čače vakjerava tumenge – na pendžarava tumen!’
13Hem agjar – oven spremna, soske na džanena ni o dive ni o saati!
O talantia
14Soske o nebesno carstvo šaj te sporedinelpe, jek manuš, koj angleder te cidel ko drumo, vikingja ple slugen hem predajngja lenge plo imot, 15hem jekeske dengjale pandž talantia,* a e dujtoneske duj, a e tritoneske jek, sekaske sprema oleskiri sposobnost, hem gelo ko drumo.
16Okova, koj primingja pandž talantia, odma gelo, kjergja trgovija olencar hem zaradingja javera pandž. 17Isto agjar, hem okova e duje talantencar, zaradingja javera duj. 18A okova, koj primingja jek gelo, ranlja ki phuv hem garagja o srebro ple gospodareskoro.
19Palo but vreme, alo o gospodari adale slugengoro hem dikhlja o računi olencar, 20hem koga alo leske okova, koj primingja pandž talantia, angja javera pandž talantia hem vakjergja: ‘Gospodar, dengjan man pandž talantia, a ekje, me zaradingjum hem javera pandž.’
21Togaš oleskoro gospodari vakjergja leske: ‘But šukar, mangleja hem verno sluga! Sijan sine verno ko hari, ka čhivav tut upreder but; khuv ko radost tle gospodareske!’
22A koga alo leske okova, koj primingja duj talantia, vakjergja: ‘Gospodar, dengjan man duj talantia, a ekje, me zaradingjum javera duj.
23Togaš oleskoro gospodari vakjergja leske: ‘But šukar, mangleja hem verno sluga! Sijan sine verno ko hari, ka čhivav tut upreder but; khuv ko radost tle gospodareske!’
24A koga alo leske okova, koj primingja jek talanti, vakjergja: ‘Gospodar, džangjum deka sijan tu strogo manuš, žnejneja kote so na sejngjan hem khedeja kote so na sadingjan; 25darandiljum, geljum hem garagjum tlo talanti ki phuv. Ekje, isi tut tlo!’
26A oleskoro gospodari vakjergja: ‘Bilačho hem mrzlivo sluga, džaneja deka žnejnava, kote so na sejngjum hem deka khedava, kote so na sadingjum; 27odoleske trebingja te dele sine mlo srebro e menuvačenge hem me – ko iranibe – ka lav sine mli kamata.
28Odoleske, len lestar o talanti hem denle okoleske, kas isi deš talantia! 29Odoleske sekas, kas isi, ka del pes leske panda hem ka ovele ko izobilstvo, a okova, koj naele, ka lel pes lestar hem odova so isile. 30A o beskorisno sluga frdenle akatar ko krajo ko karanluko: kote ka ovel rojba hem krckiba dandencar.’
O sudno dive
31Koga o Manušikano Čhavo ka avel ki Pli slava hem sa o angejlja Oleja, togaš ka bešel ko prestol Ple slavakiri; 32hem ka kheden pes angli Leste sa o narodia, a Ov ka odelinel len jek taro javera, sar so o pastiri delinela e bakhren taro buzna. 33Hem ka čhivel e bakhren tari Pli desno strana, a e buznen tari levo.
34Togaš o Caro ka vakjerel okolenge tari desno strana: ‘Aven, blagoslovime taro Mlo Dad, hem priminenle ko nasledstvo o Carstvo, kovaj tano tumenge spremimo taro sozdavanje e svetoskoro. 35Soske bokhaliljum hem dengen Man te hav; žedningjum hem dengen Man te pijav; sijum sine stranco hem primingen Man; 36sijum sine nango hem uravgen Man; sijum sine nasvalo hem posetingen Man; sijum sine ko phanlipa hem alen ki Mande.’
37Togaš o pravednikja ka vakjeren Leske: ‘Gospodar, koga dikhlem Tut bokhalo hem paragem Tut; ili žedno, hem dengem Tut te pije? 38Koga dikhlem Tut sar stranco hem primingem Tut? Ili nango hem uravgem Tut? 39Koga dikhlem Tut nasvalo ili ko phanlipa hem alem ki Tute?’
40A o Caro ka odgovorinel lenge: ‘Čače vakjerava tumenge, dži kote kjergen jekeske taro akala Mle najtikne phrajlja, Mange kjergen.’
41Togaš ka vakjerel lenge hem okolenge tari levo strana: ‘Džan tumenge Mandar, prokleta, ki večno jag, spremimi baši o beng hem baši oleskere angejlja! 42Soske bokhaliljum hem na dengen Man te hav; žedningjum hem na dengen Man te pijav, 43sijum sine stranco hem na primingen Man, sijum sine nango hem na uravgen Man, sijum sine nasvalo hem ko phanlipa hem na posetingen Man.’
44Togaš ola ka vakjeren Leske: ‘Gospodar, koga dikhlem Tut bokhalo, ili žedno ili sar stranco, ili nango ili nasvalo ili ko phanlipa, hem na pomožingem Tut?’
45Togaš ka odgovorinel lenge: ‘Čače vakjerava tumenge, dži kote na kjergen jekeske taro akala najtikne, ni Mange na kjergen!’
46Hem akala ka džan ki večno muka, a o pravednikja ko večno životo.“
*Stiho 15: O lafi talantia kjerelape lafi baši bari suma pare.