E Isuseskoro iskušenie

¹Togaš o Duho ingargja e Isuse ki pustina, za da te ovel iskušimo taro beng. ²Hem otkoga postingja saranda dive hem saranda rakja, najposle bokhalilo.

³Togaš o iskušuvači alo Leske hem vakjergja: „Ako sijan Devleskoro Čhavo, vakjer akala bara te oven mare!“

⁴A Ov odgovoringja: „Pišimoj tano: ‘O manuš na ka živinel samo taro maro, nego taro sekova lafi, so ikljola taro muj e Devleskoro.’“

⁵Togaš o beng ingargjale ki Sveto Diz, čhigjale ki pak e Hrameskiri, ⁶hem vakjergja Oleske: „Ako sijan Devleskoro Čhavo, frde Tut tele; soske tano pišimo:

‘Ka zapovedinel Ple angelenge baši tuke,’

hem:

‘ka ingaren tut ko vasta,
za da ma te khuve to pro ko bar.’“

⁷O Isus vakjergja leske: „Pišimoj tano palem: ‘Ma iskušinle e Gospodare, tle Devle!’“

⁸O beng palem ingargjale ki but uči gora hem sikagja Oleske sa o carstvia e svetoskere hem olengiri slava, ⁹hem vakjergja Oleske: „Ka dav Tut sa akava ako pereja hem poklonineja Tut mange.“

¹⁰Togaš o Isus vakjergja leske: „Dža tuke, satano, soske tano pišimo: ‘E Gospodareske, tle Devleske, ka poklonine tut hem ka služine samo Leske!’“

¹¹Togaš o beng mukljale hem ekje, angejlja ale hem služinge Oleske.

O Isus počminela te propovedinel hem te saskjarel

¹²A koga šungja deka o Jovan tano predajmo, cidingja pes ki Galileja. ¹³Hem otkoga muklja o Nazaret, alo hem selingja pes ko Kapernaum, uzo more, ki okolina Zavulon hem Neftalim, ¹⁴za da te phergjovel okova so vakjergja o proroko Isaija:

¹⁵‘I phuv Zavulon hem i phuv Neftalim,
ko drumo e moreskoro, tari javer strana e Jordaneskiri,
i Galileja e narodongiri;
¹⁶o narodo, koj bešela sine ko karanluko,
dikhlja bari Svetlina,
hem okolengeda, koj bešena sine
ko than kote soj i senka e meribaskiri,
olenge iklili i Svetlina te svetinel.’

¹⁷Od togaš o Isus počmingja te propovedinel hem te vakjerel: „Pokajnen tumen, soske o carstvo nebesno alo paše!“

¹⁸A koga džala sine uzo Galilejsko More, dikhlja len e duje phralen: o Simon vakjerdo Petar, hem o phral oleskoro o Andrej, sar frdena sine mreža ko more, soske sine ribajra, ¹⁹pa vakjergja olenge: „Aven pali Mande hem Me ka kjerav tumen ribajra manušengere!“ ²⁰A ola odma mukle o mreže hem gele pali Leste.

²¹Hem koga gelo odothar, dikhlja poadari javera duj phrajlja: o Jakov e Zavedeskoro hem o phral leskoro o Jovan, ko brodi lengere dadeja o Zavedej, sar poprajnena sine pumare mreže, hem vikingja len. ²²Ola odma mukle o brodi hem pe dade hem gele pali Leste.

²³Hem o Isus džala sine ki celo Galileja, sikavela sine ko olengere sinagoge hem propovedinela sine o Evangelie baši o carstvo, hem lečinela sine sekova nasvalipa hem sekoja slabost maškar o narodo. ²⁴Hem šujnakjergja pes glaso baši Oleske ki celo Sirija; hem anena sine ki Leste sa e nasvalen, koj cidena sine taro razno nasvalipa hem muke, demojna so isi ki olende, mesečajra, hem šlogirime, hem lečinela len sine.

²⁵Hem džana sine pali Leste bari gužva tari Galileja hem o Deš Diza, taro Erusalim hem Judeja, hem okoja strana taro Jordan.