Blagoslov hem nagrada baši o verno manuš

¹Aleluja!* Blaženo tano okova manuš, koj darala taro Gospodari, hem koj uživinela ko Oleskere zapovedia;

²Oleskoro potomstvo ka ovel silno ki phuv, blagoslov ka bešel upro pravedno pokolenie.

³O izobilstvo hem o barvalipe ka ovel ko leskoro kher, oleskiri pravda ka ačhovel zauvek.

⁴E pošteno manušenge thabljola svetlina ko karanluko: ola tane gudle, milostiva hem pravedna.

⁵Šukari tano e manušeske koj tano milostivo hem dela pomožinela, koj završinela pošteno ple bukja.

⁶Nikogaš nae te nišinelpe, e pravedniko ka pamtinenle večno.

⁷Nae te daral taro bilačhe haberia, mirno tano oleskoro srce, nadaja ko Gospodari.

⁸Oleskoro srce tano silno, taro ništo na darala, ov dikhela o periba ple dušmanengoro.

⁹Ov delinela, izobilno dela e čorolenge: oleskiri pravednost ka ačhovel zauvek, oleskiri šing slavno ka uštel upre.

¹⁰O grešniko ka dikhel odova holjamo, ka krckinel pe dandencar hem ka topingjovel, ka preperel i želba e bilačhengiri.

*Stiho 1: Aleluja značinela Slava e Devleske.