O pravedniko hem o bilačho

E Davideskoro Psalmi

¹Ma holjan baši okola bilačhipe so kjerena, nitu te zavidine okolenge, so kjerena bezzakonie.

²Šukjona sigate sar čar, oveninena sigate sar zeleno rastenie.

³Nadin tut ko Gospodari hem kjer šukar, živin ki phuv hem parav tut e čačipaja.

⁴Sa tli radost neka ovel ko Gospodari: hem Ov ka ispolninel o želbe taro tlo srce!

⁵Predajn len e Gospodareske tle drumia, nadin tut ki Leste, hem Ov ka vodinel sa.

⁶Tli pravednost ka svetinel sar svetlina, hem tli pravda sar ko vreme koga o kham najviše tharela.

⁷Smirin tut anglo Gospodari hem nadin tut ki Leste, ma nervirin tut zbog okova, koj napredujnela ko plo drumo, baši o manuš koj planirinela hem kjerela bilačhipe.

⁸Smirin ti holi hem ačhav to holjaniba, ma nervirin tut za da te na kjere bilačhipe.

⁹Soske o bilačhe ka oven uništime, a koj nadinelape ko Devel ka nasledinel i phuv.

¹⁰Panda hari hem nae te ovel o bilačho, ka rode oleskoro than, a le vekje nae te ovele.

¹¹O krotka ka nasledinen i phuv, hem ola ka uživinen ko izobilno mir.

¹²O bilačho mislinela bilačhipe e pravednikoske hem pe dandencar krckinela ki leste.

¹³A o Gospodari asala leske, soske dikhela deka avela oleskoro dive.

¹⁴O bilačhe ikavena mači hem cidena pumare strelke, za da te pejljaren okolen so nae len sila hem e čorolen, za da te čhinen okolen, so džana palo pravo drumo.

¹⁵E mačeja ka posaven pumaro srce, ka phagjon olengere strelke.

¹⁶O tikno barvalipe ko pravedniko tano but pošukar taro okova baro barvalipe e bilačhengoro.

¹⁷Soske o vasta e bilačhengere ka phagjon, a o Gospodari tano potkrepa e pravednikoske.

¹⁸O Gospodari grižinelape baši o životo okoleskoro so živinela česno, olengoro nasledstvo ka trajnel dovek.

¹⁹Nae te ladžakjeren pes ko vreme koga i tane ki nevolja, ka oven čale ko dive e bokhalipaskere.

²⁰A o bilačhe ka preperen, e Gospodareskere dušmajna ka šukjon sar luludi ki livada, ka našagjoven sar čuro.

²¹O bilačho lela bordži ama na iranela, o pravedniko darežlivo hem dela.

²²Okolen kas so o Gospodari ka blagoslovinel len, ka nasledinen i phuv, a kas ka prokolninel, ka oven uništime.

²³O Gospodari vodinela hem cvrsto kjerela len o korakja e šukar manušeskere, hem milo tano Oleske o drumo oleskoro.

²⁴Hem ako sopninelape, nae te perel, soske o Gospodari ikjerelale taro vas.

²⁵Terno sijum sine hem phuriljum, ama na dikhljum te ovel muklo pravedniko ili oleskere čhave te mangen peske maro.

²⁶Sekogaš i tane milostiva hem dena na zaem, o blagoslov tano upro olengoro potomstvo.

²⁷Cide tut taro bilačhipe hem kjer šukar, hem ka ačhove dovek.

²⁸Soske o Gospodari mangela i pravda hem Pe vernikon na mukela len. Zauvek ka oven arakhle, ka ovel uništimo o potomstvo e bilačhengoro.

²⁹O pravednikja ka nasledinen i phuv hem ka živinen dovek ki late.

³⁰E pravednikoskoro muj vakjerela mudrost, a oleskiri čhip vakjerela pravo.

³¹E Devleskoro zakoni tano leske ko srce, oleskere korakja nae te sopninenpe.

³²O grešniko pratinelale e pravedniko hem rodela te mudarele;

³³ama o Gospodari nae te mukele ko oleskere vasta hem na ka mukel te osudinenle ko sudo.

³⁴Nadin tut ko Gospodari, ikjer tut ko Oleskoro drumo; Ov ka vazdel tut hem ka nasledine i phuv; radosno ka dikhe i propast e bilačheskiri.

³⁵Dikhljum bilačho so naele milost, sar širinelape sar zeleno kaš.

³⁶Nakhljum hem ekje – nae talo vekje; rodingjumle, hem na arakhljumle.

³⁷Dikle okole bizo mahana soj talo, hem dikle okole soj tano česno; okova mir so kjerela isile potomstvo.

³⁸A sa o grešnikja ka oven otkornime, ka ovel uništimo o bilačho seme.

³⁹Taro Gospodari avela o spasenie baši o pravedna, Ovi tano olengoro than kote ka garavenpe ko bilačhe vremia.

⁴⁰O Gospodari pomožinela len, Ov izbavinela len: Ov ka izbavinel len taro bilačho hem ka spasinel len, soske rodena ki Leste te garavenpe.