O Gospodari čhigja me pre upri karpa

E Davideskoro Psalmi

¹Me nadingjum man cvrsto ko Gospodari, hem Ov telilo ki mande hem šungja mo vikiba.

²Ikalgja man tari strašno bari dupka e pharipaskiri, tari tinja hem čik; čhigja me pre upri karpa, me čekojra kergja len zorale.

³Ko mlo muj čhigja nevi gili, te falinelpe amaro Devel. But džene ka dikhen hem ka daran: hem ka nadinenpe ko Gospodari.

⁴Blaženo tano okova manuš, kaskiri nadež tani ko Gospodari, hem na čhivelape okolencar ko baro soj tane, nitu okolencar ko hovajbe so džana.

⁵O Gospodar, mo Devel, Tu kereja but čudia, hem but misle čudesna – koj šaj te sporedinelpe Tuja? Mangava te vakerav len hem te objavinav len, ama previše but tane za da te šaj te oven gejnde.

⁶Nae Tuke mila ni o žrtve ni odova so delape Tuke, nego phragjan me kana; na rodeja žrtve so denapes ko žrtveniko, ili pokajbaskoro dejbe.

⁷Togaš vakergjum: „Ekje, avava! Ko lil pišinela baši mange;

⁸milo mange tano, Gospodar, te ispolninav Ti vojlja, me ingarava To zakoni hor ko srce.“

⁹Ka propovedinav Tli pravda ko baro sobranie; hem nae te phandav mo muj; O Gospodar, saj Tuke tano pendžardo.

¹⁰Nae te garavav Ti pravda ko srce, ka raskažinav baši Tlo vernost hem baši Tlo spasenie. Nae te kjutinav baši Tlo šukaripa ni Tlo čačipa ko baro sobranie.

¹¹A Tu, O Gospodar, ma skratin mandar To šukaripa; Ti milost hem Tlo čačipa neka garaven man sekogaš.

¹²Soske opkružinge man bizobroj bilačhipa, mle bezzakonia resle man, agjar so našti te dikhav; isi len poviše taro bala taro mo šero, hem odoleske mo srce čhindilo.

¹³Gospodar, neka ovel tuke milo te ikave man; Gospodar, sigjar te pomožine man!

¹⁴Neka ladžan hem neka buninenpe sarine, so rodena te uništinen mo životo. Neka cidenpe hem neka ladžakerenpe okola, koj radujnenape ko mlo bilačhipe!

¹⁵Bar neka ačhon ki pli ladž, okola, koj vakerena mange „Xa, xa!“

¹⁶Neka radujnenpe hem neka veselinenpe ki Tute, sarine, koj rodena Tut! Neka vakeren sekogaš: „O Gospodari tano veličestveno!“ sarine, koj mangena Tlo spasenie.

¹⁷Me sijum čorolo hem ništoske, ama o Gospodari grižinelape baši mange. Tu sijan mi pomoš hem mlo Spasiteli; O mo Devel, ma zakasnin!