O Devel šunela i molitva

E Davideskoro Psalmi

¹O Gospodar, šun me lafia, le len ko obzir me misle odova so razmislinava.

²Šun mo glaso taro mlo vikiba, mo Caro hem mo Devel, soske Tuke molinava man!

³Sabajleskoro šuneja mo glaso; o Gospodar! Sabajleskoro bičhavava mi molitva ki Tute hem udžakerava.

⁴Soske Tu sijan Devel, Kaske nae tano šukar o bezzakonie; o bilačho nae te živinel ki Tute;

⁵nitu okola so kerenape ko baro našti tergjona te ikerenpe anglo Tle jajkha; Tu mrzineja sarinen so kerena bezzakonie.

⁶Ka uništine okolen, koj vakerena hovajbe; o Devel gadojnelape taro manuš soj žedno palo rat hem so hovavela.

⁷A me ka khuvav ko Tlo kher pali Tli bari milost; ka pokloninav man anglo Tlo sveto hrami, pherdo sajgijaja sprema Tute.

⁸Gospodar! Vodin man ki Tli pravda, baši mle dušmajna; ker ramno Tlo drumo anglo mande.

⁹Soske nae čačipe ko olengere muja, o srce lengoro tano pherdo bilačhipaja; olengoro krlo tano phravdo grobo, a pe čhibjaja vakerena angla tute šukar a palo tute to lafi kerena.

¹⁰Devla, računin len len baši kriva! Neka peren ko odova so korkori planiringe; palde len baši olengoro but baro broj bilačhe bukja so kerge, soske buningepe protiv Tute.

¹¹Hem ka veselinen pes sarine, koj so nadinenape ki Tute; uvek ka radujnenpe, soske Tu sijan lenge Pokriv kote so teli Tute garaveja len hem arakheja len; hem ka radujnenpe ki Tute okola koj mangena To Anav.

¹²Soske, Gospodar, Tu blagoslovinejale e pravedniko; arakhejale, Tle milosteja, sar štiti.