Molitva baši pokajanie hem nadež baši pomoš taro Devel

E Davideskoro Psalmi

¹Gospodar, ma akoš Tut mancar ko Tlo holjaniba, nitu te kaznine man ki Tli holi.

²Smilujn Tut mange, Gospodar, soske slabo sijum; Gospodar, saskjar man, soske mle kokala tresinena.

³Isto hem mi duša tani silno potresimi; a Tu, Gospodar, dži koga?

⁴Iran Tut, Gospodar, izbavin mi duša; spasin man zbog Tli milost,

⁵soske o mule na spomninena Tut; koj ka slavinel Tut telal ki phuv?

⁶Čhindiljum više taro mlo ofkiba; sekoja rat rojbaja sapankjerava mi postela; asvencar sapangjovela mo than kaj so pašljovava.

⁷Mi jak taro muke ačhola, slabojnela zbog sa mle dušmajna.

⁸Ciden tumen mandar sarine, so kjerena bezzakonie, soske o Gospodari šungja mo rojbe.

⁹O Gospodari šungja mo rodiba; o Gospodari primingja mi molitva!

¹⁰Neka ladžan hem neka daran sa mle dušmajna; neka iranenpe palal, odma neka ladžan!