Tit 2

Sar valjani te oven

¹A tu vaker baši okova so soglasinela pes e pravo naukaja: ²o phure trebela te ponašinenpe poozbilna ma te oven mate, te oven poštena, gogjavera, zrela ki vera, hem ko mangipe, hem ko trpenie; ³isto agjar o pophure džuvlja te ponašinen pes sar so bešela jeke džuvljake so verujnela ko Devel, te na keren nekaskoro lafi, te na oven but palo pibe mol, nego te sikaven ko odova soj tano šukar, ⁴za da te sikaven e terne džuvlen te mangen len pumare romen hem pumare čhaven, ⁵te oven gogjavera, čista, šukar domakice, pokorna pumare romenge, za da ma te hulinel pes e Devleskoro slovo.

⁶Isto agjar, opomenin e ternen te oven sar so valjani gogjavera, ⁷ov lenge primer ko sa baši šukar dejlja; koga sikaveja len, ov ozbilno hem iskreno. ⁸Ker lafi stabilno, za da nikoj te našti arakhel tuke disavo lafi te falinel, te ladžal sekova protivniko, te na ovele so te vakerel bilačhe baši amenge.

⁹Opomenin okolen soj tane robia, za da te pokorinen pes baši pumare gospodajra, so šaj te keren te ugodinen lenge, te na keren olencar protiv lafi, ¹⁰te na čoren, nego ko sa te sikaven pli šukar vera, ta te ukrasinen ko sa i nauka amare Spasiteleskiri hem Devel.

E Devleskiri blagodat anela spasenie

¹¹Soske pojavingja pes e Devleskiri blagodat, koja anela spasenie baši sa o manuša, ¹²koja sikavela amen te cida amen taro bilačhipe hem taro pohote e svetoskere, te živina gogjaver, pravedno hem devlikano ko avdisutno veko, ¹³hem adžikeraja te phergjol i blaženo nadež hem te pojavinelpe i slava amare bare Devleskiri hem Spasiteli, o Isus Hristos, ¹⁴Koj dengjape Korkori Pes ko than amenge, za da te izbavinel amen taro sekova bezzakonie hem te očistinel baši Peske sopstveno narodo, koj pripadinela Oleske, koj prastana baši šukar dejlja.

¹⁵Vakerle akava hem opomenin, hem vikin lenge celosno vlasteja. Nikoj te na dikhel tut but tele!