Tit 3
Spasingja amen pali Pli milost
1Potsetin len te pokorinen pes baši o načalstvia hem o vlastia, te šunen, te oven spremna baši sekova šukar delo, 2nikaske te na vakeren bilache lafia, te na prepirinen pes, te oven mirna, ko sa te sikaven poniznost sprema sa o manuša.
3Soske hem amenda sijem sine nekogaš bizogogjakere, na pokorinaja amen sine, našavde taro pravo drumo, robia sijem sine baši razna strastia hem zadovolstvia, živibaja ko bilačhipe hem zavist, mrzime hem mrzinaja amen sine jek javereja.
4Ama koga javingjape: o šukaripa hem o mangipe taro Devel amaro Spasiteli sprema ko manuša, 5spasingja amen na upra amare pravedna dejlja so kergem len amen, nego pali Pli milost preku so thogja amen hem ponovo bijangja amen, hem neve so kergja amen preku o Sveti Duh, 6o Devel Kas so mukljale te thavdel previše but upri amende preku o Isus Hristos, amaro Spasiteli, 7soske opravdingja amen preku Pli blagodat, za da te nasledina o večno životo ko kova nadinaja amen. 8Čače tano odova slovo, hem mangava akava te ikerele cvrsto; agjar so okola, koj verujnena ko Devel te trudinen pes hem te den pestar sa baši te keren šukar dejlja. Akavaj tano šukar hem korisno baši o manuša.
Izbegin len akala bukja
9A izbegin len: o glupava pučiba, o rodoslovije, o raspravije, hem o kavge baši o Zakoni, soske odova nae tano ništo korisno ni vredno.
10Izbegin taro manuš so verujnela bange, otkoga ka opomeninele jek duj puti, 11džandipaja deka asavko manuš cidingja pes taro odova soj ispravno hem deka grešinela, hem osudingjape korkori pes.
Te oven prva ko šukar dejlja
12Koga ka bičhavav len ki tute e Artema ili o Tihik, sigjar te ave ki mande ko Nikopol, soske rešingjum te nakhavav o jeven odori! 13Trudin tut dik so valjani lenge snabdin len baši drumoske e pravniko o Zina hem o Apolos, za da te ovel len sa so trebela lenge! 14Ama hem amare phrajlja te sikljoven te oven prva te keren šukar dejlja, kote soj tano odova čače potrebno, za da ma te oven bizo plodi.
15Pozdravinena tut sarine, koj tane mancar. Pozdravin okolen, koj mangena amen ki vera. I blagodat sarinencar tumencar. Amin!