О проповед таро Јован Крстител

¹О почеток таро Евангелие баши о Исус Христос, е Девлескоро Чхаво. ²Сар сој тано пишимо ко пророќа:

‘Еќе, Ме бичхавава Мло гласнико англо Тло муј,
кој ка спреминеле Тло друмо;
³о гласо околескоро, кој викинела ки пустина:
„Спреминен о друмо е Господарескоро,
израмнинен о друмиа Олескере.“’

⁴Јавинѓапес о Јован, крстибаја ки пустина хем проповедибаја е покајбаскоро крштевање баши опростиба е гревонге. ⁵Хем икљола сине ки лесте цело Јудејско страна хем са о ерусалимциа; хем ов крстинелален сине ки река Јордан, ко со ола исповединена сине пе гревиа.

⁶А о Јован сине уравдо ко шеја тари камилакере бала хем синеле кожно појас околу пи половина, хем хала сине скакулциа хем диво авгин. ⁷Хем проповединела сине, ваќерибаја: „Пало манде авела Посилно мандар; англо Касте на сијум достојно те тејљовав хем те пхравав Лескере каишиа Олескере сандалендар. ⁸Ме крстинѓум тумен ко пани, a Ов ка крстинел тумен ко Свети Дух.“

Е Исусескоро крштевање хем искушение

⁹Хем ко одова време, о Исус ало таро Назарет ки Галилеја, хем о Јован крстинѓале ко Јордан. ¹⁰Хем одма, џи коте икљола сине таро пани, дикхља: сар пхравдиле о небесиа хем о Духо сар хулела упро Лесте сар гулуби. ¹¹Хем шунѓапес гласо таро небо: „Ту сијан Мло мангло Чхаво; ки Касте тани Мли милина!“

¹²Одма пало одова о Духо ингарѓале ки пустина ¹³Хем сине ки пустина саранда диве, искушимо таро сатана. Хем сине машкар о ѕвејра; хем ангејља служинге Леске.

О Исус викинела е прво ученикон

¹⁴А откога о Јован сине предајмо, о Исус ало ки Галилеја, проповедибаја е Девлескоро Евангелие. ¹⁵Хем ваќерела сине: „О време пхердило, хем ало паше е Девлескоро Царство; покајнен тумен хем верујнен ко Евангелие!“

¹⁶Хем џандор узо Галилејско Море, дикхља е Симоне хем е Андреја, о пхрал е Симонескоро, сар фрдена мрежа ко море, соске сине рибајра. ¹⁷Хем о Исус ваќерѓа ленге: „Авен пали Манде хем Ме ка ќерав те овен рибајра манушенгере!“ ¹⁸Хем одма мукле о мреже хем цидинге пало Лесте.

¹⁹Хем кога накхља хари поадари дикхља: е Јакове, е Заведескоро Чхаво хем о пхрал лескоро о Јован – хем олен ко броди – сар попрајнена о мреже; ²⁰20 хем одма повикинѓален, хем мукле пе даде е Заведеја е работниконцар ко броди, цидинге пало Лесте.

Е Исусескоро проповед ко Капернаум хем ки Галилеја, чудиа

²¹Хем але ко Капернаум хем одма ки сабота, кхуѓа ки синагога хем поучинела сине. ²²Хем чудиненапе сине Олескере наукаке, соске учинелален сине сар Окова, Кој исиле власт, а на сар о книжниќа.

²³Тогаш ки оленгири синагога сине мануш, астардо таро нечисто духо, хем викинѓа, ²⁴ваќерибаја: „Ах! Со исиамен амен Туја, Исусе Назарејче? Дали аљан те уништине амен? Џанава Кој сијан Ту: е Девлескоро Светецо!“

²⁵Хем о Исус заканинѓапес леске: „Ќутин хем икљов олестар.“ ²⁶Хем о нечисто духо тресинѓале, викинѓа баре гласоја хем иклило лестар.

²⁷Хем сарине зачудингепес, аѓар со пученапе сине јек јавереја, ваќерибаја: „Сој тано акава? Неви наука – пхерди силаја! Заповединѓа ленге хем е нечисто духонге хем ола покориненапес Леске!“ ²⁸Хем одма ширисалило гласо баши Лесте ко са о стране, ки цело Галилејско околина.

²⁹Хем штом иклило тари синагога, ало ко кхер е Симонеске хем о Андреј, е Јаковеја хем е Јованеја. ³⁰А е Симонескири сасуј пашљола сине тари треска, хем одма ваќерге Леске баши лате. ³¹Ов ало лаке паше, астарѓала таро вас хем ваздинѓала; хем и треска мукљала, па служинѓа ленге.

³²А акшамескоро, пало кхам кога пело, анге Леске са е насвален хем бесна, ³³хем цело диз кхединѓапес англо вудара. ³⁴Хем исцелинѓа бутен, кој цидена сине таро разна болестиа; хем палдинѓа бут лошна духиа, хем на одобринѓа ленге е демоненге те ќерен лафи, соске џаненале сине.

³⁵А сабалескоро, џи коте панда сине каранлуко, уштило, иклило хем гело ко пусто тхан, хем одотхе молинелапе сине. ³⁶А о Симон хем окола, кој со сине олеја, геле пали Лесте те роденле, ³⁷хем кога аракхлеле, ваќерге Леске: „Сарине роденатут!“

³⁸Хем одговоринѓа ленге: „Те џа ко јавера паше гава, те проповединав хем одори, соске одолеске хем иклиљум.“ ³⁹Хем ало, проповедибаја ко оленгере синагоге ки цело Галилеја, хем палдибаја о нечиста духиа.

О сасќариба е мануше тари лепроза

⁴⁰Хем ало ки Лесте јек лепрозно, молинелале сине хем ко кочака теле, ваќерела сине Леске: „Ако мангеја, шај те очистинеман.“

⁴¹Хем смилујнѓапес леске, пружинѓа Пло вас хем астарѓале хем ваќерѓа леске: „Мангава! Ов чисто!“ ⁴²Хем одма и лепра гели песке Лестар хем уло чисто.

⁴³Хем предупрединѓале строго, хем одма бичхаѓале, ⁴⁴хем ваќерѓа леске, „Дик, никаске ништо те на ваќере! Него џа, сикавтут е свештеникоске, хем принесин баши тло очистување одова, со заповединѓа о Мојсеј – оленге баши сведоштво.“

⁴⁵А ов, штом гело песке, почминѓа те ширинел бут хем те раскажинел баши и случка, аѓар со о Исус нашти сине веќе јавно те икљол ки диз; него сине авријал, ко пуста тхана; а авена сине ки Лесте таро са о стране.