Матеј 28
Е Христоскоро воскресение
1А пали сабота, карши сабалескоро ко прво куркескоро диве, али и Марија Магдалена хем и јавер Марија те дикхен о гробо.
2Хем еќе, уло баро земјотрес, соске е Господарескоро ангели хулило таро небо, ало хем поместинѓа о бар хем бешља ки лесте. 3А о муј лескоро светинела сине сар молња, а олескере шеја – парне сар јив. 4Тари дар англи лесте, о стражајра треперинге хем уле сар муле.
5Тогаш о ангели ќерѓа лафи хем ваќерѓа е ромненге: „Тумен ма даран! Соске џанава дека родена е распниме е Исусе. 6Нае акате, соске воскреснинѓа, сар со ваќерѓа! Авен хем дикхен о тхан коте со пашљола сине. 7Хем џан сигате хем ваќерен Олескере учениконге дека воскреснинѓа таро муле хем еќе, Ов џала англедер туменде ки Галилеја. Одотхе ка дикхенле! Еќе, ваќерѓум туменге.“
8Хем ола иклиле одма таро гробо, дараја хем баре радостеја, хем прастандиле те ваќерен Олескере учениконге. 9Хем еќе, о Исус аракхљален хем поздравинѓален: „Радујнен тумен!“ А ола але Леске паше ки Лесте, астаргепе баши Олескере пре хем поклонингепес Леске. 10Тогаш о Исус ваќерѓа ленге: „Ма даран! Џан хем ваќерен Ме пхраленге, те џан ки Галилеја; хем одотхе ка дикхенман.“
11А кога џана сине, еќе, некој тарo стражајра але ки диз хем ваќерге е првосвештениконге баши са со сине уло. 12Хем ќергепес лафи е старешиненцар, хем советујнгепес, хем денге е војниконге бут сребрениќа 13хем ваќерге оленге: „Ваќерен дека Олескере учениќа але раќате хем чоргеле, џи коте амен соваја сине. 14Хем ако баши адава шунела о управители, амен ка убединале хем ка ќера тумен те на овелтумен грижа.“
15А ола леле о сребрениќа хем ќерге, аѓар сар со сикагелен. Хем одова лафи разгласинѓапес машкар о Јудејциа џи авдије.
16А о Дешујек учениќа геле ки Галилеја, ки гора, коте со сине определинѓа ленге о Исус. 17Хем штом дикхлеле, поклонингепе Леске, а некој сумнингепе.
18Тогаш о Исус ало ленге паше хем ваќерѓа ленге: „Денди Манге тани секоја власт ко небо хем ки пхув. 19Аѓар џан, ќерен са е народон Мле учениќа, крстиненлен ко анав е Дадеске хем е Чхавеске хем е Свети Духоске! 20Сикавенлен те пазинен са со заповединѓум туменге! Хем еќе, Ме Сијум туменцар ко са о диве џи ко крајо е светоскоро. Амин!“