О Исус исцелинела е бесно

¹Хем але тари јавер страна е морескири, ко Гадаринско крајо, ²хем кога иклило таро броди, одма ало англи Лесте таро гробиа мануш нечисто духоја. ³Ов живинела сине ко гробиа; никој нашти сине веќе ни синџиренцар те пханделе, ⁴соске бут пути пханденале сине синџиренцар хем чхиге леске састрна, ама ов секова пути чхинела сине о синџира, хем пхагела сине о састрна. Никој нашти сине те скротинеле. ⁵Хем стално, и рат хем о диве, сине ко гробиа хем ко ридиа, викибаја хем кхујбајапе коркори пес баренцар.

⁶Хем кога дикхљале е Исусе дуралдан, прастандило, пело ничкум англо Лесте, ⁷хем викинѓа силно гласоја: „Со иситут Тут манцар, Исусе, Чхаво е Севишно Девлескоро? Даватут совли ко Девел, ма мучинма!“ ⁸Соске ваќерѓа леске: „Икљов таро мануш, нечисто духо!“

⁹Хем пучљале: „Сар тано то анав?“ Хем ваќерѓа Леске: „Мо анав тано Легион, соске сијем бут.“

¹⁰Хем молинелале сине бут те на палделен таро одова крајо.

¹¹А одотхе, ко ридо, хана сине баро стадо бале. ¹²Хем замолингеле са о демојна, ваќерибаја: „Бичхал амен ко бале, те кхува ки ленде.“

¹³Хем дозволинѓа ленге, хем о нечисто духиа иклиле, хем кхуге ко бале, хем о стадо – околу дуј иљаде – муклепес таро брего ко море, хем тасавдиле ко море.

¹⁴А окола, кој аракхена сине е бален, нашле хем ширинге ваќерге ки диз хем ко гава, хем але о народо те дикхен со уло. ¹⁵Хем кога але ко Исус хем дикхле е бесно – ки касте сине о Легиони – сар бешела уравдо хем гоѓавер, дарандиле.

¹⁶А окола, кој со сине дикхле, раскажинге ленге со уло е бесноја хем е баленцар. ¹⁷Хем почминге те молиненле те џал песке таро оленгоро крајо.

¹⁸А кога кхувела сине ко броди, одова со сине астардо таро демојна, молинелале сине те овел Олеја. ¹⁹Ама на одобринѓа леске, него ваќерѓа леске: „Џа кхере ке тле, хем раскажин ленге со ќерѓа туке о Господари хем сар смилујнѓапес туке.“

²⁰Хем гело хем почминѓа те раскажинел ко Десеттоградие со ќерѓа леске о Исус; хем сарине чудиненапес сине.

О Исус ваздела е чхаја таро муле

²¹Хем кога о Исус палем накхља e бродеја тари јавер страна, бут народо кхедингепес ки Лесте, а Ов сине узо море. ²²Хем ало јек таро началниќа е синагогакере, ко анав Јаир, хем кога дикхљале, пело англи Олескере пре. ²³Хем молинелале сине бут, ваќерибаја: „Мли чхај тани мерибаја, ава хем чхив те васта упро лате – за да те овел спасими хем те живинел.“

²⁴Хем гело олеја. Хем бут баро народо џала сине пали Лесте хем мечиненале сине.

О сасќариба е џувља со сине насвали

²⁵Хем јек ромни, која цидела сине таро крвотечение дешудуј берш, ²⁶хем претрпинѓа бут таро бут доктојра хем трошинѓа цело пло имот, а таро одова на сине нисаво корист, него уло лаке панда полошно, ²⁷откога шунѓа баши о Исус, али машкар о народо, палалдан, хем допринѓапе џи ко Олескере шеја, ²⁸соске ваќерела песке сине: „Ако допринавама само хем џи ко Олескере шеја, ка спасинама.“ ²⁹Хем одма хем чхинавсалило о крвотечение хем ој осетинѓа ко тело дека тани излечими таро болест.

³⁰А о Исус осетинѓа одма ки Песте, дека сила иклили таро Олестар, иранѓапе машкар о народо хем ваќерѓа: „Кој допринѓапес џи ко Мле шеја?“

³¹Олескере учениќа палем ваќерге: „Дикхеја дека народо мечинелатут, хем ваќереја: ‘Кој допринѓапес џи ки Манде?’“

³²Хем Ов дикхела сине наоколу, за да те дикхел, кој ќерѓа одова. ³³А и ромни, ки дар сине хем тресинела – соске џанела сине со уло олаја – али хем пели англи Лесте хем ваќерѓа Леске са о чачипе.

³⁴А Ов ваќерѓа лаке: „Ми чхај, тли вера спасинѓатут! Џа туке миреја хем ов састи тари тли болест!“

³⁵Џи коте панда лафи ќерела сине, але таро кхер е началникостар тари синагога хем ваќерге леске: „Ти чхај мули! Соске мучинејале панда е Учителе?“

³⁶А о Исус, кога шунѓа о лафи со ваќергеле, ваќерѓа е началникоске тари синагога: „Ма дара! Само верујн!“ ³⁷Хем никаске на дозволинѓа те џал Олеја, освен е Петреске, о Јаков хем о Јован, о пхрал е Јаковескоро.

³⁸Хем але ко кхер е началникоске; хем дикхља галама, дека ровена сине хем викинена бут, ³⁹хем кога кхуѓа ваќерѓа ленге: „Соске викинена хем ровена? О максми нае тано муло, него совела!“ ⁴⁰Хем асандиле Леске. А Ов палдинѓа саринен авријал, леља: е даде е максмескере, хем е даја хем окола со сине Олеја, хем кхуѓа отхе коте со сине о максми.

⁴¹Хем кога астарѓа е максме таро вас ваќерѓа лаке: „Талита кум!“ – со значинела „Чхаје, Ме ваќерава туке, ушти!“ ⁴²Хем и чхај уштили одма хем пхирела сине, соске синела дешудуј берш. Хем одма чудингепес бут. ⁴³Хем заповединѓа ленге строго никој те на дознајнел баши одова, хем ваќерѓа те денла те хал.