О Исус нае признајмо ко Назарет

¹Хем гело одотхаре хем ало ко Пло бијандо крајо, а Олескере учениќа џана сине пало Лесте. ²А кога ало сабота, почминѓа те поучинел ки синагога, хем бут џене, кој шунѓе, чудинѓепес хем ваќерѓе: „Котар тано акава Леске? Хем сави тани и мудрост соj тани денди Леске? Хем саве чудиа ќерена Олескере васта? ³Нае ли тано акава дрводелцо, о Чхаво е Маријакоро, хем о пхрал е Јаковескоро, хем Јосимин, хем Јудин хем Симонов? Хем нае ли тане Олескере пхејна акате машкар аменде?“ Хем соблазнинѓепес ки Лесте. ⁴А о Исус ваќерѓа ленге: „О пророко нае тано бизо чест, освен ко пло бијандо крајо, хем машкар пли фамилија хем ко Пло кхер.“

⁵Хем нашти сине одотхе те ќерел нисаво чудо, освен со исцелинѓа хари насвален, чхиѓа пе васта упро ленде. ⁶Хем чудинѓапе баши оленгере неверие. Хем обиколинела сине околу о гава хем поучинела сине.

И мисија е апостоленгири

⁷Хем повикујнѓа е Дешудује Џенен; почминѓа те бичхавелен по дуј џене, хем денѓален власт упро нечиста духиа. ⁸Хем заповединѓа ленге те на ингарен ништо баши друмоске освен јек каш: ни маро, ни торба, ни паре ко појас, ⁹него те овен уравде ко сандале, хем те на уравен по дуј шеја.

¹⁰Хем ваќерѓа ленге: „Коте хем да те кхувен ко кхер, ачховен отхе, џи коте на икљовена одотхаре. ¹¹А ако на приминена тумен хем на шунена тумен, икљовен одотхаре хем тресинен о право таро тумаре пре, оленге баши сведоштво!“

¹²Хем иклиле хем проповединена сине дека требела о мануша те покајненпес, ¹³хем изгонинена сине демојна, хем бут насвале помазинена сине со маслиново ујље хем сасќаренален сине.

О мериба е Јован Крстителескоро

¹⁴Хем о царо о Ирод шунѓа, соске Олескоро анав сине прочујмо, хем ваќерела сине: „О Јован Крстител уштило таро муле хем одолеске дејствујнена о силе ки лесте!“ ¹⁵Јавера палем ваќерена сине, дека тано о Илија; а јавера ваќерена тано Пророко, или сар јек таро пророќа.

¹⁶Ама кога о Ирод шунѓа, ваќерѓа: „О Јован, каскоро ме чхинѓум о шеро, ов уштило таро муле.“ ¹⁷Уствари, о Ирод бичхаѓа хем астарѓа е Јоване хем пханљале ки темница, баши и Иродијада, и ромни олескере пхралескири о Филип, соске женинѓапес олаја, ¹⁸соске о Јован ваќерела сине е Иродеске: „Нае туке тано дозволимо те овелтут е ромна тле пхралескири!“

¹⁹А и Иродијада сине хољами леске хем мангела сине те мудареле, ама нашти сине. ²⁰Соске о Ирод дарала сине таро Јован, џандипаја дека тано мануш праведно хем свето, хем пазинелале сине; хем кога шунелале сине, бунинелапе сине бут, ама сепак шунелале сине задоволствеја.

²¹Хем кога ало погодимо диве, кога о Ирод ко пло роденден, денѓа вечера пле кнезонге, е војводенге хем е галилејско прваконге; ²²кхуѓа е Иродијадакири чхај хем кхелѓа хем угодинѓа ленге е Иродеске хем околенге со пружинѓепе олеја, хем о царо ваќерѓа е чхајаке: „Роде мандар со мангеја хем ка давтут.“ ²³Хем денѓапес лаке совли: „Со хем да те роде мандар, ка давтут – џи ко екваш таро мло царство.“

²⁴А ој иклили хем ваќерѓа пе дајаке: „Со те родав?“

А ој ваќерѓа: „О шеро е Јован Крстителескоро.“

²⁵Хем одма, откога кхуѓа, сигате ко царо родинѓа, ваќерибаја: „Мангава те деман, акана одма, ко послужавнико о шеро е Јован Кристителескоро.“

²⁶Хем о царо бут тужнисалило ама баши и заклетва хем окола со бешена сине олеја, на мангела сине те одбинела. ²⁷Хем о царо одма бичхаѓа стражари хем нарединѓа леске те анел олеске олескоро шеро. Хем ов гело, чхинѓа о шеро лескоро ки темница, ²⁸хем анѓа о шеро лескоро ко послужавнико хем денѓале е чхајаке, а и чхај денѓале пе дајаке.

²⁹А кога олескере учениќа шунѓе, але хем леље олескоро тело хем чхиѓеле ко гробо.

О Исус паравела панџ илјаде манушен

³⁰Хем о апостојља кхединѓепес ко Исус хем известинѓеле баши о са со ќерѓе хем со поучинѓе. ³¹Хем ваќерѓа ленге: „Авен тумен коркори ко пусто тхан хем одморинен хари!“ Соске, бут џене авена хем џана песке, хем на синелен време ниту те хан.

³²Хем геле бродеја ко пусто тхан насамо. ³³Ама дикхљелен кога геле хем бут џене пенџарѓеле хем прастандиле пешки таро са о диза, хем ресље англедер оленде. ³⁴А кога иклило таро броди дикхља бари гужва хем пело Леске жал баши оленде, соске сине сар бакхре бизо пастири, хем почминѓа те поучинелен бут.

³⁵Хем соске о време накхља доста, Олескере учениќа але Леске хем ваќерѓе Леске: „О тхан тано пусто, а веќеј тано касно. ³⁶Муклен, за да те џан ко околна колибе хем гава, хем те ќинен песке нешто те хан!“

³⁷А Ов одговоринѓа хем ваќерѓа: „Денлен тумен те хан!“

Ваќерѓе Леске: „Те џа ли те ќина маро баши дујшел денарии хем те дален те хан?“

³⁸А Ов ваќерѓа ленге: „Кобор маре иситумен? Џан хем дикхен!“

Хем кога дознајнѓе, ваќерѓе: „Панџ, хем дуј мачхе.“

³⁹Хем заповединѓа ленге те наместинен саринен ко групе, ки зелено чхар. ⁴⁰Хем бешље ко групе по шел хем пинда.

⁴¹Хем леља о панџ маре хем о дуј мачхе, дикхља ко небо, благословинѓа хем пхагља о маре, па денѓа е учениконге те чхивенлен англи ленде; хем о дуј мачхе разделинѓален сариненге.

⁴²Хем сарине хале хем чалиле. ⁴³Хем ваздинѓе дешудуј корпе пхерде марале залагонцар, хем таро мачхе, ⁴⁴а одола со хале маро, сине околу панџ иљаде мурша.

О Исус пхирела ко пани

⁴⁵Хем одма чхиѓа Пле ученикон те кхувен ко броди хем те џан порано тари јавер страна, ки Витсаида, џи коте Ов мукхела е народон. ⁴⁶Хем откога гело песке олендар, гело ки гора те молинелпес.

⁴⁷А раќакоро о броди сине машкар о море, а Ов коркори ки пхув. ⁴⁸Хем кога дикхљален сар мучиненапес веслибаја, соске и бавлал сине ленге спротивно, околу штарто раќакири стража, ало џи ки ленде, пхирибаја ко море, хем мангела сине те накхелен. ⁴⁹А ола кога дикхљеле сар пхирела ко море, мислинѓе дека тано духо, хем виќинѓе, ⁵⁰соске сарине дикхљеле хем дарандиле.

Ама Ов одма ќерѓа ленцар лафи хем ваќерѓа ленге: „Овен храбра! Ме сијум! Ма даран!“ ⁵¹Тогаш кхуѓа ки ленде ко броди, хем и бавлал смиринѓапес. Ола чудинѓепес бут ки песте, ⁵²соске на халиле о чудо е маренцар, него о срце сине ленгоро закоравимо.

⁵³Хем кога накхље, але ки пхув ко Генисарет хем иклиле. ⁵⁴Кога иклиле таро броди, одма пенџарѓеле, ⁵⁵прастандиле тари цело одоја околина хем почминѓе те анен насвален, ки постела, коте со шунѓе дека тано Ов. ⁵⁶Хем коте хем да те кхувел сине ко гава или диза, или ко ниве, ко тхана коте со бикинелапе чхивена сине е насвален хем молиненале сине те доприненле барем џи ко ресиа таро Олескере шеја. Хем сарине, кој астаренале сине исцелиме.