И чачикани чистота

¹Хем кхедингепес околу Лесте о фарисеа хем некој таро книжниќа, кој сине але таро Ерусалим, ²хем дикхле дека некој таро олескере учениќа хана маро мелале, уствари битховде вастенцар.

³Соске о фарисеа хем са о Јудејциа – иќерибаја џи ко обичаја е пхуренгере – на хана, ако на тховена пе васта џи ко лактиа; ⁴хем кога ка ираненпес таро пазари, на хана, ако на тховенапес. Хем иси панда бут јавер, со приминге те одржиненле: тхојбе о чаше, о букали, бакарна чаре хем столице.

⁵Хем аѓар, о фарисеа хем о книжниќа пучлеле: „Соске Тле учениќа на живинена според о обичаја е пхуренгере, него хана маро битховде вастенцар?“

⁶А Ов ваќерѓа ленге: „Шукар пророкујнѓа о Исаија баши туменге лицемејра, сар сој тано пишимо:

‘Акава народо поштојнелама мујеја,
а оленгоро срце тано дур Мандар;
⁷ко чучо поштојненама,
сикајбаја науке, сој тане манушикане заповедиа.’

⁸Тумен мукена е Девлескири заповед, а иќерена манушикано обичај.

⁹Тумен шукар чхинавенала“ – продолжинѓа Ов – „е Девлескири заповед, за да те иќерен тумаро обичај! ¹⁰Уствари, о Мојсеј ваќерѓа: ‘Поштојн те даде хем те даја’ хем ‘Кој ка деле армајна пе даде хем пе даја, те овел казнимо мерибаја!’ ¹¹А тумен ваќерена: ‘Ако некој ваќерела пе дадеске или пе дајаке: „Одова колеја би шај те издржинавту тано курбани,“’ уствари бакшиши е Девлеске, ¹²на мукенале веќе те ќерел со хем било баши пло дат хем баши пли дај. ¹³Хем аѓар чхинавена е Девлескоро слово тумаре обичајеја, со тумен предајнгенле, хем ќерена бут јавера буќа слична ко акава.“

¹⁴Тогаш палем викинѓа е народо ки Песте хем ваќерѓа ленге: „Шуненма сарине хем хајљовен! ¹⁵Нае ништо, авријалдан таро мануш, со би шај те ќереле нечисто кога ка кхувел ки лесте; него окова со икљола таро мануш, одова ќерелале нечисто. ¹⁶Кас иси кана, нека шунел!“

¹⁷Одма, кога цидинѓапе подур таро народо, Ов кхуѓа ко јек кхер, Олескере учениќа пучлеле баши смисла е параболакири.

¹⁸Ов ваќерѓа ленге: „Аѓар! Зарем хем туменда на хајљовена? На сватинена ли дека ништо нашти те ќереле е мануше нечисто, со кхувела авријалдан ки лесте, ¹⁹соске на кхувела ко олескоро срце, него ко воги хем џала ко одредимо тхан?“ Аѓар прогласинѓа са о хајба баши чиста.

²⁰Исто аѓар ваќерела сине ленге: „Окова со икљола е манушестар, одова ќерелале нечисто, ²¹соске, андралдан, таро е манушескоро срце, икљовена грешна мисле, кој водинена ко неморал, чориба, мудариба, ²²прељуба, алчност, билачхипа, ховајба, завист, навреде, горделивост, хем бигоѓакере буќа. ²³Са одола билачхипа икљовена андралдан хем ќеренале нечисто е мануше.“

О Исус исцелинела е чхаја астарди таро нечисто духо

²⁴Уштило одотхаре хем гело ко Тирско хем Сидонско Крајо. Кхуѓа ко јек кхер хем мангља сине никој те на дознајнеле. А нашти сине те ачховел гаравдо. ²⁵Кога шунѓа баши Леске јек ромни, каскири чхај сине астарди таро нечисто духо, ој али хем пели англо Олескере пре. ²⁶А одоја ромни сине Елинка, родум Сирофеничанка. Хем молинелале сине те палдел е демоне тари лакири чхај.

²⁷А Ов ваќерѓа лаке: „Мук прво те чајљовен о чхаве, соске нае тано шукар те лелпес лендар о маро е чхавендар хем те фрделпес е џуќеленге.“

²⁸Ој палем одговоринѓа: „Оја, Господар! Ама хем о џуќела тели софра хана таро трошке е чхавендар.“

²⁹Хем ваќерѓа лаке: „Баши одова лафи – џа туке – о демони иклило тари ти чхај.“ ³⁰Хем иранѓапес кхере хем аракхља е максме сар пашљола ки постела, а о демони иклило.

О Исус сасќарела е лалоре кашуке

³¹Хем кога иклило палем таро предејља е Тирескере, ало – преку Сидон – џи ко Галилејско Море, машкар о предејља таро Десетоградие. ³²Хем анге Леске кашуко лалоро хем молиненале сине те чхивел По вас ки лесте.

³³Хем ингарѓале насамо таро народо, чхиѓа Пле наја ко олескере кана, хем чхунгарѓа хем допринѓа олескири чхип; ³⁴дикхља ко небо, воздивнинѓа хем ваќерѓа леске: „Ефата!“ – уствари: „Пхравтут!“ ³⁵Хем одма пхравдиле о кана лескере хем пхравдили и врска олескере чхибјатар хем ќерела сине лафи чисто.

³⁶Хем заповединѓа ленге никаске те на ваќерен. Ама кобор повише нарединела ленге Ов, добором повише ола раширинена сине. ³⁷Хем превише чудиненапес сине хем ваќерена: „Са шукар ќерела! Хем е кашукен ќерела те шунен, хем е лалорен те ќерен лафи!“