О царо кој ќерела бијав

¹Хем о Исус почминѓа палем те ваќерел ленге ко параболе, ваќерибаја: ²„О небесно царство дикхјола сар о царо, кој ќерѓа бијав пле чхавеске. ³Хем бичхаѓа пле слуген те викинен е канимен ко бијав, ама ола на мангле те авен.

⁴Палем бичхаѓа јавере слуген, ваќерибаја: ‘Ваќерен е канименге: „Еќе, спреминѓум мо ручко, мле јунциа хем попрајме тане чхинде, хем сај тано готово. Авен ко бијав!“’

⁵А ола ни мислинге баши одова хем геле песке: јек ко пло имот, а јавер ки пли трговија; ⁶а јавера астарге олескере слуген, навредингелен хем мударгелен.

⁷А о царо хољанѓа, бичхаѓа пле војска хем мударѓа одолен убијцон хем тхарѓа оленгири диз. ⁸Тогаш ваќерѓа ленге, пле слугенге: ‘И веселба тани готово! Ама о каниме на сине достојна. ⁹Одолеске икљовен ко раскрснице хем кобор ка аракхен, каниненлен ко бијав.’

¹⁰Хем о слуге иклиле ко друмиа хем ангелен саринен, кас со аракхле: е билачхен хем е шукарен, хем о бијав пхердило гостенцар.

¹¹А кога о царо кхуѓа те диххел е гостен, дикхља отхе јек мануш, кој на сине уравдо бијавескере шеја. ¹²Хем ваќерѓа леске: ‘Амала, сар кхуѓан акате бизо бијавескере шеја?’ А ов ќутинела сине.

¹³Тогаш о царо ваќерѓа е служителенге: ‘Пханден олескере пре хем о васта хем фрденле ко крајно каранлуко; одотхе ка овел ројба хем крцкиба данденцар!’

¹⁴Соске бути тане повикујме, ама хари тане избириме!“

Баши платиба даноко

¹⁵Тогаш о фарисеа геле хем договорингепес сар те астаренле ко лафи. ¹⁶Хем бичхаге Леске пле ученикон, заедно е Иродовценцар, за да те ваќерен Леске: „Учителе, џанаја дека сијан чачутно хем дека ко чачипе учинеја е манушен е Девлеске ко друмо, хем нае туке грижа никастар, соске на дикхеја ко лико е манушенге. ¹⁷Хем аѓар, ваќер аменге, со мислинеја Ту: дали тано дозволимо те делпес даноко е цароске или на?“

¹⁸А о Исус халило оленгоро лукавство хем ваќерѓа: „Соске искушиненама, лицемејра? ¹⁹Сикавен Манге даночно монета!“ Ола анге Леске денариј.

²⁰Хем ваќерѓа ленге: „Каскоро тано акава лико хем о натпис?“

²¹Ваќерге Олеске: „Е цароскоро!“
Тогаш ваќерѓа ленге: „Денле е цароскоро е цароске, а Девлескоро е Девлеске!“

²²Хем штом шунге одова, чудингепес, па муклеле хем геле песке.

Баши о воскресение е муленгоро

²³Ко одова диве але ки Лесте о садукеа, кој ваќерена кај нае воскресение, хем пучлеле: ²⁴„Учителе, о Мојсеј ваќерѓа: ‘Ако некој мерела бизо чхаве, олескоро пхрал нека лела олескере ромња хем нека ваздел леске потомство пе пхралеске.’ ²⁵А ки аменде сине евта џене пхрајља: о прво женинѓапес хем муло, а пошто на синеле породо, мукља пле ромња пе пхралеске. ²⁶Аѓар хем о дујто, хем о трито, са џи ко евтато; ²⁷а пало сарине мули хем и ромни. ²⁸Хем аѓар, ко воскресение каске таро евта џене ка овел леске ромни? Соске сарине сине ола!“

²⁹А о Исус одговоринѓа ленге хем ваќерѓа ленге: „Ки заблуда сијен, соске на џанена о Писмиа, ниту е Девлескири сила. ³⁰Соске ко воскресение ниту ка лен песке ромни ниту ка лен песке ром, него тале сар Девлескере ангејља ко небо. ³¹А баши о воскресение е муленгоро, на читинген ли со ваќерѓа туменге о Девел, Кој ваќерела: ³²‘Ме сијум о Девел е Авраамескоро, о Девел е Исакоскоро хем о Девел е Јаковескоро’? А о Девел нае тано Девел е муленгоро, него е џивденгоро.“

³³Хем кога о народо шунѓа одова, чудиненапес сине Олескере наукаке.

³⁴А кога о фарисеа шунге дека ќутинќерѓален е садукеен, кхедингепес заедно, ³⁵хем јек олендар, законико, пучљале, те искушинеле: ³⁶„Учителе, која тани и бари заповед ко Закони?“

³⁷А Ов ваќерѓа леске: „’Мангле е Господаре тле Девле са тле срцеја, хем са тле душаја хем са тле гоѓаја!’ ³⁸Одовај тани и најбари хем и прво заповед; ³⁹а о дујто тани сар хем акаја: ‘Манг тле паше сар туте!’ ⁴⁰Ко одола дуј заповедиа висинена цело Закони хем о Пророќа.“

О Месија е Давидескоро Чхаво хем о Господари

⁴¹А кога о фарисеа сине кхедиме, о Исус пучљален: ⁴²„Со мислинена баши о Христос? Каскоро Чхаво тано?“

Ваќерге Олеске: „Е Давидескоро.“

⁴³Ваќерѓа ленге: „Сар тогаш о Давид, преку о Духо, ваќерелале ‘Господар,’ ваќерибаја:

⁴⁵Хем аѓар, кога о Давид ваќерелале ‘Господар,’ сар тано Олеске Чхаво?“

⁴⁶Хем никој нашти сине те одговоринел Олеске ниту лафи, ниту некој осмелинѓапес, таро одова диве, веќе те пучеле.