О Исус англо Пилат

¹А кога дисило авријал, са о свештениќа главатојра хем о народна старешине ќерена сине лафи против о Исус, за да те мударенле. ²Хем пханлеле, ингаргеле хем предајнгеле е управителеске о Понтиј Пилат.

³Тогаш о Јуда, кој предајнѓале, откога дикхља дека осудингеле, покајнѓапес хем иранѓа о тријанда сребрениќа е првосвештениконге хем е старешиненге, ⁴ваќерибаја: „Грешинѓум, соске предајнѓум невино рат.“

А ола ваќерге леске: „Со иси амен амен одолеја? Одовај ти бути!“

⁵Тогаш фрдинѓа о сребрениќа ко Храми, иклило хем гело хем обесинѓапес.

⁶А о првосвештениќа леле о сребрениќа хем ваќерге: „На овела те мукенпес е храмеске ки благајна, соске тано цена баши о рат.“ ⁷Него, откога ќергепе лафи, кинге оленцар и Грнчарево Нива баши гробиа баши странциа. ⁸Одолеске одоја нива џи авдије викинелапес Ратвали Нива. ⁹Тогаш исполнинѓапес о ваќердо преку о пророк Еремија, кој ваќерела:

‘Хем леле о тријанда сребрениќа,
и цена е Оценимескири,’
Кас со оценинге е Израелескере чхаве,
¹⁰‘хем денгелен баши и Грнчарево Нива,
сар со нарединѓа манге о Господари.’

¹¹А кога о Исус тердило англо управители, хем о управители пучљале: „Ту ли сијан Јудејско царо?“

А о Исус ваќерѓа: „Ту ваќереја.“

¹²Хем кога обвинингеле о првосвештениќа хем о старешине, на одговоринела сине ништо.

¹³Тогаш о Пилат ваќерѓа Леске: „Зар на шунеја со са сведочинена против Туте?“

¹⁴Хем на одговоринѓа леске ниту ко јек лафи, аѓар со о управители чудинѓапес бут.

¹⁵А ко секова празнико о управители синеле обичај те мукел е народоске јек затворнико, кас со би роденале. ¹⁶Тогаш синелен прочујмо затворнико, кој викинелапес сине Варава. ¹⁷Хем кога кхедингепес, о Пилат ваќерѓа ленге: „Кас мангена те мукав туменге? Е Варава ли, или е Исусе, ваќердо Христос?“ ¹⁸Соске џанела сине дека предајнгеле таро завист.

¹⁹Хем џи коте бешела сине ки столица е судибаскири, олескири ромни бичхаѓа џи ки лесте те ваќерен леске: „Ма ќер Леске ништо Одоле Праведникоске, соске авдије бут цидинѓум, ко суно, баши Леске!“

²⁰Ама о првосвештениќа хем о старешине чхивена сине е народон те измолинен баши о Варава, а е Исусе те мударенле.

²¹Тогаш о управители ко одговор ваќерѓа: „Кас таро дуј џене мангена те мукавле?“
А ола ваќерге: „Е Варава!“

²²О Пилат ваќерѓа ленге: „А со те ќерав тогаш е Исусеја, ваќердо Христос?“
Сарине ваќерге: „Те овел распнимо!“

²³А ов ваќерѓа: „Саво билачхипе ќерѓа?“
А ола панда посилно викинена сине: „Те овел распнимо!“

²⁴А о Пилат штом дикхља дека ништо на поможинела, него о викиба овела побаро, леља пани хем тхоѓа пе васта англо народо хем ваќерѓа: „Невино сијум баши о рат акале Праведникоскоро! Тумен дикхен!“

²⁵Хем цело народо одговоринѓа хем ваќерѓа: „Олескоро рат ки аменде хем амаре чхавенде!“

²⁶Тогаш мукља оленге е Варава, а е Исусе камшикујнѓале хем предајнѓале те распниненле.

²⁷Тогаш о војниќа е управителескере ингаргеле е Исусе ки преторија хем кхединге цело чета околу Лесте. ²⁸Икавге Олескере шеја хем чхиге Леске лоли наметка; ²⁹плетинге венцо таро каре хем чхиге Леске ко шеро хем трска ки Лескири десница; хем пеле ко кочиа англо Лесте, хем асанајне Леске, ваќерибаја: „Здраво, Царе Јудејско!“ ³⁰Хем чхунгарге ки Лесте, леле и трска хем кхугеле ко шеро.

³¹Откога асандиле Леске, икавге таро Олестар и лоли наметка хем урагeле ко Олескере шеја хем ингаргеле те распниненле.

Е Исусе ковиненале ко крсто

³²А ко икљојбе сретнинге мануш Киринејцо, ко анав Симон, хем чхигеле те ингарел о крсто Лескоро.

³³Хем кога ресле ко тхан ваќердо Голгота – со значинела: Тхан Черепескоро, ³⁴денгеле те пијел мол, мешимо жолчкаја, ама кога вкусинѓа, на мангља те пијел.

³⁵А кога распнингеле, разделинге Олескере шеја, фрдинге жрепка, за да те исполнинелпес о ваќердо преку пророко:

‘Разделинге о шеја Мле машкар песте
хем баши о шеја Мле фрдинге жрепка.’

³⁶Хем бешена сине хем пазиненале сине отхе.

³⁷Хем чхиге Леске упредер Олескоро шеро натпис баши Олескири вина: „АКАВАЈ ТАНО О ИСУС, ЦАРО ЈУДЕЈСКО.“

³⁸Тогаш распнинге Олеја дуј разбојниќа: јек тари десно, а јек тари лево.

³⁹А окола со накхена сине хулиненале сине, иранибаја пумаре шере, ⁴⁰хем ваќерибаја: „Ту со рушинеја о Храми хем со баши трин диве ѕидинејале, спасинту Тут, ако сијан Девлескоро Чхаво; хули таро крсто!“

⁴¹Исто ваќерена сине о првосвештениќа, е книжниконцар хем е старешиненцар, асанајне Леске: ⁴²„Е јаверен спасинѓа, а Коркори Пес нашти те спасинел. Ови тано о Израелевско Царо! Нека хулел акана таро крсто хем ка поверујнале! ⁴³Ов надинелапес сине ко Девел, нека избавинеле акана, ако мангелале, соске ваќерѓа: ‘Девлескоро Чхаво сијум!’“

⁴⁴А исто аѓар навредингеле о разбојниќа распниме Олеја.

⁴⁵А таро шовто саати сине темница ки цело пхув џи ко ејнато саати. ⁴⁶Негде ко ејнато саати о Исус викинѓа силно гласоја хем ваќерѓа: „Или! Или! Лама Савахтани!?“ – одова значинела: „Мо Девел, Мо Девел! Соске мукљан Ман?“

⁴⁷А некој таро окола, кој терѓона сине одотхе, кога шунге одова, ваќерге: „Акава викинела е Илија!“ ⁴⁸Хем одма јек олендар прастандило, леља сунгери, топинѓале ки киселина, чхиѓале ки трска, хем делале сине те пијел.

⁴⁹А о јавера ваќерена сине: „Мук! Те дикха дали ка авел о Илија те спасинеле!“

⁵⁰А о Исус викинѓа палем силно гласоја хем мукљале о духо. ⁵¹Хем еќе! И завеса ко Храми пхаравсалили ко дуј, упралдан џи теле, хем и пхув тресинѓапес, хем о карпе пхариле, ⁵²а о гробиа пхравдиле, хем воскреснинге бут тејља таро света муле; ⁵³хем иклиле таро гробиа пало Олескоро воскресение, кхуге ки Свето Диз хем јавингепес буте џененге.

⁵⁴А о римско офицери хем окола, кој олеја аракхена сине е Исусе, откога дикхле о земјотрес хем са со уло, дарандиле бут хем ваќерге: „Чаче, Акава сине Девлескоро Чхаво!“

⁵⁵А одотхе сине хем дикхена дуралдан бут ромња, кој слединена сине е Исусе тари Галилеја хем служинена сине Леске. ⁵⁶Машкар ленде сине: и Марија Магдалена хем и Марија, и дај е Јаковескири хем е Јосиескири, хем и дај е Заведескере чхавенгири.

⁵⁷А кога ратило, ало барвало мануш тари Ариматеја, ко анав Јосиф, кој хем коркори сине е Исусескоро ученико: ⁵⁸ов гело ко Пилат хем родинѓа е Исусескоро тело. Тогаш о Пилат нарединѓа те овеле дендо. ⁵⁹Хем о Јосиф леља о тело, паќарѓале ко чисто чаршафи, ⁶⁰хем чхиѓале ко пло нево гробо, со сине ќерѓа дупка ки карпа. Хем чхиѓа баро бар е гробоске ки дупка хем гело песке. ⁶¹А и Марија Магдалена хем и јавер Марија, бешена сине одотхе карши о гробо.

⁶²А ко јавер диве, пало Спремиба, о првосвештениќа хем о фарисеа кхедингепес ко Пилат, ⁶³хем ваќерге леске: „Господар, сетингем амен дека одова измамнико, панда џи коте сине џивдо, ваќерѓа: ‘Ка воскреснинав пало трин диве.’ ⁶⁴Одолеске заповедин те овел аракхло о гробо џи ко трито диве, за да ма те авен Олескере учениќа те чоренле, хем те ваќерен е народоске: ‘Воскреснинѓа таро муле,’ хем о последно ховајба ка овел полошно таро прво.“

⁶⁵О Пилат ваќерѓа ленге: „Еќе туменге стража; џан хем аракхен, сар со џанена!“ ⁶⁶Ола геле хем обезбединге о гробо стражаја хем запечатинге о бар.