О Исус сасќарела астардо ки постела

¹Хем откога кхуѓа ко броди, пренакхља хем ало ки Пли диз. ²Хем еќе, анге Леске астардо, кој пашљола сине ки постела. А кога о Исус дикхља оленгири вера ваќерѓа е астардеске: „Охрабринтут, мо чхаво. Опростиненапес туке тле гревиа.“

³Хем еќе, некој таро книжниќа ваќерге ки песте: „Акава грешинела англо Девел.“

⁴А о Исус, џандипаја оленгере мисле, ваќерѓа: „Соске мислинена билачхипа ко тумаре срциа? ⁵Па сој тано полокхо те ваќерелпес: ‘Опростиненапес туке тле гревиа,’ или те ваќерелпес: ‘Ушти хем џа’? ⁶Ама, за да те џанен дека о Чхаво Манушикано исиле власт ки пхув те опростинел гревиа,“ тогаш ваќерѓа е астардеске: „Ушти, вазде тли постела хем џа туке кхере.“ ⁷Хем уштило хем гело песке кхере.

⁸А о народо, кога дикхља одова, дарандиле хем прославинге е Девле, Кој денѓален асавки власт е манушенге.

О Исус викинела е Матеје

⁹А кога о Исус џала песке сине одотхаре дикхља јеке мануше, ко анав Матеј, сар бешела ки тезга баши кхедиба даноко, хем ваќерѓа олеске: „Пхир пали Манде!“ Ов уштило хем гело пали Лесте.

¹⁰Хем уло, откога бешла Ов ки софра ко кхер, еќе, бут цариниќа хем грешниќа але хем бешле е Исусеја, хем Олескере учениконцар. ¹¹Штом о фарисеа дикхле одова, ваќерге Олескере учениконге: „Соске тумаро Учители хала е цариниконцар хем е грешниконцар?“

¹²А Ов, кога шунѓа одова, ваќерѓа: „Е састенге на требела доктори, него е насваленге! ¹³Ама џан хем сикљовен со значинела: ‘Милост мангава, а на жртве’; соске на аљум те викинав е праведникон, него е грешникон ко покајание.“

¹⁴Тогаш е Јованескере учениќа але ки Лесте хем ваќерге: „Соске амен хем о фарисеа постинаја бут, а Тле учениќа на постинена?“

¹⁵А о Исус ваќерѓа ленге: „Шај ли о хенамика те жалинен, џи коте тано о џамутро оленцар? Ама, ка авен диве кога ка лелпес лендар е џамутре; хем тогаш ка постинен.

¹⁶Никој на чхивела котор таро нево материали ко пуране шеја, соске о котор ка кхеделпес хем ка ќерел панда побари дупка. ¹⁷Ниту неви мол чхивелапес ко пуране коже баши мол; инаку о коже баши мољаке чхинѓона, и мол тхавдела хем о коже мољакере пропадинена. Него неви мол чхивелапе ко неве коже мољакере па пазиненапес хем о солдуј заедно.“

О Исус ваздела таро муле е чхаја хем сасќарела е ромња со сине насвали

¹⁸Џи коте ваќерела сине ленге баши одова, еќе јек началнико ки синагога ало, пело англо Лесте ничкум хем ваќерѓа: „Мли чхај мули акана; него ава хем чхив Тло вас ки лате, хем ој ка живинел.“

¹⁹Хем о Исус уштило хем слединѓале, Пле учениконцар. ²⁰Хем еќе, ромни, која болујнела сине дешудуј берш таро крварење али Леске паше палалдан хем допринѓапес џи ко краја таро Олескере шеја. ²¹Соске ваќерелајне ки песте: „Само ако допринавама џи ко Олескере шеја, ка сасќовав.“

²²А о Исус иранѓапес, дикхљала хем ваќерѓа лаке: „Охрабринтут, ми чхај. Тли вера сасќарѓатут.“ Хем и ромни сине састили таро одова саати.

²³Хем кога о Исус ало ко кхер е началникоске, дикхља околен со башалена хем е народон сар викинена, ²⁴хем ваќерѓа: „Нашен ко крајо, соске и чхај нае тани мули, него совела.“ Хем ола асандиле Леске. ²⁵Откога икалѓа е народон, кхуѓа хем астарѓала таро вас, хем и чхај уштили. ²⁶Хем о гласо баши одова ширинѓапес ки цело одоја пхув.

О Исус сасќарела е дује корорен

²⁷Хем кога о Исус џала песке сине одотхаре, дуј короре слединенале сине, викибаја хем ваќерибаја: „Смилујнтут аменге, Чхаво е Давидескоро!“

²⁸А кога ало ко кхер, о короре але ки Лесте, а о Исус ваќерѓа ленге: „Верујнена ли дека шај те ќерав одова?“

Ваќерге Леске: „Оја, Господар!“

²⁹Тогаш допринѓа оленгере јајкха, ваќерибаја: „Нека овел туменге спрема тумари вера.“

³⁰Хем о јајкха пхравдиле оленгере. Хем о Исус заповединѓа оленге строго: „Дикхен, никој те на џанел баши одова!“ ³¹А ола, штом иклиле, разширинге ки цело одоја пхув. ³²Џи коте ола икљовена сине, еќе, анге Леске мануш лалоро хем астардо таро демони. ³³Откога о демони сине палдимо, о лалоро ќерѓа лафи. Хем о народо чудингепес, ваќерена сине: „Никогаш на дикхлилопес асавко нешто ко Израел!“

³⁴А о фарисеа ваќерена сине: „Ов палдела е демонен преку о владетели е демоненгоро.“

³⁵Хем о Исус обиколинела сине са о диза хем гава, сикајбаја ко оленгере синагоге хем проповедибаја о Евангелие е царствоскоро хем сасќарибаја секова насвалипа хем секоја слабост машкар о мануша. ³⁶А кога дикхља е народон, пело Леске жал баши оленге, соске сине чхиндиле хем распрскиме сар бакхре, кој наелен пастири.

³⁷Тогаш ваќерѓа ленге Пле учениконге: “И жетва чаче тани бари, а работниќа хари, ³⁸молиненле тогаш е Господаре е жетвакоро те бичхалел работниќа ки Пли жетва!“