¹Хем викинѓа Пле дешудује ученикон ки Песте, хем денѓален власт упро нечиста духиа те палденлен хем те сасќарен секова насвалипа хем секоја слабост.

²А акалај тале о анава е дешудује апостоленгере: прво о Симон, ваќердо Петар, хем олескоро пхрал о Андреј, па о Јаков е Заведескоро хем о пхрал лескоро о Јован, ³о Филип хем о Вартоломеј, о Тома хем о Матеј о царинико, о Јаков е Алфејескоро хем о Тадеј, ⁴о Симон Кананит хем о Јуда Искариотски, кој хем предајнѓале.

⁵О Исус бичхаѓален адале дешудује џенен хем нарединѓа ленге, ваќерибаја: „Ма џан пало друмо ко народиа, хем ма кхувен ки диз е Самарјаненге; ⁶него џан пошукар ко нашавде бакхре е Израелеске ко кхер. ⁷Хем џандор, проповединен хем ваќерен дека авела паше о царство небесно. ⁸Сасќарен е насвален, воскреснинен е мулен, очистинен е лепрознен, палден е демонен; бизо паре добинген, бизо паре ден.

⁹Ма лен ни злато, ни сребро, ниту ба-кри ко тумаре појасиа; ¹⁰ниту торба баши друмо, ни дуј шеја, ни кундре, ни каш, соске о работнико заслужинела пло хајбе.

¹¹А кога кхувена ки саво хем било диз или гав, распучен кој тано достојно ки лесте; хем ачховен одотхе џи коте на џана туменге олестар. ¹²А кога ка кхувен ко кхер, поздравиненле. ¹³Хем ако чаче о кхер овела достојно, тумаро мир нека авел ки лесте; а ако на овела достојно, тумаро мир нека иранелпес туменге. ¹⁴Хем ако некој на приминела тумен, ниту шунела тумаре лафиа, кога икљона таро одова кхер или диз тресинен о право таро тумаре пре. ¹⁵Чаче ваќерава туменге, полокхо ка овел е Содомско хем и Гоморско пхув ко судно диве, отколку одоле дизаке.

¹⁶Еќе Ме бичхавава тумен сар бакхре машкар о рува; одолеске овен мудра сар сапа хем безопасна сар гулубиа. ¹⁷Аракхен тумен таро мануша, соске ка предајнен тумен е судонге хем ка камшикујнен тумен ко пумаре синагоге. ¹⁸Ка икален тумен англо управитејља хем о цајра, баши Манге, баши сведоштво оленге хем е народонге. ¹⁹А кога ка предајнен тумен, ма секиринен тумен сар или со ка ваќерен, соске ко одова саати ка овел туменге тано дендо со требела те ваќерен; ²⁰соске на сијен тумен кој ќерена лафи, него о Духо тумаре Дадескоро, Кој ќерела лафи ки туменде.

²¹А о пхрал ка предајнел пе пхрале ко мерибе, хем о дат – е чхаве, хем о чхаве ка овен против о родитејља хем ка мударенлен. ²²Хем ка овен мрзиме таро сарине баши Мло анав; ама, кој ка претрпинел џи ко крајо, ов ка овел спасимо.

²³Кога ка гонинен тумен ки диз, нашен ки јавер; соске чаче ваќерава туменге, нае те обиколинен о израелска диза џи коте авела о Чхаво Манушикано.

²⁴О ученико нае тано упредер о учители, ниту о слуга упредер пло господари. ²⁵Доста леске тано е ученикоске те овел сар лескоро учители хем е слугаске сар лескоро господари. Ако о газда е кхерескоро ваќеренале Велзевул, кобор повише олескере кхерутне!

²⁶Одолеске, ма даран олендар; соске нае ништо учхардо, со нае те откринелпес, ниту гаравдо со нае те дознајнелпес. ²⁷Со ваќерава туменге ко каранлуко, ваќеренле ки светлина; хем со ка шунен ко кан, прогласиненле таро кровиа.

²⁸Хем ма даран таро окола кој мударена о тело, а и душа нашти те мударенла. Него даран повише таро Окова, Кој шај те уништинел хем и душа хем о тело ко пекол.

²⁹На бикиненапес ли дуј чхирикља баши јек пара? Па нијек таро олендар на перела ки пхув бизо војља тумаре Дадескири. ³⁰А туменге тане гејнде дури хем о бала ко шеро. ³¹Хем аѓар, ма даран. Тумен сијен поскупа таро бут чхирикља.

³²Хем аѓар, секој кој признајнеламан Ман англо мануша, ка признајнавле хем Ме ле англо Мло Дат, Кој тано ки небеса. ³³А кој ка одречинелпес Мандар англо мануша, хем Меда ка одречинапес олестар англо Мло Дат, Кој тано ки небеса.

³⁴Ма мислинен дека аљум те анав мир ки пхув. На аљум те анав мир, ама мачи. ³⁵Соске аљум ‘те разделинав е мануше таро олескоро дат хем е чхаја тари лакири дај, хем е бојра тари лакири сасуј,’ ³⁶хем ‘душмани е манушеске ка овен олескере кхерутне.’

³⁷Кој мангела е даде или е даја, повише Мандар, нае тано достојно баши Манге, хем кој мангела е чхаве или е чхаја, повише Мандар, нае тано достојно баши Манге; ³⁸хем кој на лела пло крсто хем на џала пали Манде, нае тано достојно баши Манге. ³⁹Кој ка аракхел пли душа, ка нашавела; хем кој ка нашавела пли душа баши Манге, ка аракхела.

⁴⁰Кој приминела тумен, приминелама Ман, а кој приминелама Ман, приминела Околе, Кој бичхаѓама. ⁴¹Кој приминела пророко ко анав е пророкоске, ка приминел пророчко награда; хем кој приминела праведнико ко анав е праведникоскоро, ка приминел праведничко награда. ⁴²Кој ка пхерел јек таро акала тикне само чаша шудре пајнеја, соске тано ученико, чаче ваќерава туменге, нисар нае те нашавел пли награда.“