Псалм 103
Благодарна баши е Девлескири милост
(Е Давидескоро Псалми)
1Благословинле е Господаре мли душа, хем са сој тано ки манде: Олескоро свето анав!
2Благословинле е Господаре мли душа, хем ма бистре Олескере шукарипа со ќерѓа.
3Ов опростинела са тле гревиа, Ов сасќарела са тле болестиа;
4Ов спасинела тло живото таро пропаст, опкружинелатут шукарипаја хем мангипаја;
5Пхерела тло живото шукарипаја, тло тернипа ќерелале нево сар е орлоскоро.
6О Господари ќерела праведна дејља, хем е малтетирименге иранела ленге и правда,
7е Мојсеске објавинѓа Пле друмиа, е Израелескере чхавенге Пле дејља.
8Жалостиво хем милостиво тано Господари, исиле баро трплење хем бут верно мангипе.
9Нае тано хољамо баши вечна времиа, ниту Олескири холи ачхола заувек.
10На постапинела аменцар спрема амаре гревиа, ниту платинела аменге спрема амаро беззаконие.
11Соске кобор тано о небо учо упри пхув, добором тани бари Олескири милост ко окола со дарана Олестар.
12Кобор тано о исток дур таро запад, добором дујраќерѓа амендар амаре беззакониа.
13Сар со о дат сожалинела пе чхавен, аѓар о Господари сожалинела околен, со дарана Олестар.
14Соске џанела шукар сар сијем создајме, спомнинела Песке дека сијем право.
15Е манушескере диве тане сар чар, бајрона сар полско лулуди.
16Штом и бавлал ка пипинела хем веќе нае тани, ни олакоро тхан на памтинелала.
17Ама е Господарескоро мангипе тано вечно упро окола кој дарана Олестар, хем Олескири правда упро чхаве е чхавенгере,
18упро окола со аракхена Олескоро завет, хем памтинена Олескере заповедиа, за да те исполниненлен.
Секој те благословинел е Господаре
19О Господари чхиѓа Пло престол ко небо, хем Олескоро царство владинела упредер о са.
20Благословиненле е Господаре, са Олескере ангејља, тумен о моќна ки сила, кој исполниненале Олескоро лафи, послушна е гласоске таро Олескоро слово!
21Благословиненле е Господаре, са Олескири војска, Олескере слуге, со исполнинена Олескири војља!
22Благословиненле е Господаре, са Олескере дејља, ко секова тхан таро Олескоро владиба! Благословинле е Господаре, мли душа!