О Христос амаро Застапнико

¹Мле чхавален, акава пишинава туменге за да ма те грешинен; хем ако некој грешинела исиамен Застапнико ко Дат: о Исус Христос, о Праведнико. ²Ови тано жртва со помиринѓа баши амаре гревиа; на само баши амаре, него хем баши о гревиа е цело светоскере.

³Хем пало одова џанаја дека пенџарајале, ако пазинаја Олескере заповедиа. ⁴Кој ваќерела: „Пенџарѓумле,“ а на пазинела Олескере заповедиа, ховавној тано хем о чачипе нае тано ки лесте. ⁵А кој пазинела Олескоро слово, ки лесте, чаче, о мангипе ко Девел ресља џи ко совршенство. Пало одова џанаја дека сијем ки Лесте. ⁶Кој ваќерела дека ачхола ки Лесте, ов требела те џал, сар со џала сине Ов.

Неви заповед

⁷Мангљален, на пишинава туменге неви заповед, него и пурани заповед, со примингенла таро почеток; и пурани заповед тано о слово, со шунгенле. ⁸Но сепак пишинава туменге неви заповед; хем одовај тано чачутно хем ки Лесте хем ки туменде – соске и темнина накхела, а и чачутни светлина веќе светинела.

⁹Кој ваќерела дека тано ки светлина, а мрзинела пе пхрале, ови тано џи акана ки темнина. ¹⁰Кој мангела пе пхрале ачхола ки светлина хем ки лесте нае ништо со би шај сине некас те чхивел ко грево. ¹¹А кој мрзинела пле пхрале ки темнина тано хем ки темнина џала, хем на џанела кај џала, соске и темнина којрарѓа о јајкха лескере.

¹²Пишинава туменге, чхавален, соске опростиме тумаре гревиа, баши Олескоро анав. ¹³Пишинава туменге, дадален, соске пенџарген Околе, Кој тано таро почеток; пишинава туменге, тернален, соске побединген е билачхе. Пишинѓум туменге, чхавален, соске пенџарген е Даде. ¹⁴Пишинѓум туменге, дадален, соске пенџарген Околе, Кој тано таро почеток. Пишинѓум туменге, тернален, соске сијен силна хем соске е Девлескоро слово живинела ки туменде хем соске побединген е билачхе.

Ма манген о свето

¹⁵Ма манген о свето, ниту окова сој тано ко свето. Ако некој мангела о свето, о мангипа таро Девел о Дат нае тано ки лесте, ¹⁶соске са сој тано ко свето - и похота е телоскири, и похота е јајкхенгири хем и гордост е животоскири - нае тано таро о Дат, него таро свето. ¹⁷А о свето накхела хем олескири похота, а кој извршинела е Девлескири војља ачхола довек.

Е Христоскере душмајна

¹⁸Чхавален, о последно саати тано; хем сар со шунген дека о антихрист авела, аѓар акана уштиле бут антихристиа; пало одова џанаја дека тано о последно саати. ¹⁹Амендар иклиле, ама на сине амендар, соске ако сине амендар, ка ачховен сине аменцар, него требела сине те сикавелпес дека нае тане сарине амендар.

²⁰А тумен иситумен помазание таро Светиот хем џанена са. ²¹На пишинѓум туменге сар те на џанен о чачипа, него соске џанена хем соске нијек ховајба нае тано таро чачипе. ²²Кој тано о ховавно, ако на окова, кој одрекујнела дека о Исус тано Христос? Акава тано антихрист – кој одрекујнела е Даде хем е Чхаве. ²³Секој со одрекујнела е Чхаве наеле ни е Даде; кој исповединела е Чхаве, исиле хем е Даде.

Ачховен ко Христос

²⁴Со шунген таро почеток, одова те ачхол ки туменде. Ако ачхола ки туменде окова со шунген таро почеток, хем тумен ка ачховен ко Чхаво хем о Дат. ²⁵А акавај тано о ветување со Ов ветинѓале аменге: вечно живото.

²⁶Акава пишинѓум туменге баши окола, кој ховавена тумен. ²⁷А тумен, ки туменде ачхола о помазание со приминген Олестар хем нае тано потребно некој те сикавел тумен, него сар со Олескоро помазание сикавела тумен баши о са, хем тано чачутно хем нае тано ховајба, хем сар со сикаѓа тумен, аѓар ачховен ки Лесте. ²⁸Хем акана, чхавален, ачховен ки Лесте, за да те овеламен смело доверба кога ка јавинелпес Ов хем за да ма те лаџаќерамен англо Лесте, ко Олескоро ајбе. ²⁹Ако џанена дека Ови тано праведно, џанен дека секој кој ќерела правда, тано бијамо таро Олестар.