1 Јованово 3

Е Девлескере чхаве

¹Дикхен саво мангипе денѓамен о Дат: те ваќерамен Девлескере чхаве. А одова хем сијем! Одолеске о свето на пенџареламен амен, соске на пенџарге Оле. ²Мангљален, акана сијем Девлескере чхаве, хем панда на откринѓапе со ка ова; ама џанаја: кога ка откринелпе ка ова Олеске слична, соске ка дикхале асавко саво сој тано. ³Хем секој кој исиле акаја надеж ки Лесте очистинелапес коркори, сар сој тано хем Ов чисто.

⁴Секој кој ќерела грево, ќерела хем беззаконие; хем о грево тано беззаконие. ⁵Хем џанена дека Ов јавинѓапес за да те отстранинел о гревиа, а ки Лесте нае грево. ⁶Секој кој ачхола ки Лесте, на грешинела; секој кој грешинела, на дикхљале Оле, ниту пенџарѓале.

⁷Чхавален, никој те на заблудинел тумен. Кој ќерела правда праведној тано, сар сој тано Ов праведно. ⁸Кој ќерела грево таро бенг тано, соске о бенг грешинела таро почеток. Одолеске јавинѓапе е Девлескоро Чхаво, за да те пејљарел о дејља е бенгескере.

⁹Секој, Кој тано бијамо таро Девел на ќерела грево, соске Олескоро семе ачхола ки лесте, хем нашти те грешинел, соске тано бијамо таро Девел. ¹⁰Пало акава пенџаренапес е Девлескере чхаве хем е бенгескере чхаве: секој кој на ќерела правда хем на мангела пе пхрале, нае тано таро Девел.

Те мангамен јек јекеја

¹¹Соске акавај тано о хабери со шунген таро почеток: те мангамен јек јавереја! ¹²На сар со о Каин сине таро билачхо хем мударѓа пе пхрале. Хем соске мударѓале? Соске олескере дејља сине билачхе, а олескере пхралескере – праведна. ¹³Ма чудинен тумен, пхрајљален, ако о свето мрзинела тумен.

¹⁴Амен џанаја дека накхлем таро мериба ко живот, соске мангаја е пхрален. Кој на мангела пе пхрале, ов ачхола ко мериба. ¹⁵Секој, кој мрзинела пе пхрале, тано манушубицо, а џанена дека ко нијек манушубицо ки песте наеле вечно живото.

¹⁶Пало одова пенџаргем о мангипе, со Ов денѓа Пло живото баши аменге; хем амен сијем дужна те да амаре животиа баши о пхрајља. ¹⁷А кој исиле светско гудлипа хем дикхела пе пхрале ко нанипа, па пхандела пло срце ки лесте, сар ка ачхол е Девлескоро мангипе ки лесте? ¹⁸Мле чхавален, те на манга лафенцар или само чхибаја, него ко дело хем чачипе.

Увериме англо Девел

¹⁹Пало одова ка пенџара дека сијем таро чачипе, па ка уверина амаре срциа англо Лесте, ²⁰соске кога амаро срце осудинеламен, о Девел тано побаро таро амаро срце хем џанела са.

²¹Мангљален, ако о срце на осудинеламен, исиамен смелост англо Девел, ²²хем со хем те замолина Оле, приминаја Олестар, соске пазинаја Олескере заповедиа хем ќераја сој тано благоугодно англо Лесте. ²³А Олескири заповед тани акаја: те верујна ко анав Олескере Чхавесте о Исус Христос хем те мангамен јек јавереја, сар со заповединѓа аменге. ²⁴Хем кој пазинела Олескере заповедиа ачхола ки Лесте хем Ов - ки лесте. Хем пало одова џанаја дека Ов ачхола ки аменде: пало Духо Кас со денѓамен.