1 Тимотеј 2

Молитва баши са о мануша хем и власт

¹Аѓар, англедер о са те ќеренпес родиба, молитве, молбе, благодарност баши са о мануша, ²баши о цајра хем баши саре кој тане ко власт, за да те шај те проживина тихо хем мирно живото ко са о побожност хем чесност. ³Акавај тано шукар хем угодно англо Девел, амаро Спасители, ⁴Кој мангела са о мануша те спасиненпес хем те авен ко пенџариба о чачипа.

⁵Соске о Девели тано јек, хем јек тано Посреднико машкар о Девел хем о мануша: о Мануш о Христос Исус, ⁶Кој денѓапе Пес сар откуп баши о сарине, баши сведоштво ко вистинско време, ⁷баши кова ме сијум сине постајмо баши проповеднико хем апостоли, чаче ваќерава, на ховавава, баши учители е народонге ки вера хем чачипе. ⁸Хем аѓар, мангава о мурша те молиненпес ко секова тхан, те вазден пле света васта бизо холи хем препирка.

Сар ваљани те овен о џувља

⁹Исто аѓар хем о џувља те украсиненпес ко пристојно шеја, скромно хем претпазливо, на плетенкенцар хем злато, или бисеренцар или скапоцено шејенцар, ¹⁰него шукар делонцар, сар со бешела е џувленге, кој исповединена дека тане побожна.

¹¹И џувли те сикљол ки тишина хем ки секоја покорност. ¹²А е џувљаке на дозволинава те поучинел, ниту те господаринел упро ром, него те овел мирно. ¹³Соске, прво сине создајмо о Адам, пало одова и Ева. ¹⁴Хем о Адам на ховавсалило, него и џувли сине ховавди, хем пели ко престап. ¹⁵Ама ој ка овел аракхли бијанибаја чхавен; ако ачхона ки вера хем мангипе хем ко светост, претпазлива.